Judges 16

Sotho 1951 (BIBELE)

← Chapter 15 Jump to: Chapter 17 →

1Simisone o kile a ya Gasa; gona moo a bona mosadi wa seotswa, a tsena go yena.

2Bagasa ge ba botšwa gore Simisone o tlile, ba mo teta, ba mo lalela kgorong ya motse bošego ka moka; ba lala ba itše “kgwathi” ba re: Bosasa ge go esa re tlo mmolaya.

3Simisone a robala go fihla mašegogare: mašegogare a tsoga, a swara mamati a mabedi a kgoro a a kgola gotee le dijakwana le mekgoko, a di šikara a di rotošetša ntlheng ya thaba e ukametšego Heburone.

4Gwa tla lebaka le lengwe, Simisone a rata mosadi e mongwe wa moeding wa Soreka, leina la gagwe e be e le Delila.

5Dikgošana tša Bafilisita tša tla go yena tša re: Mo otelele a be a go botše mo go tšwago maatla a gagwe a magolo a le gore re ka mo kgona kang, gore re mo tleme, re mo kokobetše. Ke mo e mongwe le e mongwe wa rena a tlogo go nea disilifera tše sekete se se nago le lekgolo.

6Delila a bolela le Simisone a re: A nke o mpotše mo go dutšego maatla a magolo a gago, le gore o ka tlengwa kang wa fenywa.

7Simisone a re: Ge motho a ka ntlema ka tšhika tše di šupago tše mpsha di sešogo tša oma, gona nka fokola kaaka batho ba bangwe.

8Dikgošana tša Bafilisita tša tliša ditšhika tše di šupago tše mpsha tše di sešogo tša oma, Delila a mo tlema ka tšona,

9Ka mo phapošing ba mo laletše. Delila a mo rera a re: Simisone, Bafilisita ba go wela godimo! Gomme yena a kgaola ditšhika tšeo bjalo ka ge motho a kgaola hlale tša leokodi ge le tlabotšwe ke mollo; mme ba se tsebe mo go dutšego maatla a gagwe.

10Delila a bolela le Simisone a re: Hleng o nkgapišitše leswiswi; o nkakeditše. Bjale a nke o mpotše se se kago go tlema.

11A fetola a re: Ge nka tlengwa ka dithapo tše mpsha tše di sešogo tša dira modiro, gona nka fokola kaaka batho ba bangwe.

12Ke mo Delila a tšerego dithapo tše mpsha, a mo tlema ka tšona, a napa a re: Simisone, Bafilisita ba go wela godimo! Ka mo phapošing ba be ba mo laletše; gomme yena a di kgaoganya ka matsogo a gagwe bjalo ka hlale tše tshesanyane.

13Delila a bolela le Simisone a re: Go fihla bjale o nkgapišitše leswiswi wa nkaketša. Bjale mpotše se se kago go tlema. Yena a re: Ge o ka loga mephotho e šupago ya hlogo ya ka ya ba mologo o tee le thapo.

14Delila a loga a di kokotela ka lemapo, a re: Simisone, Bafilisita ba go wela godimo! Simisone a phafoga borokong, a tomola lemapo ka thapo le ka mologo.

15Delila a re: O reng o fela o re o a nthata, etšwe pelo ya gago e sa nthe selo? Ke gararo bjalo o nkgapiša leswiswi, o nkutela mo maatla a magolo a a gago a dutšego gona.

16Gomme, ka gobane a fela a mo phegelela ka dipolelo, a mo hlokiša khutšo, a ba a mo lapiša wa go se sa rata go phela.

17A ba a mmotša tše di lego pelong ya gagwe, a re: Mo hlogong ya ka ga go ešo gwa batamela legare; ka gobane ke mokgethwa wa Modimo go tloga mola ke sa tšo belegwa. Ge nka kotwa hlogo, maatla a ka a tla tloga, ka fokola kaaka batho ba bangwe.

18Delila a bona gore bjale o mmoditše thopa ya gagwe ka moka. A roma lentšu a bitša dikgošana tša Bafilisita a re: Bjale tlang; o mpoditše thopa ya gagwe ka moka. Dikgošana tša Bafilisita tša tla di swere disilifera tšela ka diatla.

19Delila a mo robatša difarong tša gagwe, a bitša monna e mongwe a mo ripa mephotho e šupago ya hlogo ya gagwe; ya ba gona a mo fokodišitšego; ke mo maatla a gagwe a nago a mo tlogela.

20Bjale ge mosadi a re: Simisone, Bafilisita ba go wela godimo! A phafoga a re le bjale ke tlo tšwa ka phonyokga, a sa tsebe ge Morena a mo tlogetše.

21Bafilisita ba mo swara, ba mo gonya mahlo, ba mo iša Gasa, ba mo tlema ka ditšhipi tše pedi tša mefiri; a hlwa a šila mabele kgolegong.

22Fela, meriri ya hlogo ya gagwe ya mela, ya ba ya etša ya mola e sešo ya kotwa.

23Gomme dikgošana tša Bafilisita tša kgobokanela go tliša sedimo se segolo sa Dagoni modimo wa bona, e le gore ba thabe ka gobane ba be ba re: Simisone lenaba la rena, modimo wa rena o mo gafetše diatleng tša rena.

24Setšhaba ka moka ge se mmona, sa reta modimo wa bona, ka gobane se be se re: Ke modimo wa rena o gafetšego lenaba le la rena mo diatleng tša rena, lona le la go senya mašemo a rena, la go bolaya batho ba bantši ba gešo.

25Ya re ge ba thabile ka mokgwa wo, ba re: A go bitšwe Simisone, a re binele koša. Ba mmitša, ba mo ntšha kgolegong, mme a ba binela koša ba mmeile gare ga dikokwane.

26Simisone a botša lesogana le le bego le mo hlahla, a re: Ntese ke phopholetše dikokwane tše di thekgilego ngwako, ke tle ke itshame ka tšona.

27Gomme mo ngwakong woo go be go tletše banna le basadi ba bantši; le dikgošana ka moka tša Bafilisita di be di le gona; le ka ngwakong wa godimo go be go dutše banna le basadi, e nyakile go ba dikete tše tharo tša batho, ba lebeletše ge Simisone a bina koša.

28Simisone yena a rapela Morena a re: Mong wa ka Morena, a nke o nkgopole; mphe maatla bjale gatee fela. Modimo, lesa ke itefeletše go Bafilisita gatee fela ka baka la mahlo a ka a mabedi.

29A swara dikokwane tše pedi tše di mo gare, tše ngwako o bego o eme ka tšona, a di notela, e nngwe ka le letona, e nngwe ka la ntšogošo,

30A bolela a re: A nke ke hwe le Bafilisita! A napa a inama a kakatlela; mme ngwako ka moka wa wela dikgošana le batho ka moka ba bego ba le go wona; gomme batho ba a ba bolailego go hweng ga gagwe, ba bile ba fetiša bao a ba bolailego mehla yela a sa phela.

31Mme gwa tla bana babo le ba leloko la gabo, ba rwala setopo sa gagwe; ba boa naso, ba mmoloka lebitleng la Manoa tatagwe, kua gare ga Tsorea le Esithaolo. O be a feditše nywaga e masome a mabedi a ahlolela Isiraele.

← Chapter 15 Jump to: Chapter 17 →