Isaiah 5

Sotho 1951 (BIBELE)

← Chapter 4 Jump to: Chapter 6 →

1A nke ke binele mogwera wa ka koša ya moratwa wa ka, ya tšhemo yagwe ya merara. Mogwera wa ka o ne tšhemo ya merara mmotong wa mobu o bogale.

2A e lema, a epola mabje, a šema merarasešifa; a aga sethala ka gare; a dira bofotlelo; a holofela a re e tlo enywa tlhatlha tša morara, mme ya bea megwelema.

3Bjale ahlolang, baagi ba Jerusalema, lena banna ba Juda; taba ya ka še ya tšhemo ya ka.

4Se se kago dirwa tšhemo ya ka ya merara e ka bang, se ke sa kago ka se dira? Go ya kang ge e beile megwelema, mola nna ke lebeletše tlhatlha tša morara?

5Lesang ke le botše se ke tlogo se dira tšhemo ya ka ya merara. Legora la yona ke tlo le tloša, ya tlo ba ya go lewa; morako wa yona ke tlo o phušola, e tle e gatakanywe.

6Ke tlo e lesa ya ba hlaga, e sa hlwe e thenwa; e tlo ba ya go mela metlwa le ditshehlo; le maru ke tlo a iletša go e nešetša pula.

7Šidio gee! Tšhemo ya merara ya Morena ke moloko wa Isiraele. Banna ba Juda ke temo ye a e ratilego. O be a re go tlo iwa ka molao, mme ya ba polao; o be a holofetša bolo, mme ya ba malla.

8Kotsi e tlo wela bao ba go ikolela mantlo, ba go amoga ba bangwe mašemo, gwa ba gwa hlokwa temelo, lena la šala le le beng ba naga le nnoši.

9Tsebeng tša ka go kwetše tše Morena wa mašaba a di boletšego a re: Ka kgonthe mantlo a mantši ao e tlo ba marope; le ge e le tše kgolo le tše botse, di ka se dule motho.

10Le gona tema tše lesome tša dirapa tša merara di tlo tšwa kgamelo e tee; peu ya seroto setee, e tlo tšwa ntlatla e tee.

11Kotsi e tlo wela ba go tsogela go yo nyaka bjalwa, ba bo dulela la ba la dikela ba tagilwe.

12Menyanyeng ya bona ba swere diletšo le makope, le meropa le dinaka; mme tiro tša Morena ga ba di šetše selo; mediro ya atla tša gagwe, ga ba e bone.

13Ke tšona tše di tlogo iša tšhaba sa ka bothopja ka go se be le tsebo; bahumi ba sona ba tlo hwa ka tlala; makoko a sona a tlo kgalega ka lenyora,

14Molete wa bahu wa di bona wa kganyoga ka kudu, wa ahlama molomo wa go se gome, gore go kodumele letago la motse, le makoko a wona, le mašata a wona, le ba a thabetšego.

15Yo e lego motho fela o tlo inamišwa, yo e lego monna o tlo kokobetšwa; mahlo a baipoti a tlo ribamišwa.

16Yo a tlogo phagama ka kahlolo yeo ke Morena wa mašaba. Yena Modimo e mokgethwa o tlo bonala bokgethwa ka ge a sa hlaole motho kahlolong.

17Go tlo šala go fula kwanyana, e le mafulo a yona; megola ya bahumi e tlo lewa ke bafeti.

18Kotsi e tlo wela ba go ikgogela bokgopo ka thapo ya maaka, ba go goga dibe e ke ba di goga ka lerala la koloi,

19Ba ba rego: A a hlaganele a dire modiro wa gagwe ka pela, re tle re o bone; a go tšwelele go tle tše Mokgethwa wa Isiraele a di rerilego, re tle re di tsebe.

20Kotsi e tlo wela ba ba rego bobe ba re ke botse, mme botse ba re ke bobe; ba ba beago leswiswi ba re ke seetša; seetša ba re ke leswiswi; se se galakago ba re ke se bose, se bose ba re se a galaka.

21Kotsi e tlo wela ba ba itshemago ba bohlale, ba re re ne tlhaologanyo.

22Kotsi e tlo wela bagale ba go nwa sebela, ba go hlalefela go hudua bjalwa,

23Ba go lopolla sesenyi ba bone tsogolekobong, moloki ba mo senyetša toko ya gagwe.

24Ke wona molato woo modu wa bona ge o bodile, letšoba la bona le hlohlorega, gwa tlo etša mola kgabo ge e fiša hlaga, mollo ge o fetša bjang; ka gobane ba lahlile Morena wa mašaba, ba nyaditše tše Mokgethwa wa Isiraele a di boletšego.

25Bogale bja Morena ge bo tuka, molato ke wona woo; setšhaba sa gagwe o se emišetša tsogo lagwe a se otla; dithaba di a šišinyega, ditoto mekgotheng di tletše wa maudi. Le ge go le bjalo bogale bja gagwe ga bo ešo bja phohla, letsogo la gagwe le sa emišitšwe.

26Ditšhaba tša kgole o tlo di tsemela sefoka; o bitša sa kua mafelong a lefase. Sese, se hlaganela go tla ka lebelo.

27Ga se na wa go lapa; ga se na wa go hlotša; ga se na e a otselago; ga se na wa serokoroko; ga se na wa mohlantšhu wo o kago tlemologa; ga se na wa go kgaogelwa ke lerala la seeta.

28Mesebe ya bona ke e boelo; mara a bona a ngangegile; tlhaku tša dipitsi tša bona ke tše thata boka tšhilo; maotwana a koloi tša bona a ka disesedi.

29Ba tla ka legowa la ditau; ba bopa boka tau ya ledumaedi, e re go bopa ya swara ya goga, go se be le monamoledi.

30Tšatši leo e tlo ba la modumo wa lewatle ka bona; mme lefase le tlo bona e le la leswiswi le le tlaletšago, seetša se fifetše ka boso bja lona.

← Chapter 4 Jump to: Chapter 6 →