Hebrews 11

Shekhawati

← Chapter 10 Jump to: Chapter 12 →

1बिस्वास, आस करेड़ी चिजा मिलबा को पूरो भरोसो, अर नइ दिखबाळी चिजा को पुक्‍तो सबूत ह।

2अर अंय्यां को बिस्वास करबा की बजेऊँई पुराणा टेम का मिनखा की परमेसर क कानिऊँ बडाई करी गई।

3बिस्वासऊँई आपा आ जाणा हां क परमेसर का बोल बोलबाऊँ इ सरस्टि की रचना होई। इ ताँई जखो दिखै ह, बो दिखबाळी चिजाऊँ कोनी बण्यो।

4हाबिल क बिस्वास करबा की बजेऊँई बो कैनऊँ चोखो बलिदान परमेसर क चढायो। बिस्वास करबा की बजेऊँई बिकै धरमी होबा की बडाई करी गई अर परमेसर बिका चढावानै मान्यो अर बिकै मरबा क पाछै बी आपा इब ताँई बिऊँ सीखां हां।

5बिस्वासऊँ हनोक उपर उठा लिओ गयो जिऊँ बो मोत कोनी भोगी, अर बिको बेरोई कोनी चाल्यो क बो कठै गयो, क्युं क परमेसर बिनै उठा लिओ अर बिकै उठाया जाबाऊँ पेलीई बिकी बडाई करी क बो परमेसरनै राजी कर्यो हो।

6अर बिस्वास क बिना परमेसरनै राजी करबो अणहोतो ह, क्युं क परमेसर क कनै आबाळानै बिस्वास करबो चाए क बो ह अर परमेसरनै लगनऊँ ढुंढबाळानै बो फळ देवै ह।

7बिस्वास करबा की बजेऊँई नूह बा बातानै जखी बि टेम का कोनी दिखरी ही। बानै परमेसर का डर क सागै चितावनी मानर आपका परवारनै बचाबा ताँई झाज बणायो हो, अंय्यां कर बो जगतनै दोसी गिण्यो अर बि धारमिक्‍ता को पाँतीवाळ होयो जखी बिस्वास करबाऊँ आवै ह।

8बिस्वास करबा की बजेऊँई जद अब्राहमनै बुलायो गयो हो, जणा बो हुकम मानर बि झघा कानि चाल पड़्यो जिको बो वारिस बणबाळो हो। जदकी बो कोनी जाणतो हो क बो कठै जार्यो ह।

9बिस्वास करबा की बजेऊँई जखी जमीन बिनै देबा को करार दिओ गयो हो बिकै उपर बो एक परदेसी की जंय्यां तम्मू बणार रिह्यो। अंय्यांई इसाक अर याकूब बी रिह्या जखा परमेसर का बिई करार का पाँतीवाळ हा।

10क्युं क बो बि मजबूत निम हाळी नगरीनै उडिकर्यो हो जिको नक्सो बणाबाळो अर चिणबाळो परमेसर ह।

11बिस्वास करबा की बजेऊँई टाबर पैदा करबा की उमर बित्या पाछै बी सारा माँ बणी। क्युं क बिऊँ करार करबाळा परमेसरनै बा बिस्वास जोगो मानी।

12अर अंय्यांई एक मिनख अब्राहमऊँ जखो मरियलसो हो, आसमान का तारा अर समदर की बाळू की जंय्यां अणमेदा की ओलाद होई।

13अ सगळा बिस्वास क सागैई मर्या। अर आ मिनखानै बे चिजा कोनी मिली जाको बादो कर्यो गयो हो पण अ बानै दूरऊँ देखर राजी होया। अर बे मान लिआ क बे इ जगत म अणजाण अर परदेसी ह।

14अर जखा अंय्यां की बाता करीं हीं बे दिखावीं हीं क बे अंय्यां का देस की आस म ह जखो बाको खुदको ह।

15ज बे बि देस क बारां म सोचता जठै बे रेह्ता हा, जणा बानै बठै ओटा जाबा को मोको हो।

16पण बानै तो चोखा देस की चाह ही जखो ईस्बर नगरी ह, इ ताँई परमेसर बाको परमेसर बाजबाऊँ कोनी सरमावै, अर परमेसर बा ताँई एक नगरी त्यार करमाली ह।

17बिस्वास करबा की बजेऊँई अब्राहम जद बिचास्यो गयो बि टेम का इसाक की बलि चढाबा की पूरी त्यारी करली ही। जदकी परमेसर बिऊँ बोल्यो हो क, “इसाकऊँई तेरो वंस चालसी।” इकै बावजुद बी अब्राहम, जिऊँ करार कर्यो गयो हो आपका एकलोता बेटा की बलि देबानै त्यार होगो।

19क्युं क अब्राहम सोच्यो क परमेसर मरेड़ानै जिंदो कर सकै अर ज इनै दुसरा तरिकाऊँ बोलां जणा बो इसाकनै मोतऊँ पाछो ले लिओ।

