James 3

Sotho 1951 (BIBELE)

← Chapter 2 Jump to: Chapter 4 →

1Bana bešo, go se ke gwa ata ba ba ratago go ba baruti; Le tsebe gobane ke bona ba ba tlogo sekišwa go fetiša ba bangwe.

2Re ba go foša gantši ka moka ga rena. Ge go ka ba le e a sa fošego ka leleme, yena eo ke monna yo bolo ka tlalo, e a kgonago go buša mmele wa gagwe ka moka ka mogala.

3Ge dipitsi re di lokela megala maganong, re direla gore di kwe, re di buše mebele ka moka.

4Bonang maselawatle, le ge e le a magolo, gomme ge a išwa ke diphefo tše maatla, a bušwa ke lematsana le lenyenyane a išwa mo go ratago mosepediši wa ona.

5Le leleme ke sethwana se senyenyane, mme le itheta ka tše kgolo. Bonang mollo o monyenyane o ka tšhuma lesodi le lekaakang?

6Leleme le lona ke mollo; ke legohle la bokgopo. Leleme mo gare ga ditho tša rena e ba lona le le tšhilafatšago mmele ka moka; le tšhuma mollo tseleng ya bophelo bja rena le tšere mollo wa lona helleng.

7Ge e le diphoofolo, le dinonyana, le digagabi, le tša lewatleng, ka mo di bopilwego ka gona di a thapišwa, di bile di thapišitšwe ke setho se motho a bopilwego a ne le sona.

8Leleme lona, mo go batho ga go e a kago kgona go le thapiša; lešaedi leo le padile, le tletše bohlwele bjo bo bolayago.

9Ka lona re reta Modimo Tata wešo, ka lona re roga batho ba ba bopilwego ya ba seswantšho sa Modimo.

10Molomong o tee go tšwa tšhegofatšo le lehlapa. Bana bešo! Ga go a swanela ge go le bjalo.

11Afa sediba se ka seloga meetse a bose le meetse a babago ka mothopo o tee?

12Bana bešo! A mogo o ka enywa tlhware? A morara o ka enywa mago? Le sediba sa meetse a letswai ga se tšwe meetse a bose.

13Yo bohlale wa tlhaologanyo ke mang mo gare ga lena? O tla bonagala ka mekgwa e botse, le ka mediro ya gagwe, ka bokwala bja mohlale.

14Fela, ge le galakelwa ke mona, le le ba dipelo tša mereba, le se ke la aketša la kgantšha therešo.

15Bohlale bja mohuta woo ga bo tšwe godimo; ke bja lefase ke bja nama, ke bja moyamobe.

16Gobane mo go nago le kgalefo le mereba, ke mo go nago le pherekano le mediro e mebe ka moka.

17Ge e le bohlale bjo bo tšwago godimo, sa pele mo go bjona ke go ila tšhila, sa bobedi ke kgoši le bonolo; bo na le go kwa, bo humile kgaugelo le dikenyo tše botse; ga bo bebe motho, ga bo na bomenetša.

18Peu ya go enywa toko e bjalwa ke badirakhutšo mo go lego khutšo.

← Chapter 2 Jump to: Chapter 4 →