2 Corinthians 8

Sotho 1951 (BIBELE)

← Chapter 7 Jump to: Chapter 9 →

1Bjale, bana bešo, re le tsebiša tša kgaugelo ya Modimo ye e tletšego diphuthego tša Matsedonia.

2Le ge ba le tlalelong ya meleko e mentši, lethabo la bona le a seloga; le ge ba sobeletše bohloking, ba tšweletša lehumo le legologolo la batho.

3Ke ba hlatsela ke re: Ba ithapile ba ntšha ka moo ba kgonnego, le go fetiša mo ba kgonago.

4Ba re phegeletše ka kgopelo tše ntši, ba re ba se hlokišwe kgaugelo ya go ba setlemo se tee le rena modirong woo wa go thuša bakgethwa.

5Ba dira ba fetiša moo re bego re re ba tlo kgona ka gona; ba bile ba ikgafile, gagolo ba ikgafela Morena, ba tsebo ikgafela rena ka go ya ka thato ya Modimo.

6Ra kgona go kgopela Tito gore modiro wo wa kgaugelo a o phethe mo go lena ka mokgwa woo a thomilego ka wona.

7Gomme le mo modirong wo wa kgaugelo le tlo dira ka botlalo, ka mokgwa wo le dirilego ka wona ka botlalo medirong ka moka tumelong, le thutong, le tsebong, le mafolofolong, le leratong le le re ratilego ka lona.

8Ge ke realo, ga se go le beela molao; ke rata go bapetša mafolofolo a ba bangwe le a lena, gore ke bone ge lerato la lena e le leratorato.

9Kgaugelo ya Mong wa rena Jesu Kriste le a e tseba, gobane -- e le mohumi -- a ba modiidi ka baka la lena gore le humišwe ka bodiidi bja gagwe.

10Bjale keletšo ya ka še, mme e tlo le hola, lena ba le thomilego ngwagola go dira modiro wo, la o thoma le o rata,

11Bjale o direng le be le o phethe, gore thato e botse e latelwe ke go phetha ka tše le nago le tšona.

12Gobane ge thato e botse e le gona, go tlo thabelwa se motho a se swerego; ge a hlaelwa, ga go taba.

13Ga se gore go hlatlolwe ba bangwe, mme lena la šala le hlaka; go direlwa go lekanya, gore lebakeng le bjale mohora wa lena o tlatše mo ba bangwe ba hlaelwago;

14gore mohora wa ba bangwe o tle o tlatše mo lena le kago hlaelwa; ya ba gona go lekantšha.

15Go ye ka mo go ngwadilwego gwa thwe: E a topilego tše ntši ga a ka a fetiša tekanyo. E a topilego di se nene ga a ka a hlaetša.

16Modimo a a lebogwe ge a file Tito pelo ya mafolofolo ditabeng tša lena.

17Gobane a sa tšo kwa keletšo ya ka, a ithapa a na le mafolofolo a magolo a go re a ye go lena.

18Re romile le mongwe wa bana bešo e a tumilego diphuthegong tšohle ka go ruta Ebangedi.

19Ga se tšeo fela; ngwanešo eo o beilwe ke diphuthego, gore a sepele le rena a swere modiro woo wa kgaugelo wo a o dirago, gore Morena a retwe, gore go tsošwe mafolofolo a lena.

20E tla ba go phema ditshele, ge motho a ka re tsota a bone dineo tše re di lakago e le tše ntši.

21Gobane bothakga ga re nyake bja pele ga Modimo fela; le bja pele ga batho re a bo nyaka.

22Mme ngwanešo eo re mo romile le ba bangwe bao, re mo lemogile ka tše ntši, le gantši, ra hwetša e le wa phišego, gagologolo bjale a holofetše bolena ka tše ntši.

23Ge e le Tito mogwerake, ke modirišani wa ka mo go lena; ge e le bana bešo bao, ke batseta ba diphuthego, bao Kriste a retwago ka bona.

24Bjale, tše e lego bohlatse bja lerato la lena, le bja gore re le kgantšhitše ka tše di lego gona, di neeleng bona di bonwe ke diphuthego.

← Chapter 7 Jump to: Chapter 9 →