James 4

Sotho 1951 (BIBELE)

← Chapter 3 Jump to: Chapter 5 →

1Dintwa le diphapang gare ga lena di tšwa kae? Mo di tšwago gona šefa: A ga se dikganyogong tša lena di lošanago mo dithong tša lena?

2Le a duma, la napa la hloka; le a bolaya mme le a galefa, la šitwa go fihlela selo; Le a katana mme le a hlabana, mme le se tšee selo ka ge le sa rapele.

3Le a rapela, mme ga le fiwe selo, ka ge le rapela ka mokgwa o mobe, le kgopela tše le ratago go di tšitlanya le eya le dikganyogo tša lena.

4Lena diotswa tenang! A ga le tsebe gore lerato la lefase ke go direla Modimo bonaba? E a ratago go gwerana le lefase, o itira lenaba la Modimo.

5A le re Mangwalo a bolela lefela? Moya wo o agilego mo go rena o hlologetšwe wa lehufa.

6O re setša ka kgaugelo ye e fetišago, gobane go thwe: Modimo o lwa le baikgodiši; ba go ikokobetša o ba setša ka dikgaugelo.

7Lobang ge le bušwe ke Modimo; Le lwe le diabolo, mme o tlo le tšhaba.

8Batamelang Modimo, le yena a le batamele. Hlapang diatla, lena Badiradibe! Hlapišang dipelo, lena ba pelopedi.

9Iponeng bobotlana, le hlokofale le lle. Ditšhego tša lena a di fetoge nyamo; thabo ya lena e fetoge tlhokofalo.

10Ikokobetšeng pele ga Morena; ke mo a tlogo le godiša.

11Le se ke la pharana, bana bešo! E a pharago ngwanabo, e a solago ngwanabo, o nyatša Molao, o sola Molao. Gomme ge o sola Molao, ga o modiri wa Molao, o mosodi wa wona.

12Mmei wa Molao ke o tee; Mosodi ke yena. Ke yena a kgonago go phološa le go fediša. Mme o mang, wena o solago?

13Eriyeng, lena ba le rego: Lehono, le ge e le ka moswana, re tlo ya motseng wa bokete, ra yo dula gona ra fetša ngwaga, ra šaba ra rua.

14Le realo le sa tsebe tša ka moswana. Le gona bophelo bja lena ke eng? E fo ba kgodi ye e bonalago lebakanyana fela ya tloga e široga.

15Go kaone ge le ka re: Ge Morena a rata ra phela, re tla dira tše le tšela.

16Gomme bjale le kgantšha boikgogomošo. Boikgantšho bjoo ke bjo bobe ka moka ga bjona.

17Bjale, motho e a tsebago botse bjo a kago bo dira, mme a se bo dire, o oba molato wa sebe.

← Chapter 3 Jump to: Chapter 5 →