2 Timothy 1

Tulu (ಪೊಸ ಒಡಂಬಡಿಕೆ)

Jump to: Chapter 2 →

1ಕ್ರಿಸ್ತ ಯೇಸುಡುಪ್ಪು ಜೀವ ವಾಗ್ದಾನೊನು ತೆರಿಪಾವುನೆಕ್ಕಾದ್ ದೇವೆರೆ ಚಿತ್ತೊಡು ಕ್ರಿಸ್ತ ಯೇಸುನ ಅಪೊಸ್ತಲೆ ಆಯಿ ಪೌಲುಡ್ದು ಎನ ಪ್ರೀತಿದ ಮಗೆ ಆದುಪ್ಪು ತಿಮೋಥಿಗ್ ಬರೆಪಿನಿ ದಾನೆಂದ್ಂಡ, ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ನಮ ಕರ್ತವೆ ಆದುಪ್ಪು ಕ್ರಿಸ್ತ ಯೇಸುಡ್ದ್‌ಲಾ ನಿಕ್ಕ್ ದಯಲಾ, ಕರುಣೆಲಾ, ಸಮಾಧಾನಲಾ ಆವಡ್.

3ಯಾನ್ ರಾತ್ರೆ ಪಗೆಲ್ ಎನ ಪ್ರಾರ್ಥನೆಲೆಡ್ ನಿನನ್ ಬುಡಂದೆ ನೆನೆಪು ಮಲ್ಪುವೆ. ಅತ್ತಂದೆ ಯಾನ್ ಎನ ಪೂರ್ವಿಕೆರೆ ಭಕ್ತಿದ ಮಾರ್ಗೊಡು ನಡತೊಂದು ಶುದ್ಧ ಮನಸಾಕ್ಷಿಡ್ ಸೇವೆ ಮಲ್ಪುನ ದೇವೆರೆಗ್ ನಿನ ಸಂಗತಿಡ್ ಉಪಕಾರ ಸಂದಾವೆ.

4ಯಾನ್ ನನಲಾ ನಿನ ಕಣ್ಣೀರ್‌ನ್ ಮದತ್‌ಜಿ, ನಿನನ್ ಕುಡೊರ ತೂದು ಸಂತೋಷೊಡು ದಿಂಜೊಡು ಅಂದ್‌ದ್ ಆಸೆ ಮಲ್ಪುವೆ.

5ನಿನಡುಪ್ಪು ಕಪಟದಾಂತಿ ನಂಬಿಕೆನ್ ನೆನೆಪು ಮಲ್ತೊನ್ವೆ. ಅವು ದುಂಬತ್ತ ನಿನ ಅಜ್ಜಿ ಲೋವಿಡಲಾ ನಿನ ಅಪ್ಪೆ ಯೂನೀಕೆಡಲಾ ಇತ್ತ್ಂಡ್. ಅಂಚೆನೇ ಅವು ನಿನಡಲಾ ಉಂಡು ಅಂದ್‌ದ್ ಯಾನ್ ದೃಢಾದ್ ನಂಬುದೆ.

6ಅಂಚಾಯಿನೆಡ್ದೇ ಯಾನ್ ಎನ ಕೈನ್ ನಿನ ತರೆಕ್ ದೀಯಿನಪಗ ದೇವೆರ್ ನಿಕ್ಕ್ ಕೊರಿನ ಆತ್ಮೀಕ ವರದಾನೊನು ನನಲಾ ಹೆಚ್ಚಾದ್ ತೋಜಿದ್ ಬರ್ಪಿಲೆಕ್ಕ ಮಲ್ಪೊಡಂದ್‌ದ್ ಕುಡ ನೆನೆಪು ಪುಟ್ಟಾವೆ.

7ದಾಯೆಗಂದ್ಂಡ ದೇವೆರ್ ನಂಕ್ ಕೊರ್ತಿನ ಆತ್ಮ ಅವು ಬಲತ್ತವು, ಪ್ರೀತಿದವು, ತಿಳುವಳಿಕೆ ಇತ್ತಿನವು ಅತ್ತಂದೆ ಪೋಡಿಗೆದ ಆತ್ಮ ಅತ್ತ್.

8ಅಂಚಾದ್ ಕರ್ತವಗ್ ಕೊರ್ಪಿನ ಸಾಕ್ಷಿದ ಬಗೆಟಾವಡ್ ಆಯಗಾದ್ ಸೆರೆಮನೆಟ್ ಉಪ್ಪುನ ಎನ ಬಗೆಟಾವಡ್ ನಾಚಿಗೆ ಮಲ್ಪಡ. ಆಂಡ ದೇವೆರ್ ನಿಕ್ಕ್ ಕೊರ್ಪಿನ ಬಲೊಡ್ದು ಸುವಾರ್ತೆಗಾದ್ ಎನಡೊಪ್ಪ ಕಷ್ಟೊಲೆನ್ ತಾಳೊನ್ಲ.

