Judges 11

Sotho 1951 (BIBELE)

← Chapter 10 Jump to: Chapter 12 →

1Bjale Jefeta, monna wa ga Gileada, e be e le mogale, e be e le ngwana wa mosadi wa seotswa; tatagwe e be e le Gileada.

2Gomme mosadi wa yena Gileada eo, o be a mmelegetše barwa. Barwa bao ba re go gola, ba leleka Jefeta, ba re: O ka se ke wa ja bohwa le rena mo lapeng la tatawešo, ka gobane o ngwana wa mosadi o šele.

3Jefeta a tšhaba bana babo, a ya a aga nageng ya Tobe, a bothegelwa ke banna ba lonya, mme ba tšwa nae ba hula.

4Gwa tla mehla yeo ya ge Baamoni ba hlabana le Baisiraele.

5Gomme ge Baamoni ba sa fela ba hlabana le Baisiraele, bagolo ba Gileada ba ya ba bitša Jefeta kua nageng ya Tobe.

6Ba mo kgopela ba re: Tlaa o be ketapele ya rena, re hlabane le Baamoni.

7Jefeta a fetola a rera ba bagolo ba Gileada a re: A ga se lena ba le ntlhoilego la nteleka lapeng la tate! Le reng ge le tlaletšwa la tla go nna?

8Bagolo ba Gileada ba fetola ba re: Re tlile ka baka leo go wene, gore o sepele le rena, re yo hlabana le Baamoni, gomme wena o tle o be mokgoma wa rena, wa bohle ba ba agilego Gileada.

9Jefeta a fetola a re: Ge le re ke boe, ke yo hlabana le Baamoni, gomme ge Morena a ka ba gafela nna, a ke mo ke tlogo ba mokgoma wa lena?

10Ba bagolo ba Gileada ba fetola ba re: Hlatse ya rena ke Morena; re tlo dira se o se bolelago.

11Ke mo Jefeta a sepetšego le ba bagolo ba Gileada, gomme setšhaba sa mmea a ba mokgoma le moetapele. Ditaba tše ka moka tša gagwe Jefeta o di phethile a le motseng wa Mitsipa pele ga Morena.

12Bjale Jefeta a roma batseta ba ya go kgoši ya Baamoni, a re: O na le taba mang le nna ge o ntšwela dira wa tla fa nageng ya ka?

13Kgoši ya Baamoni ya fetola e botša batseta ba Jefeta ya re: Baisiraele mola ba rotoga ba etšwa Egipita, ba tšere naga ya ka go tloga ka noka ya Arinoni go fihla ka noka ya Jaboko le ya Jorodane; bjale e bušetše go nna go se ne ntwa.

14Jefeta a boela a roma batseta, ba ya go kgoši ya Baamoni;

15Ba fihla ba re: Jefeta o re: Ga se Baisiraele ba ba tšerego naga ya Bamoaba, le ge e le naga ya Baamoni.

16Hleng mola Baisiraele ba rotoga ba etšwa Egipita ba tšwile ka šokeng ba tla Lewatleng la mahlaka, ba tla Kadese,

17ba roma batseta ba ya go kgoši ya Edomo ba re: Anke re lese re phatše naga ya gago ka bogare. Kgoši ya Edomo ya gana. Ba roma batšeta ba ya go kgoši ya Moaba; le yona ya gana. Ke moka Baisiraele ba dula Kadese,

18Ba boela lešokeng ba dikologa naga ya Edomo, ba tla Moaba; ba šika naga ya Moaba ka thoko ya bohlabela, ba ba ba bokana mošola wa noka ya Arinoni; ba se ke ba sela mellwane ya Maoba; ka gobane Arinoni e be e le mollwane wa Moaba.

19Baisiraele ba roma batseta ba ya go Sihoni kgoši ya Baamoro, kgoši ya Hesiboni, ba re: A nke o lese re phatše naga ya gago ka bogare, re fihle mo re yago.

20Sihoni a se ke a holofela Baisiraele, a naga ge ba gata naga ya gagwe; a ba a rapa batho ba gagwe, ba bokana Jatsa ba tšwela Baisiraele dira.

