1 Timothy 3

Sotho 1951 (BIBELE)

← Chapter 2 Jump to: Chapter 4 →

1Taba ye e tiile: Ge motho a nyaka bolebeledi, o duma modiro o botse.

2Molebeledi go swanetše ge e le motho e a se nago bosodi e le monna wa mosadi o tee, mophafogi, wa pelokeledi, wa mekgwa e botse, moratabaeng, motsebagoruta.

3E se ke ya ba monwi wa sedila, e se ke ya ba motiabatho le mollaleruo; a e be yo botho, moiladikgang, e a se nago megabaru.

4E be e a bušago ba lapeng la gabo gabotse, e be molaolabana ka bokwala.

5Gobane ge motho a sa tsebe go laola ba lapeng la gabo, o tlo kgona bjang go babalela phuthego ya Modimo?

6E se ke ya ba modumedi e mofsa, a se tlo ikgogomoša a wela molatong wa Diabolo.

7Go rata ge e le monna wa tumo e botse go bantle, a se tlo tanywa ke ditshele le moreo wa Diabolo.

8Le badiredi e be batho ba bothakga, e se be baradia, e se be ba ba ineetšego go nwa sedila le ballaleruo.

9A e be ba ba swerego thopa ya tumelo ba na le letswalo le le se nago molato.

10Ba go fiwa modiro woo a ba lekolwe pele, go bonwe ge ba se ne senyalo.

11Le basadi e be batho ba bothakga, e se be bagarigari, e be ba ba phafogilego, e be ba go botega dilong tšohle.

12Modiredi e be monna wa mosadi o tee; e be banna ba ba bušago bana ba bona gabotse le malapa a gabo.

13Gobane ba ba dirilego modiro wo gabotse ba ithuela bogolo bjo botse, le mafolofolo tumelong ya go dumela Jesu Kriste.

14Ke go ngwalela ditaba tše le ge ke holofetše go tla go wena e sa le bjale.

15Ge nka diega, o tsebe gore ke wona modirelo wa Ngwakong wa Modimo, ke ra wa phuthegong ya Modimo e a phelago, e lego yona kokwane le motheo wa therešo.

16Sephiri se sa borapedi se godile wa go se ganetšege, sa go re: Modimo o bonagetše nameng, a hlatselwa toko ke Moya, a bonala ka Barongwa, a tsebatšwa ditšhabeng, a dumelwa lefaseng, a rotošetšwa legodimong e le wa letago.

← Chapter 2 Jump to: Chapter 4 →