2 Timothy 4

Tulu (ಪೊಸ ಒಡಂಬಡಿಕೆ)

← Chapter 3 Jump to:

1ದೇವೆರೆ ಎದುರುಲಾ ಬೊಕ್ಕ ಬದುಕುನಾಕುಲೆಗ್ಲಾ ಸೈತಿನಾಕುಲೆಗ್ಲಾ ನ್ಯಾಯತೀರ್ಪೆರೆ ಉಪ್ಪು ಯೇಸು ಕ್ರಿಸ್ತ ಎದುರುಲಾ ಆಯೆ ಬರ್ಪಿನೆನ್ಲಾ ಆಯನ ರಾಜ್ಯದ ಮಿತ್ತ್‌ಲಾ ಆಜ ದೀದ್ ಯಾನ್ ನಿಕ್ಕ್ ಪನ್ಪಿನಿ ದಾನೆಂದ್ಂಡ,

2ದೇವೆರೆ ಪಾತೆರೊನು ಸಾರಿಲ, ಅನುಕೂಲದ ಸ್ಥಿತಿ ಇತ್ತ್ಂಡಲಾ ಇಜ್ಜಿಡಲಾ ಐಟ್ಟ್ ಆಸಕ್ತಿಡುಪ್ಪುಲ. ತಾಳ್ಮೆಡ್ ತಿದ್ದ್‌ಲ, ಶಿಕ್ಷೆ ಕೊರ್ಲ, ಎಚ್ಚರಿಕೆ ಕೊರ್ಲ, ಬೊಕ್ಕ ಎಡ್ಡೆ ಬೋಧನೆನ್ ಕೊರ್ದು ಅಕ್ಲೆಗ್ ಉಮೇದ್ ಕೊರ್ಲ.

3ದಾಯೆಗಂದ್ಂಡ ಜನೊಕುಲು ಸತ್ಯ ಇತ್ತಿ ಬೋಧನೆಗ್ ಕೆಬಿ ಕೊರಂದಿನಾಕುಲಾದ್, ತನ್ಕುಲೆಗ್ ಬೋಡಿತ್ತಿನೆನ್ ಕೇನುಲೆಕ್ಕ ಇತ್ತಿ ದುರಾಶೆಲೆಗ್ ಅನುಕೂಲವಾಯಿ ಬೋಧಕರೆನ್ ದೀವೊನ್ವೆರ್.

4ಅಕುಲು ಸತ್ಯ ಬೋಧನೆಗ್ ಕೆಬಿ ಕೊರಂದೆ ಕಟ್ಟ್ ಕತೆಕ್ಲೆನ್ ಕೇನರೆ ಪೋವೆರ್.

5ಆಂಡ ಈ ಮಾತೆಟ್ಟ್ ಜಾಗ್ರತೆದಾಯೆ ಆದುಪ್ಪುಲ. ಕಷ್ಟ ತಾಳೊಂದು ಸುವಾರ್ತೆದ ಕೆಲಸೊನು ಮಲ್ಪುಲ. ನಿಕ್ಕ್ ಒಚ್ಚಿದ್ ಕೊರಿನ ಸೇವೆನ್ ಸರಿಯಾದ್ ಮಲ್ಪುಲ.

6ಯಾನಾಂಡ ಇತ್ತೆನೇ ನೀರ್‌ದ ಲೆಕ್ಕ ಅರ್ಪಣೆ ಆವೊಂದುಲ್ಲೆ. ಯಾನ್ ಈ ಲೋಕೊಡ್ದು ಪೋಪಿನ ಸಮಯ ಕೈತಲ್‌ ಬತ್ತ್ಂಡ್.

7ಯಾನ್ ಎಡ್ಡೆ ಉರ್ಡಾಟೊನು ಮಲ್ತ್‌ದೆ. ಎನ ಬಲ್ಪಾಟೊನು ಮುಗಿಪಾದೆ ಬೊಕ್ಕ ಕ್ರಿಸ್ತ ನಂಬಿಕೆನ್ ಒರಿಪಾವೊಂದೆ.

8ನೀತಿವಂತೆರೆಗ್ ತಿಕ್ಕುನ ಜಯಮಾಲೆ ಎಂಕ್ ದುಂಬಗ್ ತಯಾರಾದುಂಡು. ಅವೆನ್ ನೀತಿಡ್ ನ್ಯಾಯತೀರಿಸುನ ಕರ್ತವೆ ಆ ದಿನೊಟು ಎಂಕ್ ಕೊರ್ಪೆ. ಎಂಕ್ ಮಾತ್ರತ್ತಂದೆ ಆಯೆ ಬರ್ಪಿನೆನ್ ಪ್ರೀತಿಡ್ ಎದುರು ತೂವೊಂದುಪ್ಪುನ ಪ್ರತಿ ಒರಿಯಗ್ಲಾ ಕೊರ್ಪೆ.

9ಎನ ಕೈತಲ್‌ ಬೇಗ ಬರಿಯೆರೆಗ್ ಪ್ರಯತ್ನ ಮಲ್ಪುಲ.

10ದಾಯೆಗಂದ್ಂಡ ದೇಮೆ ಈ ಲೋಕೊನು ಪ್ರೀತಿ ಮಲ್ತ್‌ದ್ ಎನನ್ ಬುಡ್ದು ಥೆಸ್ಸಲೋನಿಕೊಗು ಪೋಯೆ. ಕ್ರೆಸ್ಕೆ ಗಲಾತ್ಯೊಗ್ಲಾ ತೀತೆ ದಲ್ಮಾತ್ಯೊಗ್ಲಾ ಪೋಯೆರ್.

