Isaiah 37

Sotho 1951 (BIBELE)

← Chapter 36 Jump to: Chapter 38 →

1Kgoši Hiskia ge a ekwa tšeo, a gagola diaparo tša gagwe, a ya Ngwakong wa Morena.

2A roma Elyakima molaki wa mošate, le Sebena mongwadi, le bagolo ba baperisita, ba ya go Jesaya morwa wa Amotsi ba apere mankgeretla,

3Ba tla ba re: Hiskia o re: Lehono ke la tlalelo, ke la go rogwa le go gobošwa; ke “Ngwana o kgauswi, go hlaela maatla a pelego.”

4Mohlongwe Morena Modimo wa gago o kwile tše Rabasake a di boletšego a romilwe ke mong wa gagwe kgoši ya Asuri, a goboša Modimo e a phelago ka maroga; Morena Modimo wa gago le yena o a kwele. Bjale hlatloša thapelo ya go rapelela mašalela a sa lego gona.

5Bahlanka ba kgoši Hiskia ba tlile go Jesaya,

6Yena a fetola a re: Botšang mong wa lena le re: Morena o re: O se ke wa tšhoga mantšu a o a kwelego, ao bahlanka ba kgoši ya Asuri ba nkgobošago ka ona.

7Se nna ke tlogo se dira sese: Ke tlo roma moya wa ka, mme o tlo kwa modumo, a boela nageng ya gabo; gona kua nageng ya gabo ke tlo mo tekola ka lerumo.

8Bjale Rabasake ge a goma, a kwa ge ba re: Kgoši ya Asuri o gometše motse wa Lakisi, a mo hwetša a hlabana le motse wa Libina.

9O be a sebetšwe gore Thirihaka kgoši ya Kuše o tšwile dira, o tla go hlabana nago. A re go di kwa, a romela batseta go Hiskia, a re:

10Botšang Hiskia kgoši ya Juda le re: Se forwe ke Modimo wa gago yo o mmotilego wa re: Jerusalema go ka se gafelwe diatleng tša kgoši ya Asuri.

11Hleng le wena o kwele tše dikgoši tša Asuri di di dirilego dinago ka moka, ya ba digafiwa moka. A o re o ka phologa?

12Ditšhaba tše botate ba di feditšego a medimo ya tšona e di phološitše? Gosana le Harane le Retsefe, le ba Edene la ba Thelasara?

13E kae kgoši ya Hamathi, le kgoši ya Arapadi, le kgoši ya motse wa Sefarafaima, le Hena le Ifa?

14Hiskia a amogela mangwalo diatleng tša batseta, a a bala; a napa a rotogela Ngwakong wa Morena, a a phutholla pele ga Morena.

15Gomme Hiskia a le pela ga Morena a rapela a re:

16Morena Modimo wa Isiraele, Kokama Bakerubi, o Modimo o nnoši wa mebušo gohle ya lefase. Ke wene o dirilego legodimo le lefase.

17Morena, o ko sekege tsebe o kwe, lebeleša o bone! Kwaa mantšu, a Sanheribe a a rometšego go goboša Modimo a phelago.

18Morena, ke go rereša, dikgoši tša Asuri di sentše ditšhaba le dinaga tša tšona.

19Medimo ya tšona o e lahletše mollong, gobane e be e se medimo, e le mediro ya diatla tša batho, e le dikota le maswika, ba kgona go e fediša.

20Bjale, Morena Modimo wa rena, re phološe seatleng sa gagwe, mebušo yohle ya lefase e tle e tsebe gobane Modimo ke wene Morena o nnoši.

21Ke mo Jesaya morwa wa Amotsi a romilego motho, a tla a botša Hiskia a re: Morena Modimo wa Isiraele o re: Tše o nkgopetšego tšona ka baka la Sanheribe kgoši ya Asuri ke di kwele.

22Sele lentšu le Morena a mmoletšego ka lona; o re: Mosetsana e, ngwanenyana wa Tsione, o a go nyatša, o a go sega. Ngwanenyana wa Jerusalema o go šišinyetša hlogo.

23Ke mang yo o bego o mo fotlela? Ke mang yo o mo rogilego? Ke mang yo o mmoletšego ka mašata? Yo o bego o mo khutlolela mahlo ke Mokgethwa wa Isiraele.

24Wa roma batseta wa kwera Mong a bohle wa re: Ke namela thaba ka bontši bja koloi, ke tsena gare ga dithaba tša Libanoni ke reme merokwana e metelele le matsaka a megobogobo, wa re: Ke namela ntlheng ya thaba, mo tšhemong ya gagwe ya sethokgwa.

25Wa re: Ke fatile ka nwa meetse, ke gopiša noka tša Egipita ka lwao la ka.

26A ga wa ka wa kwa? Dilo tše di dirwa ke nna, di phethiwa ke nna go tloga ka mehla ya kgalekgale; ka di tliša bjale ge wena o šwalalanya metse ya dibo ya ba mekgobo ya marako.

27Ke ka baka leo beng ba yona ba rephago ditho, ba tšhoga ba galoga boka ngwang tšhemong, ba etša mahlogedi a manana, le bjang godimo ga morako, ba etša mabele a hwago ka phori a sešo a tswala.

28Mo o dulago, le mo o tšwago, le mo o yago, ke a go tseba, le mo o nthumotšego.

29Bjale ka gobane o nthumotše ka kwa ka ditsebe o itheta, ke tlo go tsenya mogala nkong, ka tlema molomo wa gago ka lerala la ka, ka go gomiša ka tsela ye o tlilego ka yona.

30Sešupo se wene Hiskia o tlogo di bona ka sona sese: Lenyaga go tlo lewa di imedišago; išago go tlo lewa makgwakgwa; ka ngwaga wa boraro le tlo bjala le be le bune. Le tlo lema rapa tša merara la ja dienywa tša tšona.

31Gobane ba moloko wa Juda ba ba tlo go phonyokga ba šala, ba tlo boela ba hlaba medu ba mela ba bea dienywa.

32Gobane mašalela a tlo tšwa Jerusalema, ba ba phonyokgilego ba tlo tšwa thabeng ya Tsione. Ke tše Morena a pelofaletšego go di dira.

33Gobane tše Morena a bolelago kgoši ya Asuri ka tšona šedi: A ka se tsene motseng wo; a ka se betše mosebe wa fihla go wona; a ka se batamele ka dikotse; a ka se o rakelle.

34O tlo goma ka tsela ye a tlilego ka yona; a ka se tsene fa motseng! Morena o realo.

35O re: Motse wo ke tlo o šireletša, ke tlo o phološa ka baka la leina la ka, le ka baka la Dafida mohlanka wa ka.

36Gomme bošego bjoo gwa tšwa Morongwa wa Morena, a tla mešašeng ya Baasuri a bolaya banna ba dikete tše lekgolo le nago le masome a seswai a metšo e mehlano. Ge ka moswana ba tsoga, ba bona ditoto mo go fela.

37Sanheribe kgoši ya Asuri a tloga, a goma, a boela gae kua Ninife.

38Ya re a sa khuname ngwakong wa Nisiroko modimo wa gagwe, barwa ba gagwe, Adirameleke le Saretsere, ba mmolaya ka tšhoša, ba tšhabela nageng ya Ararate; bogoši bja tšewa ke Asarahadoni morwa wa gagwe.

← Chapter 36 Jump to: Chapter 38 →