Galatians 2

Tswana (BAEBELE e e Boitshepo) 1992

← Chapter 1 Jump to: Chapter 3 →

1E rile dinyaga di le 14 di sena go feta, ka ba ka tlhatlogela kwa Jerusalema, ke na le Barenabase, Tito le ene ke na nae.

2Ka bo ke tlhatloga ka tshenolo; ka baya fa pele ga bone Mafoko a a Molemo, a ke a rerang mo go Baditšhaba; mme ya bo e le kwa thoko fa pele ga ba ba itsegeng fela, gore e se re kgotsa ka fitlhela ka bo ke sianela lefela, kgotsa ke ne ke sianetse lefela.

3Mme le fa e le ene Tito yo ke ne ke na nae, e le Mogerika, ga a a ka a kgolelwa go rupisiwa.

4Mme mo re ganne ka ntlha ya bakaulengwe ba e seng bone, ba ba lerilweng ka bonongwane, ba tla ka bonongwane go tlhola boitaolo jo re nang najo mo go Keresete Jesu, gore ba re tsenye mo kgolegong.

5Mme bao, le fa e le ka lobaka lwa nako e le nngwe fela, ga re a ka ra ba ikisetsa tlase ka go ba ineela; gore boammaaruri jwa Mafoko a a Molemo bo nnele ruri mo go lona.

6Mme bone ba ba neng ba kaiwa ba le sengwe – le fa ba ka bo ba ne ba le eng, e be e se sepe mo go nna; Modimo ga o amogele bomangmang jwa motho – ka re, bone ba ba itsegeng ga ba a ka ba nthusa ka sepe;

7nnyaa; e a re ba fitlhela ke neetswe Mafoko a a Molemo a ba bokgola, fela jaaka Petere o ne a neetswe Mafoko a a Molemo a bogwera.

8– Gonne yo o baakantseng Petere, a mmakanyetsa boaposetole jwa bogwera, le nna o mpaakanyeditse go ya kwa go Baditšhaba.

9E rile ba lemoga tshegofatso e ke e neilweng, Jakobe, le Kefase, le Johane, ba ba itsegeng fa e le maotwana, ba neela nna le Barenabase diatla tsa bolekane, gore re ye kwa go Baditšhaba, mme bone ba ye go ba bogwera.

10Mme ba eletsa fela gore re gakologelwe bahumanegi; mo e leng gone le nna ke ne ke tlhoafaletse go go dira.

11E rile Kefase a fitlha mo Antioke, ka mo ganetsa mo matlhong, ka a fitlhelwa a le molato.

12Gonne e rile pele bangwe ba ba tswang kwa go Jakobe ba ise ba tle, a bo a ja fela le Baditšhaba; e rile bao ba sena go tla a ikgogona, a itomolola ka a boifa ba e leng ba bogwera.

13Bajuta ba bangwe le bone ba itimokanya nae; le ene Barenabase a ba a tla a fenngwa ke boitimokanyo jwa bone.

14Mme e rile ke fitlhela ba sa sepela ka tshiamo, ka fa boammaaruring jwa Mafoko a a Molemo, ka raya Kefase fa pele ga bone botlhe ka re: “Fa wena yo o leng Mojuta, o tshela jaaka Baditšhaba, e seng jaaka Bajuta, o patelela Baditšhaba jang gore ba tshele jaaka Bajuta?”

15Rona, e re ka re le Bajuta tlholegong, re se baleofi ba Baditšhaba,

16le fa go ntse jalo, re ntse re itse fa motho a sa siamisiwe ka ditiro tsa molao, fa e se ka tumelo mo go Jesu Keresete, le rona ra dumela mo go Keresete Jesu, gore re siamisiwe ka tumelo mo go Keresete, e seng ka ditiro tsa molao; gonne ga go motho ope yo o ka siamisiwang ka ditiro tsa molao.

17Mme fa e rile re senka go siamisiwa mo go Keresete, le rona ka rosi ra fitlhelwa re le baleofi, a ke go re, Keresete ke modiredi wa boleo? A go se tualo.

18Gonne fa ke bile ke aga dilo tse ke di sentseng, ke a itlhomamisa fa ke le motlodi.

19Gonne e rile ka molao nna ka swa ka ga molao, gore ke tle ke tshelele Modimo.

20Ke bapotswe le Keresete; le fa go ntse jalo ke tshedile; le fa go ntse jalo e be e sa tlhole e le nna, mme ke Keresete o tshedileng mo go nna; botshelo jo ke bo tshedileng jaanong mo nameng, ke bo tshelela mo tumelong, e bong tumelo e e mo go Morwa Modimo, yo o nthatileng, a ba a intshetsa nna.

21Ga ke dire tshegofatso ya Modimo go nna lefela, gonne fa tshiamo e eme ka molao, foo Keresete o tlaa ba a swetse lefela.

← Chapter 1 Jump to: Chapter 3 →