Isaiah 11

Sotho 1951 (BIBELE)

← Chapter 10 Jump to: Chapter 12 →

1Lehlogedi le tlo hloga thitong ya Isai; lekala le le tšwago mo modung wa gagwe le tlo enywa.

2Moya wa Morena o tlo dula mo go yena, e lego moya wa bohlale, le wa tlhaloganyo, moya wa keletšo le wa maatla, moya wa tsebo le wa go šia Morena.

3Go šia Morena go tlo mo kgahla; a ka se ahlole ka mo mahlo agwe a bonago; a ka se ripe taba ka mo tsebe tšagwe di kwilego.

4O tlo ahlolela babotlana ka go se hlaole motho, bahlaki o tlo ba emela ka go loka; lefase o tlo le otla ka kgati ya molomo wagwe, a bolaye e mobe ka moya wa molomo wagwe.

5Mohlantšhu wa gagwe e tlo ba toko, mme therešo o tlo itlema letheka ka yona.

6Phiri e tlo dula le kwanyana; nkwe e tlo hutama le putšanyana; namane le tau le pholo di tlo dula felo gotee, di gapše ke mošemanyana.

7Namagadi le tautshadi di tlo fula gotee, bana ba tšona ba hutame mmogo; mme tau e fula bjang boka kgomo.

8Ngwana e monyenyane o tlo bapala moleteng wa marabe; wa go tshwa letswele o tlo kgwathiša ihlo la mokopa ka seatla.

9Go ka se hlwe go dirwa dibe, go ka se hlwe go senywa mo go fela dithabeng tše kgethwa tša ka, gobane go tseba Morena go tlo tlala fase lohle boka meetse ge a nabile lewatleng.

10Mehleng yeo lehlogedi la modu wa Isai le tlogo tsengwa sefoka sa ditšhaba, le tlo nyakwa ke bantle, mme bodulo bja lona e tlo ba letago.

11Mehleng yeo mong a bohle o tlo buša a emiša atla sagwe, a rekolola mašalela a setšhaba sagwe a a šaletšego kua Asuri le kua Egipita, kua Patorose le kua Kuše le Elama, le kua Sineara le Hamathe le dihlakehlakeng tša lewatle.

12Ke mo a tlogo tsemela bantle sefoka; mme balelekwa ba Isiraele, le ba Juda ba ba thosanego, o tlo ba kgoba ba boa dithokong tše nne tša lefase.

13Ke mo go tlogo fela tseba ya Efuraimi, gwa tlo fedišwa ba go pateletša Juda. Efuraimi a ka se hlwe a hufegela Juda; mme Juda a ka se hlwe a pateletša Efuraimi.

14Ba tlo fofa ba ya bodikela, ba tsokama magetleng a Bafilisita; ba tlo lakana ba yo thopa ba bohlabatšatši, ba tlo tšea la Edomo le Moaba; gomme Baamoni e tlo ba balata.

15Leleme la lewatle la Egipita Morena o tlo le gopiša; noka ya gona o tlo e emišetša tsogo lagwe, mme ka maatla a moya wa gagwe o tlo e palakanya ya tšwa nokana tše di šupago, tša go tlo selwa go rwelwe dieta.

16Ke mo mašalela a tšhaba sagwe, a go šadišwa ke Asuri, a tlogo ba le tselakgolo, e etšago yela ya Isiraele mehleng ya ge ba etšwa nageng ya Egipita.

← Chapter 10 Jump to: Chapter 12 →