2 Corinthians 7

Sotho 1951 (BIBELE)

← Chapter 6 Jump to: Chapter 8 →

1Lena baratwa! Ge re holofedišitšwe dilo tšeo, gona a re hlapeng re tšwe tšhala tšohle tša nama le tša moya, re phethe kgethego ya rena re boifa Modimo.

2Re katološetšeng dipelo. Ga ra rumola motho, ga ra senyetša motho; ga ra hlakola motho.

3Ge ke bolela ga ke re ke sole motho. Ke šetše ke boletše ka re: Le mo pelong ya rena, wa go hwa mmogo, le go phela mmogo.

4Ke le holofetše gagolo; ke bile ke kgantšha lena. Khomotšo go nna e tletše, ke seloga lethabo mo ditlalelong tša rena tšohle.

5Go bjalo, le ge e sa le mola re fihla Matsedonia mebele ya rena e hloka khutšo, re tlalelwa gohle, ka ntle e le dintwa, ka teng e le poifo.

6Modimo Mohomotšababotlana o re homoditše ka go tla ga Tito.

7E be e se ka go tla ga gagwe fela; khomotšo e be e le ge a re anegela tša lena, a re botša tša tlhologelo ya lena le tša go lla ga lena, tsa ge le fišega ka baka la ka; ya ba gona ke thabago.

8Gobane le ge ka lengwalo lela ke le nyamišitše, ga ke šegame. Le ge nka be ke šegame ka go bona ke le nyamišitše, le ge e ka ba lebakanyana fela,

9bjale gona ke thabile, e se go thabela ge ke le nyamišitše. Ke thabela nyamo ya go le iša tshokologong, ya ge le nyamišitšwe ka mokgwa wo Modimo a o ratago, ge se re se dirilego e se be go fo le nyamiša.

10Gobane nyamo ye Modimo a e ratago e tliša tshokologo e išago phologong; ke nyamo ye e sa šegamišego. Nyamo ya lefase yona e tliša lehu.

11A nke le boneng tša nyamo ya lena: e le nyamo ye Modimo a e ratago, e tšweleditše mafolofolo a lena a makaakaa, le go itwela, le go hlaswa sebe, le go tšhoga, le go hlologelwa, le phišego, le go sola sebe, mo gohle la bonala le se na molato tabeng yeo.

12Sedioge! Mola ke le ngwalela e be e se go emela morumodi le ge e le morumolwa, e be e le gore mo go lena go bonagle bogale bja go ema le rena pele ga Modimo.

13Ke tšona tše di re homoditšego. Go homotšwa ke tšeo tša lena gwa tlala ka go thabela lethabo la Tito, gobane moya wa gagwe o lapološitšwe ke bolena ka moka.

14Anthe, mola ke kgantšha lena ke sa bolela le yena, ga ka foša. Boka ke rerešitše mola ke le botša ditaba ka moka, go rerefetše le tše ke bego ke le kgantšha ka tšona ke sa bolela le Tito.

15Bjale pelo ya gagwe e sekametše go lena gagologolo, ge a elelwa go kwa ga lena ditabeng tšohle mola le sa mo amogela ka poifo le ka go roromela.

16Ke thabile ka gobane nka le bota dilong ka moka.

← Chapter 6 Jump to: Chapter 8 →