Song of Solomon 4

Sotho 1951 (BIBELE)

← Chapter 3 Jump to: Chapter 5 →

1O yo botsebotse, wena moratwa wa ka! O yo botse. Mahlo ago, le go širwa ka lešira, eke ke mahlo a leeba. Moriri wa gago o etša mohlatswana wa dipudi di ologago dithabeng tša Gileada.

2Meno ago eke ke mohlape wa nku tše di kotilwego, tše di tšwago go hlatswiwa, tše di tlogo tswala ka mafahla tšohle, di se nago ngopa.

3Melomo ya gago ke lentinyana la moretele; mmolelelo wago ke o bose; dithama tša gago, le go širwa ka lešira, ke seenywa se se fatotšwego.

4Molala wa gago o etša sebo sa Dafida, seokamo se se agetšwego go fegiwa kotse tše sekete, ditlhamo tša bagale ka moka.

5Mabele a gago ka bobedi bja ona, a etša phalana tša mafahlana, di fula gare ga matšoba.

6Tšatši le tlo ba la huba, meriti e tlo tloga, ke sa ile dithabeng, borekung, mmotong wa monko wa dinoko.

7Moratwa wa ka, o yo botsemoka, ga o hlae.

8Tlaa, re tloge Libanoni, wena mmeeletšwa wa ka! Tlaa, re tloge Libanoni. Theoša mahlo o le thabeng ya Amana, o le thabeng ya Senire le ya Herimone, madulo a ditau, thaba ya dinkwe.

9Wena kgaetšedi ya ka! Mmeeletšwa wa ka! O thopile pelo ya ka; o e thopile ka kgadimo ye nngwe ya mahlo ago, ka pheta e tee ya molaleng wa gago.

10Lerato la gago, wena kgaetšedi mmeeletšwa, ga se ka go kgahla! Lerato la gago ga se ka go tsefa, le phala morara; monko wa ditlolo tšago o phala diorelo tšohle.

11Mmeeletšwa wa ka! Melomo ya gago e rotha todi ya dinose, eke o hupile nose le maswi. Monko wa aparo tšago ke wa Libanoni.

12Wena kgaetšedi ya ka mmeeletšwa, o etša tšhemo ya legora, mothopo o ageletšwego, sediba se se khurumeditšwego.

13Tše di medilego mo go wena eke ke tšhemo ya matsaka, ya dienywa tše di rategago, le matšoba le mere ya monko o monate,

14mere ya monko o monate, le maroke, le orelo tša mehutahuta, le boreku, le dinoko, le ditlolo tša bohlokwa.

15O sediba mašemong, o mothopo moselogameetse a elago Libanoni.

16Hee phefo ya leboa, tsoga! Tlaa wena phefo ya borwa! O fokele tšhemo ya ka, go tupe menko ya dihlare tša yona; moratwa wa ka a tle serapeng sa gagwe, a je kenyo tšagwe tše monate.

← Chapter 3 Jump to: Chapter 5 →