1 Timothy 2

Sotho 1951 (BIBELE)

← Chapter 1 Jump to: Chapter 3 →

1Keletšo ya ka še: Se segolo thata ke dithapelo le dithapelelo, go rapelela le go lebogela batho bohle.

2Re rapelele marena le bohle ba e lego ba bagolo, gore re phele re wele dipelo re iketlile, re le ba borapedi ruri, re le batsebalegi.

3Ke bjona bolo bjoo; ke gona go kgahla Modimo Mophološi wa rena.

4Ke yena a ratago gore batho bohle ba phološwe ba fihlele tsebo ya therešo.

5Gobane Modimo ke yena o tee yo; le Mmoelanyi wa go boelanya Modimo le batho ke yena o tee yo, yena motho Jesu Kriste,

6Yena a ikgafilego a ba selefa sa go lefela bohle; ke bjona bohlatse bja go tla ka lebaka le la bjona.

7Mme nna ke beilwe ka ba motsenedi wa bjona bohlatse bjo, ka ba Moapostola wa bjona. Mme ke bolela therešo, ga ke aketše ke le moruti wa bantle wa tumelo le therešo.

8Bjale ke rata gore banna e be ba go rapela gohle, ba emiše diatla tše kgethwa go se bonaba le dikgang.

9Le basadi ke rata gore ba apare gabotse, ba itlhophe la go šia tsholo le boikgantšho, ba se na maforo le dipheta le mašela a theko e thata.

10A ba apare ka mo go loketšego basadi ba ba rego re ba borapedi, ba bonale ka mediro e mebotse.

11Mosadi a a rutwe a ikhomoletše e le wa go ikokobetša gohle.

12Mosadi ga ke mo dumelele go ruta le go laola monna; a a dule a ikhomoletše.

13Gobane Adama o bopilwe pele, gwa tsebo bopša Efa.

14Le gona e a forilwego ga se Adama, ke mosadi e a setšego molao a dumetše go forwa.

15O tlo phološwa e le wa go belega bana, ge a dula tumelong e le wa pelokeledi.

← Chapter 1 Jump to: Chapter 3 →