Ecclesiastes 12

Sotho 1951 (BIBELE)

← Chapter 11 Jump to:

1Gopola Mmopi wa gago o sa le yo mofsa, go sešo gwa fihla matšatši a mabe, go sešo gwa tla nywaga ye o tlogo re: Ga e na tše di nthabišago!

2E tla re mola letšatši le sešo la fifala moka gotee le seedi le kgwedi le dinaledi, ge go tlo boa maru mola pula e fetile.

3Baletangwako ge ba thothomela, banna ba maatla ge ba khokhoba, bašidi ba hloka modiro, go šetše ba se nene, go rotola baokamedi ba maroba,

4ge go tswalelwa dimati tša mojako, ge tšhilo e sa hlwe e kwala, go tsogwa ge go lla nonyana, baopi ba dikoša ba bobile.

5Mokonya ke ge o boifša, tsela e na le tše di šiišago, mohlare wa mokgoba o palegile matšobana; tšie ga e sa pharuma, motsefo wa senoko ga o sa kwelela. Ke tša mehla motho a eya ngwakong wa gagwe e lego wa neng le neng; baledi ba šetše ba potologa le mekgoba.

6Manti a lehumo ga a sa hlwe a tlema; sebjana sa bohlokwa se tla tloga se senyega; moeta o tla tloga o phumega kua nokeng, sego se gohlomela sedibeng.

7Lerole le boela fase mo le tšwago gona; moya o boela go Modimo e a o neilego motho.

8Joo lefela la mafela! O realo Mmoledi. Tšohle ke lefela!

9Mmoledi yo e be a le yo bohlale; le gona a ruta batho tsebo, e le moakanyi le mohlathi wa ditaba, mohlabi wa diema tše ntši.

10Mmoledi yo o lekile go hwetša mantšu a rategago, a ngwala mantšu a therešo ka go loka.

11Mantšu a bahlale ke magapeletši; le gona a etša dimapolo tše di kokoteletšwego felo gotee, tše di tlišitšwego ke modiši o tee.

12Le gona, ngwanaka! A nke ke go eletše. Tša go ngwala mangwalo a mantši ga di fele; mme go ithuta tše ntši go lapiša mmele.

13A re kweng phethego ya ditaba tšohle: Boifa Modimo, o lote taelo tša gagwe. Ke se se swanetšego batho bohle.

14Gobane mediro ka moka, le dithopa tšohle, tše dibotse le tše mpe, Modimo o tlo di iša tshekong.

← Chapter 11 Jump to: