Isaiah 58

Sotho 1951 (BIBELE)

← Chapter 57 Jump to: Chapter 59 →

1Goeletša o tseremetše; o se itšimeletše; hlaba mokgoši boka phalafala, o botše tšhaba sa ka dikarogo tša sona, ba leloko la Jakobo o ba botše dibe tša bona.

2Nna ba mpotšiša ka matšatši ba rato tseba tsela tša ka, bjalo ka setšhaba sa go ya ka toko, se se sa kago sa lahla moahlolelo wa Modimo wa sona; go nna ba kgopela go ahlolewa ka go loka, ba rata ge Modimo a etla kgauswi.

3Ba re: O reng o sa re bone ge re ikona dijo? O reng o sa re tsebe ge re itshetla dipelo? -- Hleng mohla le ikona le nyaka tše lena le di ratago, le fišegelwa boipabalelo.

4Hleng le ikona dijo ka go tsoša tshele le dikgang, le kgitlana ka matswele ka mokgwa o šoro. Ga le sa ikona wa mohla wa go fihliša lentšu godimong, gore le yo kowa gona.

5A ke gona go ikona go kago kgahla nna? -- Tšatši le la go itlhokofatša, motho a kgothula hlogo boka seako sa bjang, a lala moloreng, a apara lenkgeretla? A ke tšona tše le rego ke go ikona, ke tšatši la go kgahla Morena?

6A ga ke re go ikona go kgahlago nna ke go hunolla ba ba tlemilwego ba se ne molato, wa kgaola ditlemo tša joko, wa thokga dijoko ka moka?

7Ka kgonthe, ke ge o ngwatha bogobe bja gago wa nea e a kwago tlala, ge babotlana le balahlegi o ba iša ka lapeng la gago, wa bona mohlobodi wa mo apeša, wa se gerule yo e lego motho ka wena.

8Ke mo seedi sa gago se tlogo hlaba bjalo ka mahuba, ke mo o tlogo fola ka pela, o etilwe pele ke toko ya gago, o šetšwe nthago ke letago la Morena.

9Ke mo o tlogo mmitša a araba; Ge o goeletša, o tlo re: Ke nna e! Ge mo go lena o ka tloša joko e boima, le go omeletša, le ditshele,

10E a kwago tlala a go hwetša o le yo botho, o horiša pelo ye e lapilego, ke mo seetša sa gago se tlogo hlaba leswiswing; leswiswi la gago la ba bjalo ka mosegare.

11Ke mo Morena a tlogo go hlahla ka mehla, a go horiša le šokeng, a tiiša ditho tšago, wa tlo etša serapa se nošetšwago, wa tlo etša sediba sa meetse a sa gopego.

12Bana bago ba tlo tsoša marope a bogologolo, ba tlo aga ka metheo ya meloko le meloko; ba tlo re o mothibadikgero, motsošaditselagwaagwa.

13Ge o ka khutšiša nao ka Sabatha, ka tšatši le lekgethwa la ka, wa lesa tše di kgahlišago wena, la Sabatha wa re le monate le kgethetšwe go reta Morena, mme wa mo godiša, wa lesa mediro le tsela tša gago, wa lesa go tsoma mathabo le go ikeka le ditaba.

14Ke mo o tlogo natefelwa Moreneng; ke mo ke tlogo go phagamiša dithoteng tša naga; ka go leša bohwa bja Jakobo tatago. Molomo wa Morena o itšalo.

← Chapter 57 Jump to: Chapter 59 →