2 Corinthians 3

Sotho 1951 (BIBELE)

← Chapter 2 Jump to: Chapter 4 →

1A re ka boela re thoma go ipolela? Goba re sa etša ba bangwe ra hloka lengwalo la bohlatse ge re lebana le lena, le ge e le lengwalo le le tšwago go lena?

2Lengwalo la rena ke bolena; le ngwadilwe dipelong tša rena, le ka tsebja ke bohle la balwa ke batho bohle.

3Le bonala le le lengwalo la Kriste ka modiro wa rena; ga la ngwalwa ka pilwana, le ngwadilwe ka Moya wa Modimo e a phelago. Ga la ngwalwa diphaphathing tša mabje, le ngwadilwe diphaphathing tša nama, tša dipelo.

4Kholofelo ya go holofela Modimo re e hweditše ka Kriste.

5E sego gore re ka kgona go nagana selo se se kago tšwa go rena; go kgona ga rena go tšwa go Modimo.

6Ke yena a re kgonišitšego go ba batseta ba Kgwerano e mpsha, e sego ba tlhaka ya lengwalo, e lego ba Moya. Gobane tlhaka ya lengwalo e a bolaya, se se phedišago ke Moya.

7Gomme ge botseta bja lehu, bja tlhakeng e tloketšwego matlapeng, bo tšweletše ka letago, Baisiraele ba ba ba šitwa go bogela sefahlogo sa Moše ka letago la sefahlogo sa gagwe, e bego e le la go tlo fela.

8Botseta bja Moya a bo ka se be le letago le le phalago lela?

9Ge botseta bja kahlolo bo na le letago, botseta bja toko a bo ka se be le letago le le phalago lela?

10Gobane se se bego se na le letago ka mokgwa wola, se hlokišwa letago ka leno letago le le phadišago.

11Gobane ge sa go tlo fela se tšweletše ka letago, sa go tlo dula se le gona a se ka se be le letago le le phadišago?

12Bjalo ge re na le kholofelo e bjalo, re dira re na le mafolofolo a magolo.

13Ga re etše Moshe e a bego a apeša sefahlogo ka seširo gore Baisiraele ba se ke ba bogela pheletšo ya seo sa go tlo fela.

14Mme megopolo ya bona ya thatafala. Le lehono seširo seo se dutše se sa apolwe ge go balwa tša Kgwerano e tala; gobane seširo seo go fedišwa ga sona go mo go Kriste.

15Fela, le lehono ge go balwa mangwalo a Moshe, seširo seo se dutše se apešitše dipelo tša bona.

16Seširo seo se tlošwa ge ba sokologela go Morena.

17Morena ke yena Moya; gomme mo go lego Moya wa Morena, ke mo go lego khunologo.

18Gomme rena ka moka ba re bogelago letago la Morena ra le bona bjalo ka seiponeng mahlo a tlošitšwe seširo, re bopša lefsa ke yena mong wa Moya, ra tla ra swana la yena re fela re tšwelela pele go tagafaleng.

← Chapter 2 Jump to: Chapter 4 →