Micah 2

Sotho 1951 (BIBELE)

← Chapter 1 Jump to: Chapter 3 →

1Kotsi e tlo wela bao, ba e rego ba le malaong, ba eleletša bobe, ba bo phetha ka moswana, ka ge ba na le maatla go bo dira.

2Ba duma mašemo, mme ba a utšwa; ba kganyoga nywako ba tla ba e tšea; motho le lapa la gagwe ke tša go tšewa ka šiši ke bona.

3Molato ke wona woo ge Morena a re: Ke nna e! Moloko wo ke o rerela kotsi, ye e tlogo le swara ka melala la šitwa go phonyokga le go sepela le inamologile, gobane e tlo ba lebaka le lebe.

4Mohla woo ba tlo le hlabela koša, ba lla sello se se rego: Re šaraketšwe wa go šarakelwa; Magae a gešo o a phekgotše. A ga ke a hlakolwa! Mašemo a rena o a aroletše bahlanogi.

5Ke tšona tše di tlogo go hlokiša moarolelwatšhemo wa phuthego ya Morena.

6Ba ruta ba re: Lesang thuto! Lesang go ruta batho tša mahlolakotsi. Kgobogo ga e fele!

7Hee lena ba moloko wa Jakobo, a le re ge Morena a dira tše bjalo, ke ka gobane a ngadile? A Lentšu la ka ga le šetše ba go dira tša go loka?

8Fela, tšhaba sa ka ke kgale se tsogile wa lenaba. Ba ba fetago ba iketlile ba ba amoga diaparo ba etša ba ba tšwago tlhabanong.

9Basadi ba setšhaba saka le ba raka mo nywakong ya bona ye e rategago; mme bana ba bona le ba amoga tago la ka go ya go ile.

10Nanogang le sepeleng, ka gobane felo fa ga se makhutšo; go na le ditšhila, di tlo le senyetša ruri.

11Ge go ka be go na le motho wa go ya le moya, a na le maaka le bofora, a le ruta tša sedila le tša go nwa, ke yena a kago ba moruti wa setšhaba se.

12Ke tlo le kgobela ruri, lena ba ga Jakobo, ka moka ga lena. Ke tlo ba ka phutha mašalela a Isiraele ka moka, ka ba dira dinku tša lešaka mohlape mo phulong ya wona, mabothobotho a batho.

13Ba tlo etwapele ke mothulatsela; ba tlo thula ba tsena ka kgoro, ba be ba tšwe ka yona ba hlahlwa ke kgoši ya bona, ba etilwe pele ke Morena.

← Chapter 1 Jump to: Chapter 3 →