2 Timothy 3

Tulu (ಪೊಸ ಒಡಂಬಡಿಕೆ)

← Chapter 2 Jump to: Chapter 4 →

1ಆಂಡ ಕಡೆ ದಿನೊಕುಲೆಡ್ ಬಾರಿ ಭಂಗದ ಕಾಲ ಬರು ಇನ್ಪಿನೆನ್ ತೆರಿಯೊನ್ಲ

2ಜನೊಕುಲು ತನ್ಕುಲೆನೇ ಪ್ರೀತಿ ಮಲ್ಪುನಾಕುಲು, ಕಾಸ್‌ದಾಸೆದಾಕುಲು, ಬೂಟುಲಾ ಹೆಚ್ಚಾಳ್ಮೆ ಇತ್ತಿನಾಕುಲು, ದೂಷಣೆ ಮಲ್ಪುನಾಕುಲು, ಅಪ್ಪೆಅಮ್ಮೆ ಪಂಡಿನೆನ್ ಕೇನಂದಿನಾಕುಲು, ಉಪಕಾರ ಎನ್ನಂದಿನಾಕುಲು, ಅಶುದ್ಧದಾಕುಲು,

3ಪ್ರೀತಿದಾಂತಿನಾಕುಲು, ಸಮಾಧಾನ ಆವಂದಿನಾಕುಲು, ಚಾಡಿ ಪನ್ಪಿನಾಕುಲು, ಸ್ವಸ್ಥ ಬುದ್ಧಿದಾಂತಿನಾಕುಲು, ಕ್ರೂರೆರ್, ಎಡ್ಡೆಂತಿನೆನ್ ಪ್ರೀತಿ ಮಲ್ಪಂದಿನಾಕುಲು,

4ದೇವೆರೆನ ಪೋಡಿಗೆದಾಂತಿನಾಕುಲು, ಹೆಮ್ಮೆದಾಕುಲು, ಮೂರ್ಖೆರ್, ದೇವೆರೆನ್ ಪ್ರೀತಿ ಮಲ್ಪುನೆಡ್ದ್ ಹೆಚ್ಚಾದ್ ಭೋಗೊಲೆನ್ ಪ್ರೀತಿ ಮಲ್ಪುನಾಕುಲು,

5ಭಕ್ತಿದ ವೇಷೊಡಿತ್ತ್‌ದ್ ಐತ ಬಲೊನು ತಿರಸ್ಕಾರ ಮಲ್ಪುನಾಕುಲು ಆದುಪ್ಪೆರ್. ಇಂಚಿತ್ತಿನಾಕುಲೆನ ಸಹವಾಸ ಮಲ್ಪಡ.

6ಅಕ್ಲೆಡ್ ಕೆಲವು ಜನ ಇಲ್ಲ್ ಇಲ್ಲಗ್ ಪೊಗ್ಗುದು, ಪಾಪೊಲೆಡ್ ದಿಂಜಿದ್ ಬೊಕ್ಕ ತರತರತ ಆಸೆಡ್ ಮುರ್ಕುದಿನ ಬುದ್ಧಿದಾಂತಿ ಪೊಂಜೊವುಲೆನ್ ವಶ ಮಲ್ಪುನಾಕುಲು ಮೊಕ್ಲೆಡೊಪ್ಪ ಸೇರ್ದುಪ್ಪುವೆರ್.

7ಇಂಚಿತ್ತಿ ಪೊಂಜೊವುಲು ಏಪಲಾ ಪೊಸ ಬೋಧನೆಲೆ ಪಿರವು ಪೋಪೆರ್. ಆಂಡ ಸತ್ಯೊನು ಏಪೊಗ್ಲಾ ಅರ್ಥ ಮಲ್ತೊನ್ಜೆರ್.

8ಯನ್ನ, ಯಂಬ್ರ, ಇನ್ಪಿನಾಕುಲು ಮೋಶೆಗ್ ಎದುರುಂತಿಲೆಕ್ಕನೆ ಮೊಕುಲುಲಾ ಸತ್ಯೊಗು ಎದುರುಂತುವೆರ್, ಬುದ್ಧಿಡ್ ಹಾಳಾಯಿನಾಕುಲುಲಾ ಯೇಸು ಮಿತ್ತ್ ದೀತಿ ನಂಬಿಕೆಡ್ ತೆಟ್ಟ್‌ದ್ ಪೋಯಿನಾಕುಲಾದುಲ್ಲೆರ್.

9ಆಂಡ ಅಕ್ಲೆ ಪ್ರಯತ್ನೊಲು ನನ ದುಂಬಗ್ ಹೆಚ್ಚ್ ಬಾಳಂದೆ ಆ ಯನ್ನ ಬೊಕ್ಕ ಯಂಬ್ರೆನ ದುರ್ಬುದ್ಧಿ ಮಾತೆರೆಗ್ಲಾ ತೋಜಿಲೆಕ್ಕ ಮೊಕ್ಲೆನಲಾ ತೋಜಿದ್ ಬರು.