20इसाक बिस्वासऊँई याकूब अर एसावनै बाकी आबाळी जिंदगी को आसिरबाद दिओ।

21बिस्वास करबा की बजेऊँई याकूब मरता टेम युसूफ का छोरानै बारी-बारीऊँ आसिरबाद दिओ अर आपकी लाठी को सारो लेर परमेसर क धोक खाई।

22बिस्वास करबा की बजेऊँई युसूफ जद मरबाळो हो जणा इजरायलीआ की मिसरऊँ निकळबा की बात करी अर बो आपकी गाडेड़ी हाड्या लेज्याबा क बारां म बानै हुकम दिओ।

23बिस्वास करबा की बजेऊँई मूसा का माँ-बाप बिकै जलम क पाछै बिनै तीन म्हेना ताँई लुखार राख्या, क्युं क बे देख्या क बो बोळो सोवणो टाबर ह अर बे राजा का हुकमऊँ बी कोनी डर्या।

24बिस्वास करबा की बजेऊँई जद मूसा बडो होगो जणा बो फिरोन की छोरी को बेटो खुवाबाऊँ नट दिओ।

25क्युं क बिनै थोड़ा दिन रेह्बाळा पाप का सुक भोगबाऊँ परमेसर का मिनखा क सागै दुख भोगबो चोखो लाग्यो।

26बिनै मिसर का धनऊँ बेत्ती मसी ताँई बेजती कराबो घणो किमती लाग्यो, क्युं क बो आगै मिलबाळा इनामनै बेसबरीऊँ उडिकर्यो हो।

27बिस्वास करबा की बजेऊँई बो राजा की झाळ को डर कोनी मान्यो अर बो मिसरनै छोड दिओ। बो सक्यु सेण करग्यो क्युं क बो अंय्यां को भिवार कर्यो मानो नइ दिखबाळा परमेसरनै देख लिओ हो।

28बिस्वास करबा की बजेऊँई बो फसै को त्युंहार मनायो अर लोय छिड़कबा का हुकमनै मान्यो, जिऊँ क पेलीपोत का छोरा को नास करबाळो इजरायल का पेलीपोत का छोरा क क्युंई नइ करै।

29बिस्वास करबा की बजेऊँई इजरायली मिनख लाल समदर प अंय्यां चालर पार करग्या जंय्यां बे सूकी धरती प चालर्या हो। पण जद मिसरी मिनख अंय्यां कर्या जणा डूबगा।

30बिस्वास करबा की बजेऊँई जद इजरायली मिनख यरियो नगरी की च्यार दिवारी क सात दिन ताँई चकर दिआ, जणा बा ढह्गी।

31बिस्वास करबा की बजेऊँई राहाब नाम की रांड हुकम नइ मानबाळा क सागै कोनी मारी गई, क्युं क बा भेध्या की आवभगत करी ही।

32इब आगै काँई बताऊँ? गिदोन, बारक, सिमसोन, यिपताह, दाऊद, सेमुएल अर बा परमेसर की खेबाळा क बारां म बताबा ताँई मेरै कनै टेम कोनी।

33बे बिस्वास करबा की बजेऊँई राजपाटानै जीत लिआ, बे धरम का काम कर्या अर जोक्यु बी परमेसर बानै देबा को बादो कर्यो हो बो सक्यु बानै मिल्यो। बे नार का मुंडानै बंद कर दिआ,

34बळती लायनै बुत्ता दिआ अर तलवार की धारऊँ बच निकळ्या। बे कमजोर होबा क पाछै बी सक्‍तिसाली बणग्या अर युद म सक्‍तिसाली होगा अर दुसरा देसा की सेनानै तीनतेरा कर दिआ।

35बिस्वासऊँई लूगायानै बाका मरेड़ा जिंदा होर ओटा मिलग्या। बोळा मिनखानै सतायो गयो, पण बे छुटबाऊँ नट दिआ जिऊँ क बे चोखा जीवन म ओज्यु जिंदा हो सकै।

36कया को तमासो बणायो गयो, कया क बेत मारी गई, कयानै बां'दर जेळ म गेर्यो गयो।

37कयानै भाठाऊँ मारगेर्यो गयो, कयानै आरीऊँ चिर्या गया, कयानै तलवारऊँ मार्यो गयो। बे कंगाली की दसा म, कळेस म, अर दुख भोगता होया अर बकर्या अर लल्ड्या की खाल ओड्या अठिनै-बठिनै लात घूसा खाता हांडता फिर्या;

38बे उजाड़ म, डूँगरा म, अर गुफा म, धरती प बणेड़ा खाडा खोळा म लुखता फिर्या क्युं क जगत बाकै जोगो कोनी हो।

39आकै बिस्वास करबा की बजेऊँई आ सगळा की बडाई करी गई, जणाबी आमैऊँ कोईसानै बी बादो करेड़ी चिज कोनी मिली।

40क्युं क परमेसर क कनै बिकी इंछ्या गेल आपणा ताँई इऊँ बी चोखी बाता ह जिऊँ बानै बी आपणा सागैई सिद कर्यो जावै।

← Chapter 10 Jump to: Chapter 12 →