James 2

Sotho 1951 (BIBELE)

← Chapter 1 Jump to: Chapter 3 →

1Bana bešo! Tumelo ya go dumela Jesu Kriste Mong wa rena wa letago, ga le nayo ge le sa fela le beba batho.

2Ge phuthegong go tsena monna wa dipalamonwana tša gauta a apere tše di phadimago, gwa tsena le modiitšana wa kobo e tšhilafetšego,

3mme la bona eo wa diaparo tše di phadimago la re: Wena dula fa gabotse, mme modiitšana la bolela nae la re: Ema moo, goba la re: Dula fa fase bogatong bja nao tša ka!

4a e ka se be go re le bebile batho? A ga se go re le baahlodi ba kgopolo tše mpe?

5Kwang, lena bana bešo barategi! A Modimo ga a ka a ikgethela badiitšana ba lefase ya ba bona bahumi tumelong le baji ba bohwa bja mmušo wo a o holofedišitšego ba ba mo ratago?

6Mme lena le nyaditše modiitšana. A bahumi ga se bona ba go le gogela ditshekong?

7A ga se bona ba ba nyatšišago ina le lebotse leo go ipolelwago ka lona mo go lena?

8Bjale ge le phetha molao e lego wona mong a melao ge re ya ka Mangwalo, molao wo o rego: Wa geno o mo rate ka mokgwa wo o ithatago ka wona, la dira gabotse fao,

9la tloga la beba batho difahlogo, le dira sebe fao, mme Molao fao o le sola boka baarogi.

10Gobane e a yago ka melao yohle, a tla a senya o tee, o obile molato go Molao wohle.

11Gobane e a itšego. O se ke wa otswa, ke yena e a itšego: O se ke wa bolaya! Bjale ge o se seotswa, wa tla wa ba mmolai, o mosenyi wa Molao.

12Bolelang ka mokgwa woo, le dire ka mokgwa woo, ka ge le le ba go tlo sekišwa ka molao wa khunologo.

13Gobane tsheko ga e gaugele eo wa go se gaugele; gomme kgaugelo ke yona e fenyago tshekong.

14Bana bešo! Go holang ge motho a ka re o na le tumelo, mola a se na mediro? A tumelo yeo e ka mo phološa?

15Ge ngwaneno, le ge e le kgaetšedi, e ka ba o hlobotše, a hloka dijo tša mohla woo,

16mme e mongwe wa lena ge a ka tla a re: Sepelang ka khutšo, le yo apara, le yo hora, mme la lesa go ba fa se se hlokwago ke mebele ya bona, go ka be go ba holang?

17Le tumelo ge e le ya mohuta woo, ge e se na mediro, e ikhwetše ka noši.

18Ge go ka ba le e a rego: Wena o na le tumelo nna ke na le mediro, ntaetše tumelo ya gago e se nago mediro, nna ke go laetše ya ka tumelo ka mediro.

19A o re o dumela ge Modimo e le o tee? O dira gabotse; fela, le meoya e mebe e dumela fao ya roromela.

20Gomme wena motho wa lefela, a o rata go tseba gore, tumelo ge e se na mediro e ikhwetše?

21Šoo Aborahama tata wešo; a ga a ka a lokafala ka mediro mola a bea Isaka morwa wa gagwe aletareng?

22Ke mo o bonago gore tumelo e dirišana le mediro ya gagwe, tumelo ya tlala ka mediro.

23Ke gona moo go diregilego tše di ngwadilwego tša re: Aborahama o dumetše Modimo, Modimo a mmalela tumelo a re ke yona toko, mme Aborahama a bitšwa moratiwa wa Modimo.

24Ke mo le bonago gore motho o lokafala ka mediro, e sego ka tumelo e nnoši.

25Le go Rahaba mosadi yola wa seotswa go dutše bjalo. A ga a ka a lokafala ka modiro ge a amogela batseta bala, mme a ba ngwegiša ka tsela e šele?

26Boka mmele ge e le o hwilego ge o se ne moya, le yona tumelo e hwile ge e se ne mediro.

← Chapter 1 Jump to: Chapter 3 →