Ecclesiastes 10

Sotho 1951 (BIBELE)

← Chapter 9 Jump to: Chapter 11 →

1Ntši tše hwilego di senya sehlare sa ngaka, sa bola, sa nkga. Le bošilo bjo bonyane bo roba bohlale le bokwala.

2Pelo ya mohlale e mo letsogong la gagwe le letona; ya setlatla e mo go la ntšogošo.

3Lešilo, le mo le yago, ga le tsebe selo; mme batho bohle le re ke mašilo.

4Ge pelo ya kgoši e ka go tsogela, o se tloge bodulong bja gago; go ikhomolela go alafa dibe tše dikgolo.

5Go sa na le bobe bjo ke bo bonego fa tlase ga letšatši, ke bošaedi, ge bo hlaga go bagolo.

6Bošilo bo dudišwa tletlolo le bagolo; bahumi ba dula kua tlase.

7Ke bone balata ba nametše pitsi, bakgoma ba akga dinao wa bahlanka.

8Moepamoreo, go tlo wela yena; kgatlollamorako o longwa ke noga.

9Mokgolamaswika o kgatlwa ke ona; mophaphi o kutlega ka legong.

10Wa rethefatša lepe wa lesa go lootša, se tlo go feletša maatla; bokaone go kgoneng bo tla ka bohlale.

11Ge noga e ka loma e sešo ya upiwa, moupi ga sa kgona selo.

12Mantšu a molomo wa mohlale a a tsefa; melomo ya lešilo e senya mong wa yona.

13Le thomile ka tša bošilo, la fetša polelo ka bogafa bjo bošoro.

14Lešilo le atiša dipolelo, mme motho a se tsebe se se tlogo dirwa. Ke mang a kago mmotša se se tlogo dirwa ge a ile?

15Modiro wa mašilo o wela beng ba wona, ka ge ba sa tsebe go tla motseng.

16Joo naga! O bušwa ke ngwana; bakgoma ba nyanya e sa le ka moswana.

17O wa lehlogonolo, naga! O bušwa ke morwa wa kgoši; bakgoma ba ja ka lebake; ke dinatla, ga se banwi.

18Tlhaka e pobela ka bobodu, e netha ka botšwa bja matsogo.

19Menyanya e dirwa gore go thabje; morara o thabiša ba phelago; mme lehumo le kgoniša tšohle.

20Kgoši se e roge le pelong ya gago; le lehumagadi se le roge le ge o le mo phapošing ya go robala; gobane ntšu la gago le ka tloga le nonyana ya godimo, radiphofa a go bega.

← Chapter 9 Jump to: Chapter 11 →