Song of Solomon 5

Sotho 1951 (BIBELE)

← Chapter 4 Jump to: Chapter 6 →

1Ke tlile tšhemong ya ka, kgaetšedi ya ka mmeeletšwa! Ke kga maroke le diorelo tša ka; ke ja lemapo la dinose tša ka; ke nwa morara wa ka le lebese la ka. Hee lena ba gešo! Nwang le thabe, le baratwa ba ka.

2Nna ke robetše, pelo ya ka yona e phafogile. Ke kwa moratwa wa ka ge a opaopa. Mpulele, kgaetšedi ya ka, moratwa wa ka, leebana la ka, mosekegi wa ka! Ka gobane hlogo ya ka e wetšwe ke phoka, meriri ya ka e tletše marotha a bošego.

3Ke apotše kobo ya ka; nka boela ke apara bjang? Maoto ke šetše ke hlapile; nka boela ke a tšhilafatša bjang?

4Moratwa wa ka a gomiša atla sagwe lešobeng; pelo ya ka ya mo gaugela.

5Ka tsoga, ka re ke mmulele, yena moratwa wa ka; mme diatla tša ka di rotha ditlolo, di elela menwaneng, di rothela mpheko wa sefero.

6Ke re ke mmulele, yena moratwa wa ka, ka hwetša a se gona a fulere. Mola a sa bolela, pelo ya ka e be e tšhogile. Ka mo nyaka, ka se mmone; ka mmitša, a se nkarabe.

7Ka hwetšwa ke baleti ba go sepela le motse, ba ntia ba nkgobatša, ba nkamoga lešira la ka, bona baleti ba merako.

8Hee lena barwedi ba Jerusalema! Ke a le eniša ke re: Ge le ka mo hwetša, yena moratwa wa ka, le tla reng? Le re: Ke molwetši ka lerato.

9Se moratwa wago a phalago baratwa ba bangwe ka sona naa ke eng? Wena yo botsana go basadi! Se moratwa wago a phalago ba bangwe ka sona naa ke eng, ge o re eniša?

10Moratwa wa ka o tagile mme o galogile; ke e mogolo mo go ba diketekete.

11Hlogo ya gagwe ke tshipi e khwibidu ya paala; meriri ke malepelepe, ya boso bja legukubu.

12Mahlo agwe a etša maebana dinokeng tša meetse; a hlapilwe ka lebese; ke talama nganganeng.

13Thama tšago ke rapana tša maroke a monate, tšhengwana ya merediorelo; melomo ya gagwe e etša matšoba a go rotha todi e elago.

14Matsogo a gagwe, maseka tshipi e khwibidu, a go gongwa ka dipheta. Mmele wa gagwe ke naka la tlou le le setilwego la manegwa ka matsaka.

15Maoto a gagwe, kokwane tša lebjelešweu, di ema ka nao tša tshipi e khwibidu. Sebopego sa gagwe ke sa Libanoni, bothakga bja hlare tša merokwana.

16Ganong ga gagwe ke ga menate, ke morategi wa paala. Moratwa wa ka ke yo bjalo. Ke yena moratwa wa ka, lena barwedi ba Jerusalema.

← Chapter 4 Jump to: Chapter 6 →