21Gomme Sihoni le batho ba gagwe, Morena Modimo wa Isiraele o ba gafetše diatleng tša Isiraele ka moka ga bona. Ke mo Baisiraele ba tšerego naga ye ka moka ye Baamoro ba bego ba agile go yona.

22Ba tšea naga ka moka ye ya Baamoro go tloga ka noka ya Arinoni go fihla ka ya Jaboko, go tloga ka lešoka, go fihla ka noka ya Jorodane.

23Ke tšona tšeo. Morena Modimo wa Isiraele o rakile Baamoro ge go tla setšhaba sa gagwe sa Isiraele. Bjale wena o rata go ba amoga naga ye.

24Aga a ke re wena o tlo tšea naga ye o tlogo e fiwa ke Kamosi modimo wa gago? Gomme rena re tšere naga ya Morena Modimo wa rena a re filego yona ge re fihla.

25A o itshema go phala Balaka morwa wa Tsiporo kgoši yela ya Moaba? A yena o kile a sekišana le Isiraele a lwa le rena?

26Bjale ge go šetše go fetile nywaga e makgolo a mararo ya ge Baisiraele ba agile Hesiboni le metsaneng ya gona, le Aroere le metsaneng ya gona, le metseng ka moka e šikago le noka ya Arinoni, le reng le sa ka la ba amoga naga ye mehleng yeo?

27Gomme bjale ga o rumolwe ke nna; bošula bo dirwa ke wena ge o lwa le nna. Lehono gona, Baisiraele le Baamoni a ba ahlollwe ke Morena, e lego yena Moahlodi.

28Kgoši ya Baamoni ya gana go kwa ditaba tše Jefeta a di rometšego go yena.

29Ke mo Jefeta a tletšwego ke moya wa Morena, a phatša naga ya Gileada le ya Manase a tla motseng wa Mitsipa o lego go la Gileada; a tloga Mitsipa nageng ya Gileada a yo gahlana le Baamoni.

30Gomme Jefeta a enela Morena keno a re: Ge Baamoni o ka ba gafela diatleng tša ka,

31Gona mohla ke boago ke etšwa go Baamoni ntwa ge e fedile, ke tlo ntšha se ke tlogo gahlana naso se etšwa ka mojako wa ntlo ya ka, ka se dira sehlabelo.

32Gomme Jefeta a tšwela Baamoni dira a hlabana le bona, mme Morena a ba gafela diatleng tša gagwe.

33A ba fenya go tloga Aroere go fihla Minithe, metse e masome a mabedi, le go iša Abele-Keramima, ya ba polao e kgolo ka kudu. Ya ba moo Baamoni ba lobilego Baisiraele.

34Ya re ge Jefeta a tla Mitsipa mo ngwakong wa gagwe, a tšhoga ge a gahlanetšwa ke morwedi wa gagwe a swere moropa a letša mokgolokwane; gomme mosetsana eo e be e le ngwana wa gagwe a nnoši, a se na morwa goba morwedi o mongwe.

35A re go mmona a gagola diaparo tša gagwe, a re: Aowii! Ngwanaka! O nthobaganya bjang? Ke ba baka lang ke nyamišwa ke wene? Gobane ke enetše Morena, gomme nka se kgone go hlanoša.

36Ngwananyana a re: Tata, ge o enetše Morena, gona ntire se o se boletšego; hleng Morena o a otlile, manaba a gago a Baamoni.

37A buša a re: Se ke se kgopelago ke se setee fela: Mphe sebaka sa dikgwedi tše pedi, ke tšwe ke ye dithabeng ke llele bokgarebe bja ka, ke na le bagwera ba ka ba basetsana.

38Jefeta a re: A ke o sepele hle! A mo nea dikgwedi tše pedi, a ya le dithaka tša gagwe tša basetsana, a llela bokgarebe bja gagwe a le dithabeng.

39Ge go fetile dikgwedi tše pedi a boela go tatagwe, gomme tatagwe a mo dira ka mo a ennego ka gona, mme mosetsana yo ga a tseba monna. Gomme go Isiraele gwa ba le mokgwa wo,

40Wa gore ka ngwaga o mongwe le o mongwe basetsana ba Isiraele ba ya ba fetša matšatši a mane ba tlotla morwedi wa Jefeta monna wa ga Gileada.

← Chapter 10 Jump to: Chapter 12 →