10ಈಯಾಂಡಲಾ ಎನ ಬೆರಿ ಬರ್ಪಿನಾಯೆ ಆದ್ ಎನ ಬೋಧನೆ, ನಡತೆ, ಉದ್ದೇಶ, ನಂಬಿಕೆ, ತಾಳ್ಮೆ, ಪ್ರೀತಿ, ಸಹನೆ ಉಂದೆನ್ ಮಾತ ತೆರಿದ.

11ಅಂತಿಯೋಕ್ಯಡ್, ಇಕೋನ್ಯಡ್, ಲುಸ್ತ್ರಡ್ ಯಾನ್ ಏತ್ ಭಂಗೊನ್ಲಾ, ಕಷ್ಟೊನ್ಲಾ ಅನುಭವ ಮಲ್ತ್‌ದೆ ಅಂದ್‌ದ್ ನಿಕ್ಕ್ ಗೊತ್ತುಂಡು. ಈ ಮಾತ ಕಡೆಟ್ಟ್ ಯಾನ್ ಎಂಚೆಂಚಿತ್ತಿನ ಭಂಗೊಲೆನ್ ತಾಳೊಂದು ಉಲ್ಲೆ ಇನ್ಪಿನೆನ್ಲಾ ಈ ತೆರಿದ, ಬೊಕ್ಕ ಈ ಮಾತ ಕಷ್ಟೊಲೆಡ್ ಕರ್ತವೆ ಎನನ್ ಬುಡ್ಪಾಯೆ.

12ಅಂದ್, ಕ್ರಿಸ್ತ ಯೇಸುಡು ಭಕ್ತಿದ ಜೀವನ ಮಲ್ಪೊಡು ಅಂದ್‌ದ್ ಆಸೆ ಮಲ್ಪುನ ಪ್ರತಿಯೊರಿಲಾ ಭಂಗೊನು ಅನುಭವ ಮಲ್ಪೊಡೇ.

13ಆಂಡ ದುಷ್ಟೆರ್‌ಲಾ, ವಂಚನೆದಾಕುಲುಲಾ, ಬಾಕಿದಾಕುಲೆನ್ ಮೋಸ ಮಲ್ತೊಂದು ಅಕುಲೇ ಕಡೆಕ್ಕ್ ಮೋಸೊಗು ಬೂರ್ದು ಹೆಚ್ಚ್ ಹೆಚ್ಚ್ ಹಾಳ್ ಆದ್ ಪೋಪೆರ್.

14ಈಯಾಂಡ ಕಲ್ತ್‌ದ್ ದೃಢಾದ್ ನಂಬುನ ಬೋಧನೆಡ್ ನಿಲೆ ಆದುಪ್ಪುಲ. ನಿಕ್ಕ್ ಏರ್ ಕಲ್ಪಾದಿನಿ ಅಂದ್‌ದ್ ಈ ತೆರಿದ. ಈ ಎಲ್ಲಿಡ್ದಿಂಚಿಲಾ ಪರಿಶುದ್ಧ ಗ್ರಂಥೊಲೆನ್ ಕಲ್ತ್‌ದ ಅತ್ತಾ.

15ಆ ಗ್ರಂಥೊಲು ಕ್ರಿಸ್ತ ಯೇಸುಡುಪ್ಪು ನಂಬಿಕೆಡ್ದ್ ರಕ್ಷಣೆನ್ ಪಡೆಯುನ ಗೇನೊನು ಕೊರ್ಪಿನೆಕ್ಕ್ ಸಾದ್ಯ ಉಂಡು.

16ದೇವೆರೆ ಆತ್ಮಡ್ದ್ ಉಂಡಾಯಿನ ಒಂಜೊಂಜಿ ವಾಕ್ಯ ನಮನ್ ಬೋಧನೆ ಮಲ್ಪುನೆಕ್ಕ್‌ಲಾ, ನಂಕ್ ಎಚ್ಚರಿಕೆ ಕೊರ್ಪಿನೆಕ್ಕ್‌ಲಾ ನಮನ್ ತಿದ್ದುನೆಕ್ಕ್‌ಲಾ, ನೀತಿದ ಶಿಕ್ಷೆಗ್ಲಾ ಪ್ರಯೋಜನ ಆದುಂಡು.

17ಅಂಚಾದ್ ದೇವೆರೆ ಜನೊಕುಲು ಮಾತ ಎಡ್ಡೆ ಕೆಲಸೊಗು ಪರಿಪೂರ್ಣೆರಾದ್ ತಯಾರಾದುಪ್ಪುವೆರ್.

← Chapter 2 Jump to: Chapter 4 →