Hosea 7

Tswana (BAEBELE e e Boitshepo) 1992

← Chapter 6 Jump to: Chapter 8 →

1“E rile ke rata ke ka bo ke fodisa Iseraele, foo boikepo jwa Eferaime jwa senolwa, le bosula jwa Samaria; gonne ba dira maaka; le legodu le tsene mo teng, ditlhopha tsa dinokwane di be di gape kwa ntle.

2Ga ba gopole mo dipelong tsa bone fa ke gakologetswe bosula jotlhe jwa bone; jaana ditiro tsa bone di ba dikile; di fa pele ga sefatlhogo sa me.

3“Ba itumedisa kgosi ka bosula jwa bone, le dikgosana ka maaka a bone.

4Ke bagokafadi botlhe, ba ntse jaaka pesetso e e goteditsweng ke mmesi wa senkgwe; o khutlela molelo go o kgotletsa, go tswa mo go dubeng boupe bo bo bo tsamaye bo bele.

5E rile ka letsatsi la kgosi ya rona, dikgosana tsa itsenya botlhoko ka mogote wa bojalwa jwa mofine, ya otlolola seatla sa yone le basotli.

6Gonne ya re ba laletse batho ba ipaakanye dipelo jaaka pesetso, mmeseletsi wa bone a lale a robetse bosigo jotlhe, mme mo mosong go bo go tuke jaaka molelo o o tutumang.

7“Ba gotetse botlhe jaaka pesetso, mme ba suputsa baatlhodi ba bone, dikgosi tsa bone di ole tsotlhe; ga go na ope mo go bone yo o mpitsang.

8“Eferaime ene o itlhakanya le ditšhaba; Eferaime ke senkgwe se se papetla se se sa pitikololwang.

9Baeng ba supuditse thata ya gagwe, mme ga a go itse; ee, meriri e mebududu e wela mo go ene, mme ga a go itse.

10Boikgodiso jwa ga Iseraele bo supa mo sefatlhogong sa gagwe; le fa dilo tse tsotlhe di ntse jalo, ga ba a boela mo go Jehofa Modimo wa bone, le fa e le go mmatla.

11Eferaime o ntse jaaka lephoi le le boeleele, ga a na tlhaloganyo; ba itse Egepeto, ba ye kwa Asiria.

12Mogang ba tsamayang ke tlaa ba tsharololela lotloa lwa me; ke tlaa ba folosa jaaka dinonyane tsa loapi, ke tlaa ba otlhaya jaaka phuthego ya bone e utlwile.

13“A bo ba latlhega! Gonne ba ntimeletse; a bo ba senyega! Gonne ba ntloletse; le fa ke ne ke rata ke ka bo ke ba rekolola, ba buile maaka ka ga me fela.

14Le gone ga ba a ntelela ka pelo tsa bone, mme ba gogotlega mo malaong a bone; ba phuthegela mabele le bojalwa jwa mofine ba a ntsuololela.

15Le fa ke ba rutile ka ba ka thatafatsa mabogo a bone, le fa go ntse jalo ba ntlhatlhanyetsa bosula fela.

16Ba a boa, mme ga ba boele go ene yo o kwa godimong; ba ntse jaaka bora jo bo laologileng; dikgosana tsa bone di tlaa wa ka tšhaka ka ntlha ya tšararego ya loleme lwa bone; se e tlaa nna tshotlo ya bone mo lefatsheng la Egepeto.

← Chapter 6 Jump to: Chapter 8 →