1 Timothy 1

Sotho 1951 (BIBELE)

Jump to: Chapter 2 →

1Paulo Moapostola wa Jesu Kriste ka taelo ya Modimo Mophološi wa rena le ya Mong wa rena Jesu Kriste kholofelo ya rena.

2Ke ngwalela Timotheo ngwana wa ka wa makgonthe tumelong. Kgaugelo le tšhokelo le khutšo a di go tlele di etšwa go Modimo Tata wešo le go Jesu Kriste Mong wa rena.

3Ke sa go kgopela tša mohla wola ke go tlogela motseng wa Efeso ke eya Matsedonia, ge ke laela gore go se ke gwa ba le ba go ruta thuto e šele.

4Ka re ba se ke ba ya le dinonwane, le dipalo tša meloko e se nago mo e gomago. Dilo tšeo di tsoša dikgang; di šitiša batho go agišana le Modimo ka tumelo.

5Se thuto e išago go sona ke lerato le le tšwago pelongtshekegi, le letswalong le le sa imelwego ke molato, le tumelong e se nago boikaketši.

6Go na le ba ba arogilego ba ya le dipolelo tša lefela.

7Ba rata go ba baruti ba Molao ba sa tsebeše tše ba di bolelago le tše ba di tiišago.

8Rena re tseba ge Molao e le o botse ge motho a eya ka mo o layago ka gona;

9Ge motho a tseba gore Molao ga o a beelwa moloki, ge o beetšwe ba ba senyago Molao, le ba ba ganago go kwa, ba go se boife Modimo, le badiradibe le bakgopo, le ba makgapha, le ba go bolaya botatabo le bommabo, ba go bolaya batho,

10Le ba diotswa, le ba go senya bašimane, le ba go rekiša mathopša, le ba maaka, le ba go ena ka maaka, le ba go ganana le thutothuto.

11Re di tseba ka Ebangedi ya letago la Modimo wa mahlogonolo, ye a e gafetšego nna.

12Ke leboga Jesu Kriste Mong wa rena ge a mphile maatla a nkhweditše ka botega, a mpea modirong wo,

13yena nna ke bego ke le morogaki le mohlokofatši, wa go dira batho ka bogale; gomme ke gaugetšwe ka gobane dilo tšeo ke di dirile ke sa tsebe; ke sešo ka ba modumedi.

14Mong wa rena a ntira ka kgaugelo e kgolokgolo ruri, ya tšweletša tumelo le lerato ka Kriste Jesu.

15Ke taba ye e tiilego, ye e swanetšego go amogelwa ka botlalo, ye ya gore Jesu Kriste o tlile lefaseng gore a phološe badiradibe, bao ke lego thwadi ya bona.

16Fela, ke gaugetšwe, gore ka nna ke lego thwadi ya badiradibe Jesu Kriste a bonagatše gona go se fele pelo ga paala, gore bohle ba ba tlogo dumela ba swantšhetšwe ka nna, ba išwe bophelong bjo bo sa felego.

17Gomme yena Kgoši Ramabakaanengleneng, yena Modimo wa go se fetoge, wa go se bonwe ke motho, a a godišwe a retwe go ya go ile le neng le neng. Amene.

18Timotheo Ngwanaka! Se taelo ye ke go laelago ka yona ke eya ka diporofeto tše di go boletšego, ke re: Hlabana tlhabano e botse ka tšona.

19O hlabane o na le tumelo le letswalo le le sa tsebego molato. Ke tšona tše ba bangwe ba kgaoganego natšo, mme tumelong ba senyegelwa ke matšibogo.

20Ba bangwe ba bona ke Himeneo le Alesandere, ba ke ba gafetšego Sathane, gore ba tlwaologe go goboša Modimo.

Jump to: Chapter 2 →