9ದೇವೆರ್ ನಮ ಎಡ್ಡೆ ಕೆಲಸೊನು ತೂದು ಅತ್ತ್, ತನ ಚಿತ್ತದ ಪ್ರಕಾರ ದಯೆಟ್ ನಮನ್ ರಕ್ಷಣೆ ಮಲ್ತ್‌ದ್ ಪರಿಶುದ್ಧರಾಯೆರೆಗಾದ್ ಲೆತ್ತೆ. ಈ ದಯ ಆದಿಕಾಲೊಗು ದುಂಬು ಕ್ರಿಸ್ತ ಯೇಸುಡು ನಂಕ್ ದೀತ್ಂಡ್. ಇತ್ತೆ ನಮ ರಕ್ಷಕೆ ಆದುಪ್ಪುನ ಯೇಸು ಕ್ರಿಸ್ತಡ್ ತೋಜಿದ್ ಬತ್ತಿನೆಡ್ದ್ ಅವು ನಂಕ್ ತೆರಿದ್ ಬತ್ತ್ಂಡ್. ಆಯೆ ಮರಣದ ಬಲೊನು ಪೊಲ್ತುದು ಸುವಾರ್ತೆಡ್ದ್ ಜೀವೊಗ್ಲಾ ನಿತ್ಯತ್ವೊಗ್ಲಾ ಉಪ್ಪುನ ಸಾದಿದ ಬೊಲ್ಪುನು ತೋಜಾಯೆ.

11ಸುವಾರ್ತೆದ ಅಭಿವೃದ್ಧಿಗಾದ್ ಯಾನ್ ಸುವಾರ್ತೆನ್ ಸಾರಿಯುನೆಕ್ಕ್‌ಲಾ ಅಪೊಸ್ತಲೆ ಆದ್ ಬೋಧನೆ ಮಲ್ಪೆರೆಗಾದ್‌ಲಾ ನೇಮಕ ಆತೆ.

12ಈ ಕಾರಣೊಗಾದ್ ಯಾನ್ ಈ ಭಂಗೊಲೆನ್ ತಾಳೊಂದುಲ್ಲೆ. ಆಂಡ ಯಾನ್ ನಾಚಿಗೆ ಮಲ್ಪುಜಿ, ಯಾನ್ ನಂಬುನಾಯನ್ ತೆರಿದೆ, ಆಯೆ ಎಂಕ್ ಒಚ್ಚಿದ್ ಕೊರಿನೆನ್ ಆ ದಿನಕಾದ್ ಕಾಪೆರೆಗ್ ಶಕ್ತಿ ಇತ್ತಿನಾಯೆ ಆದುಲ್ಲೆ ಅಂದ್‌ದ್ ಯಾನ್ ದೃಢಾದ್ ನಂಬುವೆ.

13ಈ ಕ್ರಿಸ್ತ ಯೇಸುಡು ನಂಬಿಕೆಲಾ ಪ್ರೀತಿಲಾ ಇತ್ತಿನಾಯೆ ಆದ್, ಎನಡ್ದ್ ಕೇಂಡಿನ ಸ್ವಸ್ಥ ಬೋಧನೆನ್ ಮಾದ್ರಿ ಆದ್ ದೀದ್ ಬುಡಂದೆ ಪತ್ತೊನ್ಲ.

14ನಿಕ್ಕ್ ಒಚ್ಚಿದ್ ಕೊರ್ತಿನ ಸತ್ಯೊನು ಎಡ್ಡೆಂತಿನ ಅಂದ್‌ದ್ ತೆರಿದ್ ನಮಡುಪ್ಪು ಪರಿಶುದ್ಧಾತ್ಮೊಡ್ದು ಕಾತೊನ್ಲ.

15ಆಸ್ಯ ಸೀಮೆದ ಮಾತೆರ್ಲಾ ಎನನ್ ಕೈ ಬುಡಿಯೆರಂದ್‌ದ್ ಈ ತೆರಿದ. ಐಟ್ಟ್ ಫುಗೇಲೆಲಾ ಹೆರ್ಮೊಗೇನೆಲಾ ಸೇರ್ದೆರ್.

16ಒನೇಸಿಫೊರನ ಇಲ್ಲದಾಕುಲೆಗ್ ಕರ್ತವೆ ತನ ಕರುಣೆನ್ ತೋಜಾವಡ್, ದಾಯೆಗಂದ್ಂಡ ಆಯೆ ಅಪಗಪಗ ಎನ ಕೈತಲ್‌ ಬತ್ತ್‌ದ್ ಎಂಕ್ ಉತ್ತೇಜನ ಕೊರಿಯೆ. ಯಾನ್ ಸಂಕಲೆಡ್ ಉಲ್ಲೆ ಅಂದ್‌ದ್ ನಾಚಿಗೆ ಮಲ್ತ್‌ಜೆ.

17ಆಯೆ ರೋಮುಗು ಬತ್ತಿ ಕೂಡ್ಲೆ ಯಾನ್ ಆಯಗ್ ತಿಕ್ಕುನ ಮುಟ್ಟ ದಿಂಜ ಆಸಕ್ತಿಡ್ ಆಯೆ ಎನನ್ ನಾಡಿಯೆ.

18ಕ್ರಿಸ್ತೆ ಬರ್ಪಿನ ದಿನೊಟು ಕರ್ತವೆ ಆಯಗ್ ಕರುಣೆ ತೋಜಾವಡ್. ಬೊಕ್ಕ ಆಯೆ ಎಫೆಸೊಡು ಎಂಕ್ ಏತ್ ಸಹಾಯ ಕೊರಿಯೆ ಅಂದ್‌ದ್ ನಿಕ್ಕ್‌ಲಾ ಸರಿಯಾದ್ ಗೊತ್ತುಂಡು.

Jump to: Chapter 2 →