Ecclesiastes 6

Sotho 1951 (BIBELE)

← Chapter 5 Jump to: Chapter 7 →

1Go sa le bjo bongwe bošula bjo ke bo bonego fa tlase ga letšatši; mme bjona bo atile mo bathong.

2Ke ge motho yo Modimo a mo neilego mahumo le menono le bogolo, mme a se hloke le setee sa tše pelo ya gagwe e di kganyogago, ge yena yo Modimo a sa mo dumelele go ka di ja, tša lewa ke motho o šele. Tše bjalo ke lefela, ke bohloko bjo bogolo.

3Le ge motho a tswetše bana ba lekgolo, a phetše galelele, a atetšwe ke matšatši a bophelo, ge yena yo pelo ya gagwe e sa kgodišwe ke menono ya gagwe, a sa lokišetšwe lebitla, -- yo bjalo, nna ke re, kaone ke lefolotšana.

4Gobane lona le tla e le lefela, le boela leswiswing, mme leina la lona le khupetšwa ke leswiswi.

5Le gona ga lešo la bona letšatši, ga le tsebe, le phala yola ka bokaone.

6Yola, ge a ka phela nywaga e dikete tše pedi a sa bone tše dibotse, a ga ke re tšohle di ya felo gotee?

7Maitapišo ohle a motho ke a magolo; le ge go le bjalo, kganyogo ga e kgolwe.

8Se yo bohlale a holegago ka sona a feta setlatla ke eng? Sa mmotlana wa tsebo ke eng ge a swere ka tsela a bonwa ke ba phelago?

9Se se lego kaone ke go bona ka mahlo; go phala go iša kganyogo kgole. Le tšona tše ke lefela, ke go phuthela moya ka kobo.

10Tše di lego gona di reetšwe maina a tšona kgale, gwa tsebja se motho a lego sona; mme ga a kgone go sekiša yo a mo phalago ka maatla.

11Gobane go na le tše ntši tše di bolelwago tša atiša mafela, tše di sa holego motho selo.

12Gobane tše di holago motho bophelong bja lefela di tsebja ke mang? Matšatši a gagwe a sego makae ke a lefela, a feta bjalo ka thiti; mme ke mang a kago botša motho tše di tlogo tla fa tlase ga letšatši, ge a ile?

← Chapter 5 Jump to: Chapter 7 →