Micah 5

Sotho 1951 (BIBELE)

← Chapter 4 Jump to: Chapter 6 →

1Gomme wena Betlehema Efurata! Le ge o le e monyenyane mo gare ga metse ya ba sekete ya Juda, go wena go tlo ntšwela e a tlogo ba Mmuši wa Isiraele, Yo tlhago ya gagwe e lego ya bogologolo bja neng le neng.

2Ke ka baka leo a tlogo ba gafa, mmelegi a be a belege; mašalela a bana babo a tlo boela go Baisiraele.

3Mme yena o tlo ema a diša a na le maatla a Morena, a na le letago la leina la Morena Modimo wa gagwe; mme ba tlo dula, ka gobane e tlo ba e mogolo go fihla kua lefase le gomago gona.

4Molao o tlogo ba gona šo: Mohla Asuri a etla nageng ya rena, a tsena mo nywakong ya rena ya mošate, re tlo bea badiši ba ba šupago ba go lwa nae, ra bea le matona a seswai a dira.

5Bona ba tlo diša naga ya Asuri ka lerumo, mme naga ya Nimirode ba tlo e diša ka ditšhoša tše bogale. O tlo re namolela ge Baasuri ba etla nageng ya rena, ge ba gata mellwane ya rena.

6Mme mašalela a ba Jakobo, a le gare ga ditšhaba tše dintši, a tlo etša phoka ye e tšwago go Morena, a tlo etša pula mabjanyeng, ye e nago e sa lebelelwe, e sa letele motho.

7Mašalela a ba Jakobo, a le gare ga ditšhaba, gare ga bantle ba bantši, a tlo etša tau gare ga diphoofolo tša lešoka, boka tau ya ledumaedi mehlapeng ya dinku, ye e rego ge e tsene e gatake, e sware, monamoledi a hlokega.

8Letsogo la gago le tlo kokobetša manaba a gago; ba ba go hloilego ba tlo fedišwa bohle.

9Tše di tlogo ba gona mehleng yeo šedi, -- o realo Morena, -- ke tlo fediša dipitsi tše o nago natšo, ka senya koloi tša gago.

10Ke tlo fediša metse ya naga ya gago, ka thuba dibo tša gago.

11Ke tlo fediša maboloi a atla tša gago, le didupe di ka se hlwe di eba gona fa ga geno.

12Ke tlo fediša le dipheko le medimo ya diswantšho fa ga geno, mme o ka se hlwe o khunamela sebopša sa diatla tšago.

13Ke tlo robaganya dikokwane tša Ašera fa ga geno, ka šwalalanya metse yago.

14Mme ke tlo dira ka bogale ke befetšwe, ge ke otla bantle ba ba sa kwego.

← Chapter 4 Jump to: Chapter 6 →