James 5

Sotho 1951 (BIBELE)

← Chapter 4 Jump to:

1Eriyeng, lena bahumi! Llang le golole ka baka la ditlhokofalo tše di tlogo le wela godimo.

2Mahumo a lena a bodile. Dikobo tša lena di llwe ke tshwele.

3Gauta ya lena le silifera ya lena di llwe ke makgalwa; gomme makgalwa a tšona a tlo le bega; a tlo tšhuma mebele ya lena bjalo ka mollo. Le kgobetše mahumo mehleng ya bofelo.

4Tsebang gore moputso wo le o kunnego badiri ba go le bunela mašemo a lena o a goeletša; mme dillo tša babuni di fihlile ditsebeng tša Morena wa mašaba.

5Le ipheletše lefaseng ka mabose le ka maipshino; le horišitše dipelo tša lena boka mohla go hlabilwe kgomo.

6Moloki le mo tšwile la mmolaya, yena a sa lwe le lena.

7Bana bešo! Le se feleng pelo Morena a be a fihle. Bonang molemi ge a letela dienywa tše di rategago tša lefase, ga a di felele pelo, tša ba tša fiwa pula ya tsheola le ya selemo.

8Le lena se feleng pelo. Tiišang dipelo tša lena, gobane go tla ga Morena go kgauswi.

9Le se ke la tsotana, gore le se tlo sekišwa; le tsebe gore Moahlodi o eme mojako.

10Tšeang ka mohlala wa baporofeta ba ba boletšego ka Leina la Morena, mohlala wa go kgotlelela le wa go se fele pelo.

11Hleng re re: Ba lehlogonolo ke bakgotleledi! Kgotlelelo ya Jobo le e kwele. Pheletšo ya Morena le e bone; gobane Morena ke wa dikgaugelo tše ntši, ke yo pelotlhomogi.

12Se segolothata, lena bana bešo, le se ke la ena, le ge e le ka legodimo, le ge e le ka lefase, le ge e le ka keno ye nngwe. “E” ya lena a e be “E”; “aowa” ya lena a e be “aowa”, gore le se tlo sekišwa.

13Ge e mongwe wa lena a le mahlokong, a rapele. Ge e mongwe a thabile, a opele difela.

14Ge e mongwe wa lena a babja, a bitše bagolo ba phuthego, ba tle ba mo rapelele ba mo tlodiše makhura leineng la Morena.

15Mme thapelo ya tumelo e tlo phološa molwetši. Morena o tlo mo tsoša; ge a dirile dibe o tlo lebalelwa.

16Ipoleleng sebe seng sa lena; le rapelelane gore le fodišwe. Thapelo e maatla ya moloki e kgona go dira tše kgolo.

17Eliya e be e le motho e a fokolago boka rena; gomme o kile a rapela a re pula a e se ke ya na; mme gwa feta nywaga e meraro le dikgwedi tše di seletšego go sa ne pula lefaseng.

18A boela a rapela, mme legodimo la neša pula, lefase la mediša dienywa tša lona.

19Bana bešo! Ge e mongwe wa lena a ka timela a arogana le therešo, e mongwe a a mmušetše go yona,

20a tsebe gore e a gomišago modiradibe tseleng ye a timetšego ka yona, o phološa moya wa motho eo lehung, mme o apeša bontši bja dibe.

← Chapter 4 Jump to: