Song of Solomon 7

Sotho 1951 (BIBELE)

← Chapter 6 Jump to: Chapter 8 →

1Boa! Boa! Sulamitha! Re go bone! Sulamitha le mmonang ge eke le bona koša ya babini ba hlakane?

2Nao tša gago ga se ka go kgahla, wena ngwana wa mošate. Botse bja matheka ago ke dingangane tša go dirwa ke makgone.

3Mokhubu wa gago o etša mogopšana mmopelwamorara wo o tswakilwego. Mpa yago ke moolo wa mabele wa go rarwa ke matšoba.

4Mabele a gago bobedi bja ona a etša phalana tša mafahla.

5Molala wa gago o etša morako wa naka la tlou; mahlo ago ke madiba a kua Hesiboni, a kgorong ya motse wa mašaba. Nko ya gago e etša bookamo bja kua Libanoni boleba Damaseko.

6Hlogo ya gago ke thaba ya Karamele; meriri ya hlogo ya gago ke kobo ya morena, ge aperwe senatla.

7O yo botse ruri! O ratega ruri, wena lerato, mmamenate.

8Leemo la gago ke la sehlare sa molala; mabele a gago ke nkgwa tša dienywa.

9Ka re ke namelele hlare seo, ke fihlele dienywa; ka re mabele a gago e tlo ba nkwa tša morara; ke tlo kwa mohemo wago e le monko wa dienywa.

10Ganong ga gago go tlo ba morara o monate, wa go gelwa moratwa wa ka senatla, mmuišamelomo ya barobadi.

11Nna mong wa ka ke moratwa wa ka, le yena o ntlhologetšwe.

12Tlaa, moratwa wa ka, re tšwe re ye mašemong, re yo lala metsaneng;

13re yo tsogela rapeng tša morara, re bone go hloga ga wona, ge o šetše o paleša, ge meremelewa e khukhuša; ke mo ke tlogo kgona go go rata.

14Go tlo kwala monko wa maropotlane; mo lapeng la gešo go na le dikenyo tšohle tša lenyaga le ngwagola, tše ke go beetšego tšona, wena moratwa wa ka.

← Chapter 6 Jump to: Chapter 8 →