11ಲೂಕೆ ಮಾತ್ರ ಎನಡೊಪ್ಪ ಉಲ್ಲೆ. ಈ ಬನ್ನಗ ನಿನಡೊಪ್ಪ ಮಾರ್ಕನ್ ಲೆತ್ತೊಂದು ಬಲ. ಆಯೆ ಎನ ಸೇವೆಡ್ ಪ್ರಯೋಜನದಾಯೆ ಆದುಲ್ಲೆ.

12ತುಖಿಕನ್ ಎಫೆಸೊಗು ಕಡಪುಡುದೆ. ತ್ರೋವೊಡು ಯಾನ್ ಕರ್ಪನ ಕೈತಲ್‌ ಬುಡ್ದು ಬೈದಿನ ಎನ ಮೇಲಂಗಿನ್ ಕನವೆರೆ ಮದಪಡ. ಎನ ಪುಸ್ತಕೊನು ಬೊಕ್ಕ ಮುಖ್ಯಾದ್ ಚರ್ಮದ ಪತ್ರಿಕೆನ್ಲಾ ಪತ್ತೊಂದು ಬಲ.

14ತಾಮ್ರದ ಬೇಲೆದ ಅಲೆಕ್ಸಾಂದ್ರೆ ಎಂಕ್ ಬಾರಿ ಉಪದ್ರ ಕೊರಿಯೆ. ಕರ್ತವೆ ಆಯನ ಕೆಲಸೊಗು ತಕ್ಕ ಪ್ರತಿಫಲ ಕೊರ್ಪೆ.

15ಈಲಾ ಆಯನ ಸಂಗತಿಡ್ ಎಚ್ಚರಿಕೆ ಆದುಪ್ಪುಲ. ಆಯೆ ಎಂಕುಲೆ ಪಾತೆರೊಲೆಗ್ ದಿಂಜ ಎದುರುಂತಿಯೆ.

16ಯಾನ್ ಸುರುತ್ತ ಸರ್ತಿ ನ್ಯಾಯಾಧಿಪತಿ ಎದುರು ಉಂತುನಗ ಎನಡೊಪ್ಪ ಏರ್ಲಾ ಬತ್ತಿಜೆರ್. ಮಾತೆರ್ಲಾ ಎನನ್ ಬುಡ್ದು ಪೋಯೆರ್. ಅವೆನ್ ಅಕ್ಲೆ ಲೆಖ್ಖೊಗು ಸೇರಿಸಾವಂದೆ ಉಪ್ಪಡ್.

17ಆಂಡ ಕರ್ತವೆ ಎನ ಕಡೆಟ್ಟ್ ಉಂತುದು, ಎನನ್ ಬಲ ಪಡೆಪಾದ್, ಎನಡ್ದ್ ಸುವಾರ್ತೆ ಪೂರ್ತಿ ಆದ್ ಸಾರಿಯೆರೆಲಾ ಬೊಕ್ಕ ಪಿದಯಿದ ಜನೊಕುಲೆಗ್ ಕೇನುಲೆಕ್ಕಲಾ ಮಲ್ತೆ. ಅವು ಅತ್ತಂದೆ ಆಯೆ ಎನನ್ ಸಿಮ್ಮದ ಬಾಯಿಡ್ದ್ ತಪ್ಪಾಯೆ.

18ಯಾನ್ ಒವುಲಾ ಹಾಳ್ ಕಾರ್ಯೊಲೆನ್ ಮಲ್ಪಂದಿಲೆಕ್ಕ ಕರ್ತವೆ ಎನನ್ ತಪ್ಪಾದ್ ತನ ಪರಲೋಕ ರಾಜ್ಯೊಗು ಮುಟ್ಟುನೆಂಗೆ ಕಾಪುವೆ. ಆಯಗ್ ಏನಿತ್ಯೇನಿಗ್ಲಾ ಮೈಮೆ ಆವಡ್, ಆಮೆನ್.

19ಪ್ರಿಸ್ಕಿಲಗ್ಲಾ, ಅಕ್ವಿಲಗ್ಲಾ ಒನೇಸಿಫೊರನ ಇಲ್ಲದಾಕುಲೆಗ್ಲಾ ವಂದನೆ ತೆರಿಪಾಲ.

20ಎರಸ್ತೆ ಕೊರಿಂಥ್ಯೊಡು ಉಂತಿಯೆ. ತ್ರೋಫಿಮಗ್ ಸೌಖ್ಯದಾಂತಿನೆಡ್ದ್ ಆಯನ್ ಮಿಲೇತುಡು ಬುಡ್ದು ಬತ್ತೆ.

21ಚಳಿಕಾಲೊಡ್ದು ದುಂಬು ಇಡೆಗ್ ಬರಿಯೆರೆಗ್ ಪ್ರಯತ್ನ ಮಲ್ಪುಲ. ಯುಬೂಲೆ, ಪೊದೆಯೆ, ಲೀನೆ, ಕ್ಲೌದೀಯೆಲಾ ಅತ್ತಂದೆ ಬೇತೆ ಮಾತ ಸಹೋದ್ರೆರ್‌ಲಾ ನಿಕ್ಕ್ ವಂದನೆ ಮಲ್ಪುವೆರ್.

22ಕರ್ತವೆ ನಿನ ಆತ್ಮಡೊಪ್ಪ ಉಪ್ಪಡ್. ಆಯನ ದಯ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್.

← Chapter 3 Jump to: