Romans 11

Sotho 1951 (BIBELE)

← Chapter 10 Jump to: Chapter 12 →

1Bjale ke re: A ke gore Modimo o lahlile setšhaba sa gagwe? Ga go bjalo. Hleng nna ke Moisiraele wa moloko wa Aborahama, wa lešika la Benyamini.

2Modimo, setšhaba sa gagwe se a se tsebilego pele, ga a ka a se lahla. A ga le tsebe mangwalo mo a bolelago tša Eliya ge a bolela le Modimo a bega setšhaba sa Isiraele, a re:

3Morena, ba bolaile baporofeta ba gago ba phušotše dialetare tša gago; go šetše nna ke nnoši; gomme ba tsoma bophelo bja ka.

4Phetolo ya Modimo gomme ya reng? Ya re: Ke sa itšhadišeditše banna ba dikete tše di šupago ba ba sa kago ba khunamela Baali.

5Le mehleng yeno go bjalo, go na le mašalela ka tlhaolo ya kgaugelo.

6Ge e le ka kgaugelo, gona ga se ka mediro, gore kgaugelo e se tlo kgaotša go ba kgaugelo. Gobane ge e le ka mediro, gona kgaugelo ga se selo; goba mediro ga se mediro.

7Go reng bjalo? Se Baisiraele ba se phegeletšego ga ba ka ba se fihlela. Se fihletšwe ke bahlaolwa; ba bangwe ba retetšwa.

8Gwa phethega tše di ngwadilwego tša re: Morena go fihla bjale o sa ba neile pelo ya boroko, le mahlo a go se bone, le ditsebe tša go se kwe.

9Le Dafida o re: Meruswi ye ba e duletšego e ba fetogele sefu le molaba le moreo, e be go ba lefetša.

10Mahlo a bona a fifale a se hlwe a bona, matheka a bona a lokologe ka mehla.

11Bjale ke re: A Baisiraele ba kgopilwe gore e be go wa? Ga go bjalo. Karogo ya bona e išitše phološo go bantle; mme e tlo ba go ba tutuwetša.

12Bjale ge karogo ya bona e humišitše lefase, ge go notlega ga bona go humišitše bantle, gona motlalo wa bona o tlo tšweletša tše kaakang!

13Ke bolela le lena bantle ka fa ke lego Moapostola wa bantle, mme ke fela ke tumiša modiro wa ka,

14Ke re ke tutuetše ba e lego nama e tee le nna, gore ke phološe ba bangwe ba bona.

15Ge go lahlwa ga bona go tšweletša poelanyo ya lefase, gona go amogelwa ga bona a go ka se tšweletše bophelo bahung?

16Ge dithakangwaga e le tše kgethwa, gona bogobe ka moka bo bjalo; ge modu e le o mokgethwa, gona le makala a bjalo.

17Gomme makala a mangwe a mohlware wa gae a phatlotšwe, mme wena o bego o le mohlware wa lešoka o hlomeleditšwe mo go wona, wa phela ka modu o tee le makala a a medilego le ka mmero wa wona mohlware wa gae.

18O se ke wa itheta wa nyatša makala ala. Ge o itheta, gona tseba, ga se wena o rwalago modu, ke modu o rwelego wena.

19Bjale o tlo re: Ge makala a phatlolwa, e be e le gore go hlomeletšwe nna.

20Go lokile. A phatlotšwe ka baka la go se dumele: wena wa tla wa ema ka tumelo. O se ikgodiše ge; sa gago a e be go boifa.

21Gobane ge Modimo a sa ka a tsebafa makala ala a a bego a medile, mohlomong le wena a ka lesa go go tsebafa.

22O tsebe bonolo bja Modimo; O tsebe le bogale bja gagwe. Bogale bo wela ba go kgeloga. Bonolo bo lebane le wena, ge o duletše bjona bonolo bjoo. Ge go se bjalo, le wena o tlo ripša.

23Le bala, ge ba ka lesa go ganela moo go se dumeleng, ba tlo buša ba hlomeletšwa; gobane Modimo o ba le maatla a go ba bušetša madulong.

24Gobane wena o ripilwego mohlwareng wa lešoka wo o bego o medile go wona, ge o hlomeletšwa mohlwareng wa gae wo o sa kago wa mela go wona, a ga se gore ba ba medilego mohlwareng wa gae ke bona ba ba tlogo kgoniša go boela mohlwareng wa gabo ge ba hlomeletšwa?

25Gobane ga ke rate ge le dula le sa tsebe taba ya sephiri se, gore le se tlo ya le mogopolo wa lena. Taba še: Baisiraele ka thoko e nngwe ba wetšwe ke go retela, gwa tlo ba gwa goroga motlalo wa bantle.

26Ke mo Baisiraele bohle ba tlo go phološwa bjalo ka ge go ngwadilwe gore: Molopolodi o tlo tla a etšwa Tsione; molato wa Jakobo o tlo tlošwa ke yena.

27Ke yona kgwerano ye ke tlogo e dira le bona, ge ke tloša dibe tša bona.

28Ge e le ka thoko ya Ebangedi ke manaba ka baka la lena; fela, ka thoko ya tlhaolo ke baratwa ka baka la botatabo.

29Gobane dikgaugelo tša Modimo le tlhaolo ya gagwe, ga di gomišege.

30Bjalo ka ge lena kgale le be le sa dumele Modimo, la tla la gaugelwa ka ge bona ba sa dumele.

31Le bona, ge ba sa ile le go se dumele ka ge go gaugetšwe bolena, ba tlo ba ba gaugelwa le bona.

32Gobane Modimo o lesitše bohle ba kgonyeletšwa go se dumeleng, gore a tlo kgona go ba gaugela bohle.

33A! Bodiba bja lehumo la Modimo, le bja bohlale bja gagwe, bja tsebo ya gagwe! A! Dikahlolo tša gagwe dihlayamohlathi; ditsela tša gagwe ga di latišege.

34Ke mang a tsebilego kgopolo ya Morena? Moeletši wa gagwe ke mang?

35Ke mang e a kilego a mo nea selo, a tla a re a bušetšwe?

36Gobane dilo tšohle di tšwa go yena, di ba ka yena, di ya go yena. A go retwe Yena ka go sa felego.

← Chapter 10 Jump to: Chapter 12 →