Romans 3

Sotho 1951 (BIBELE)

← Chapter 2 Jump to: Chapter 4 →

1Bjale se Mojuda a phalago batho ba bangwe ka sona ke eng? Se lebollo le holago motho ka sona ke eng?

2Di gona; ke tše ntši mo go fela. Se segolo ke ge Bajuda ba dirilwe baboloki ba polelo tša Modimo.

3Go bjang gomme? Ge ba bangwe ba bona ba sa ka ba botega, a fa go se botege ga bona go ka fediša go botega ga Modimo?

4Le gannyane! Go tiile la go re Morereši ke Modimo, ba maaka ke batho bohle, bjalo ka ge go ngwadilwe gwa thwe: O tlo rereša go ahlola.

5Bjale, ge go se loke ga rena go bonagatša go loka ga Modimo, re tlo reng moo? A re tlo re Modimo ga a loka ge a roma dikotlo? Ke bolela ka semotho.

6Le gannyane! Kahlolo ya ge Modimo a ahlola lefase e ka be e le kae?

7Bjale ge therešo ya Modimo e bonala bogolo, ge a retwa ka yona, e le ka maaka a ka, ke sa ahlolelwang ka thwe ke modiradibe?

8A re ka se re, re eya le bao ba go mphara, ba go re re itšalo, a re ka se re: A re direng tše mpe, gore go tle go tšwelele tše botse? -- Ba go realo, dikotlo di ba swanetše.

9Go bjang bjalo? A rena Bajuda re phala ba bangwe? Ga go bjalo, le neng. Hleng re šetše re boletše ra re Bajuda le Bagerika ba molato bohle, ba bušwa ke sebe;

10ka mo go ngwadilwego gwa thwe: Ga go e a dirago tše botse, le ge e le o tee.

11Ga go na le e a nago le kgopolo; ga go na e a nyakago Modimo.

12Ba arogile ka moka ga bona; ba gobogile bohle; ga go e a dirago tše dibotse, le ge e le o tee.

13Mogolo wa bona ke lebitla le le butšwego; maleme a bona ke a masese; mo ganong ga bona go bohloko bja mokopa.

14Melomo ya bona e tletše maroga le sabohloko.

15Maoto a bona a kganyelela go yo thula madi.

16Mohlala wa bona ke tshenyo le mašegerepe.

17Tsela ya molao ga ba e tsebe.

18Go šia Modimo go bona ga dio.

19Gomme re tseba gore tše Molao o di bolelago, o di botša bao ba go bušwa ke Molao, gore melomo ka moka e thibje, lefase ka moka e be la go tlo bewa molato ke Modimo.

20Gobane ga go motho wa nama e a kago lokafala pele ga Modimo ka mediro e yago ka Molao; se Molao o re fago sona ke go tseba se e lego sebe.

21Gomme bjale go tšweleditšwe toko ya Modimo ye e sa tlego ka Molao. E tla e hlatsetšwe ke Molao le Baporofeta.

22Ke toko ya Modimo e tlago ka go dumela Jesu Kriste, ya tlela bohle ba ba dumelago.

23Gobane moo ga go tlhaolo; ba dirile dibe bohle, ba hlaya letago la Modimo.

24Ge ba lokafala, ke go fo fiwa ka kgaugelo ya gagwe ba lopolotšwe ke Jesu Kriste.

25Ke yena yo Modimo a mmeilego kgale, gore ka madi a gagwe a be seboelanyi ka tumelo; e be gona go bonagatša toko ya Modimo, ge ka go se fele pelo ga gagwe a hlokomologile dibe tše di dirilwego kgale.

26E be gona go bonagatša toko ya gagwe ka tša mehla yeno, ge a tlo thwe o ya ka toko ge a lokafatša ba ba dumelago Jesu.

27Bjale boikgantšho bo ka ba kae? Bo lelekilwe. Ka Molao ofe? A ke ka Molao wa mediro? Aowa; ke ka Molao wa tumelo.

28Gobane re hwetša motho ge a lokafala ka tumelo, e sego ka mediro ya Molao.

29A fa re ka re Modimo ke wa Bajuda fela? A ga se yena Modimo le wa bantle? Le bantle ke yena Modimo wa bona.

30Ka kgonthe, Modimo ke o tee; ke yena a lokafatšago ba lebollo ka tumelo; le ba ba sa bollego, ke yena a ba lokafatšago ka yona tumelo.

31A ke go re Molao re o fediša ka tumelo? Ga go bjalo. Ke gona ge re o tiiša.

← Chapter 2 Jump to: Chapter 4 →