1 Timothy 4

Sotho 1951 (BIBELE)

← Chapter 3 Jump to: Chapter 5 →

1Moya o boletše gwa kwala, wa re mehleng e tlogo tla ba bangwe ba tlo hlanogela tumelo, ba ya le meoya ya go fora batho, ba ya le dithuto tša meoya e mebe.

2E tlo ba baikaketši ba go bolela maaka, ba ba swailwego matswalo eke ba fišitšwe ka tshipi.

3Ba iletša motho go tšea mosadi, ba ila dijo tše Modimo a di bopetšego go amogelwa ka go leboga ke badumedi ba ba lemogilego therešo.

4Gobane dibopša tša Modimo ke tše botse tšohle, ga go se se kago ilwa ge se lewa ka go leboga;

5Gobane di kgethega ka lentšu la Modimo le ka thapelo.

6Ge o ruta bana ba borena taba tše, gona o tlo ba mohlanka o botse wa Jesu Kriste, yo dijo tša gagwe e lego mantšu a tumelo ye e swanetšwego ruri ke go amogelwa.

7Ge e le dinonwane tšeo di gobogilego, tše nkego ke tša bakgekolo, tšeo o di gane. Wena o itlwaetše borapedi.

8Gobane go tlwaetša mmele go hola ganyane fela. Se se holago gohle ke borapedi ka ge bo na le kholofedišo ya bophelo bjono le ya bjo bo tlogo tla.

9Ke taba ye e tiilego, ye e swanetšwego ruri ke go amogelwa.

10Ke sona se re itapišetšago sona re rogwa; ka gobane re holofetše Modimo e a phelago, Mophološi wa batho bohle, gagolo wa bao ba dumelago.

11Ba laele tšona tše, o ba rute tšona.

12Go se ke gwa ba le e a go nyatšago ka ge o sa le lesogana; baa moetapele wa badumedi go boleleng le mekgweng le leratong le Moyeng le tumelong, le ka mokgwamokgethwa.

13O tiiše go balela batho Mangwalo le go ba eletša le go ba ruta, ke be ke tle go lena.

14O se ke wa tšwafela neo ye o seditšwego ka yona, ye o e filwego wa porofeta mola bagolo ba go beile diatla.

15Hlokomela tšona tšeo, o ineele tšona, gore dilong tšohle go bonale ge o tšwelela pele.

16Itote o lote le thuto. Ge o dira bjalo o tlo iphološa, wa phološa le bao ba go kwago.

← Chapter 3 Jump to: Chapter 5 →