Micah 7

Sotho 1951 (BIBELE)

← Chapter 6 Jump to:

1Joo nna joo! Ke mofudi wa dienywa; ke nyaka dipudutša; mme ga go seenywa se se kago lewa; ga go lego la serake le ke le kganyogago.

2Barapedi ba fedile mo nageng; ga go sa na moloki mo bathong; ka moka ga bona ba lalela go ka thula madi; bohle ba reana ka melaba.

3Atla tša bona di mo bobeng; di bo dira di bo rata; wa mmuši o re: Ntšha! Moahlodi o a rekwa! Bagolo mme ba boledišwa ke megabaru, ba logišana maano.

4Yo bolo ba mo sema tshehlo; moloki ba re: Lediga la meetlwa le kaone! -- Letšatši le boletšwego ke bahlapetši bago, letšatši la go otlwa le tlile. Ke mo ba tlogo gakanega.

5O se ke wa bota weno. O se holofele mogwera wa gago. Leta mojako wa molomo wago, ge o na le yo o lalago o mo gokaretše.

6Gobane morwa o nyatša tatagwe; ngwanana o lwa le mmagwe; ngwetši o tsogela matswalagwe; mme manaba a motho ke ba lapeng la gabo.

7Ge e le nna, ke lebeletše Morena; ke dula ke letetše Modimo Momphološi. Modimo wa ka o tlo nkwa.

8Hee wena lenaba la ka! Nna o ka se thabe ka nna! Le ge nka wa, ke tlo tsoga; ge ke dutše leswiswing, Morena ke seetša sa ka.

9Bogale bja Morena ke tlo bo kgotlelela, ka ge ke mo diretše dibe. O tlo ba a ntwela ntwa ya ka, ka tšwa ke se ne molato, a nntšhetša seeding, ka thabela kahlolo ya gagwe.

10Le lenaba la ka le tlo di bona, la tloga le apere hlong, lona le bego le re: O kae Modimo wa gago? Ke mo go tlogo thaba mahlo aka, ge lona le eba leraga la go gatakelwa mekgobeng.

11Ke tša mohla woo ge merako yago e agiwa, mohla go tlogo katološwa mellwane ya gago.

12Mohla woo ba tlo tla go wena ba etšwa Asuri, le metseng ya Egipita, e le ba dinaga tše gomago Egipita le ka noka ya Forate, le ka lewatle le lewatle, le ka dithaba le dithaba.

13Naga e senyega ka baagi ba yona, ka tše di tšwelelago ka mediro ya bona.

14Diša setšhaba sago ka lepara lago. Mohlape e lego wa gago, wo o dutšego o le nnoši lesoding mo gara thaba ya Karamele, o o fudiše kua Basani le Gileada bjalo ka mehleng ya kgale.

15Ke tlo ba bontšha mehlolo boka mehla yela o etšwa Egipita.

16Bantle ba tlo di bona, mme ba lewa ke dihlong, le ge maatla a bona e le a makaakaa; ba tlo itshwara melomo, mme ditsebe tša bona di tlo thibana.

17Ba tlo koma mmu boka noga tše di gagabago fase: ba tlo tšwa dibong tša bona ba tlaletšwe; ba tla go Morena Modimo wa rena ba tšhogile ba mmoifa.

18O kae Modimo a etšago wena Molebalelabathosebe, Mofetadikarogo tša setšhaba sago, o se nago mangala a sa felego, sa gago ya ba go tsefelwa ge o gaugela?

19O tlo buša a re hlomogelwa, a fediša melato ya rena: dibe tša rena tšohle o tlo di lahlela bodibeng bja lewatle.

20Jakobo o tlo go bona o le Mmotegi; Aborahama o tlo go bona o le yo botho. Ke tšona tše o enetšego borrawešo mehleng yela ya bogologolo.

← Chapter 6 Jump to: