Romans 5

Sotho 1951 (BIBELE)

← Chapter 4 Jump to: Chapter 6 →

1Bjale, ge re lokafaditšwe ka tumelo, ke gona ge re boelantšwe le Modimo ke Mong a rena Jesu Kriste.

2Ke yena yo re bonego tsela ka yena, tsela ya go fihlela kgaugelo ye re emego ka yona re kgantšha letago la Modimo le re le holofetšego.

3E sego fao fela; re kgantšha le ditlaišego re tseba gore di tšweletša kgotlelelo,

4kgotlelelo ya tlo tšweletša potego; potego ya tlo tšweletša kholofelo.

5Gomme kholofelo ga e lahletše, ka ge lerato la Modimo le tšholletšwe dipelong tša rena ka Moya o Mokgethwa wo re o filwego.

6Gobane Kriste mola a re hwela, ke ge re sa le bafokodi; o hwetše basenyi.

7Go hwela moloki, e šetše e le taba ye e nyakago go se be gona; ge e le yo botho, mohlomong motho a ka tlema pelo a mo hwela.

8Gomme Modimo, lerato le a re ratilego ka lona, o le bonagatša ka ge Kriste a re hwela re sa le badiradibe.

9Bjale, ge re le balokafadi ka madi a gagwe, a ga se gona go tlogo kgonega ra phološwa bogaleng ke yena?

10Ge ešita mola re sa le manaba ra boelanywa le Modimo ka go hwa ga Morwa wa gagwe, bjale ge re boelantšwe le yena, a ga se gona go tlo go kgonega gee ra phološwa ka go phela ga gagwe?

11Gomme ga se tšeo fela; re bile re kgantšha Modimo ka Jesu Kriste mong a rena, yo re bonego poelano ka yena.

12Ke gona, bjalo ka ge sebe se tsene lefaseng ka motho o tee, mme lehu la tsena ka sebe, lehu le aparetše batho bohle ka ge ba dirile dibe bohle.

13Sebe se be se šetše se le gona lefaseng ge Molao o etla. Le ge se sa balelwe motho ge go se Molao.

14Lehu lona, le šetše le bušitše go tloga ka Adama go fihla ka Moshe; le bušitše bohle, le ba go se sele Molao boka Adama, yena seswantšho sa Adama wa go tlo tla.

15Ga se go re karogo yela e swana le neo ya kgaugelo. Gobane mola go hwile ba bantši ka karogo ya motho o tee; mono go humišwa ba bantši gagolo-golo ka kgaugelo ya Modimo, ka neo ya kgaugelo e tlago ka motho o tee yena Jesu Kriste.

16Neo yeno ga e etše tšela tša go tla ka bosenyi bja o tee. Mola go lahlwa ga o tee go obetše batho go lahlwa; ge e le neo yeno ke go lokafatša go arogile ba bantsi.

17Gomme ge lehu le bušitše ka motho o tee ka baka la karogo ya yena o tee eo, bjale go tlo buša ba ba amogetšego khumišo e kgolokgolo ya kgaugelo le neo ya tokafalo, ba le bophelong ka yena o tee, Jesu Kriste.

18Sedio ge: Ge batho ka moka ba išitšwe tahlegong ka karogo ya motho o tee, bjale batho ka moka ba tletšwe ke tokafalo e išago bophelong ka yena o tee.

19Ge ba bantši ba tlile ba ba badiradibe ka go se kwe ga motho o tee, bjalo go kwa ga yena o tee go dira ba bantši baloki.

20Molao wona o tseneletše gore karogo e be ye e tletšego; gomme mo dibe e lego tše tletšego, ke mo kgaugelo e bago e kgolokgolo,

21Gore bjale ka ge sebe se be se buša ka lehu, bjale go buše kgaugelo ka tokafalo, e iše bophelong bjo bo sa felego ka Jesu Kriste mong a rena.

← Chapter 4 Jump to: Chapter 6 →