1 Samuel 11

Tsonga Xitsonga (Bibele) 1929

← Chapter 10 Jump to: Chapter 12 →

1Kutani Nahaxi, wa ka Amoni, a ya dzima mixaxa kusuhi na Yabexe wa Giliyadi ku ya hlasela; kutani vanhu hinkwavo va Yabexe va ku eka Nahaxi: “Endla xinakulobye na hina, hi ta ku tirhela.”

2Nahaxi, wa ka Amoni, a va hlamula, a ku: “Ndzi ta endla xinakulobye na n'wina hi mukhuva lowu: Ndzi ta boxa tihlo ra xinene ra n'wina hinkwenu; hi kona ndzi nga ta veka xisandzu ehenhla ka Vaisraele hinkwavo.”

3Vakulukumba va Yabexe va ku eka yena: “Hi nyike masiku ya ntlhanu na mambirhi, hi ta rhuma tintsumi etikweni hinkwaro ra Israele, kutani loko hi nga kutsuriwi hi munhu, hi ta tinyiketa ka wena.”

4Tintsumi ti ya Gibeya wa Sawulo, ti tivisa tiko marito lawa; kutani tiko hinkwaro ri tlakusa rito ri rila.

5Kambe Sawulo a a vuya emasin'wini a landza tihomu ta yena, kutani a ku: “Tiko leri ri rilela yini hi mukhuva lowu xana?” Kutani va n'wi ambela timhaka leti nga vuriwa hi va Yabexe.

6Kutani Moya wa Xikwembu wu n'wi khoma loko a twile marito lawa; vukari bya yena byi pfurha ngopfu;

7kutani a tlhava tihomu timbirhi a xindla tinyama ta tona, a endla mihluvi, kutani a yi rhumela hi vanhu etikweni hinkwaro ra Israele; a ku: “Un'wana ni un'wana loyi a nga tiki huma ku landza Sawulo na Samiele tihomu ta yena ti ta xindliwa hi mukhuva wolowo.” Kutani nchavo wa Yehovha wu khoma tiko, vanhu va huma kukota munhu un'we.

8Sawulo a va hlaya eBezeki: kutani vana va Israele a va ri 300 000, ni vanhu va Yuda a va ri 30 000.

9Va ku eka tintsumi leti nga fika: “Mi ta va byela sweswo va Yabexe wa Giliyadi, mi ku: ‘Mundzuku, loko dyambu ri hisa hi matimba, mi ta ponisiwa.’ ” Kutani tintsumi ti tlhela, ti ya byela timhaka leti eka va Yabexe, kutani va tsaka.

10Va Yabexe va ku eka Vaamoni: “Mundzuku hi ta tinyiketa ka n'wina kutani mi ta endla ha hina hinkwaswo leswi mi swi rhandzaka.”

11Siku leri tlhandlamaka, Sawulo a avanyisa tiko hi mavandla manharhu, kutani va nghena emixaxeni ya valala hi nkarhi wa ku langutela ka mixo kutani va lwa ni Vaamoni ri ko ri hisa; lava seleke va hangalasiwa; a ka ha salanga vambirhi va ri swin'we.

12Kutani tiko ri ku eka Samiele: “I mani la nga ku: ‘Xana Sawulo u ta hi fuma xana?’ Hi nyikeni vanhu lava hi va dlaya.”

13Kambe Sawulo a ku: “Ku nga ka ku nga dlayiwi munhu siku leri, hikuva namuntlha Yehovha u tirhile ku hlayiseka eIsraeleni.”

14Kutani Samiele a ku eka tiko: “Tanani, a hi yeni Giligala, hi ta tiyisa vuhosi kona.”

15Kavaloko tiko hinkwaro ri ya Giligala, kutani va veka kona Sawulo, a va hosi emahlweni ka Yehovha eGiligala; kutani va tlhava kona magandzelo ya ku khensa emahlweni ka Yehovha; kutani Sawulo ni vanhu hinkwavo va Israele va tsaka ngopfu.

← Chapter 10 Jump to: Chapter 12 →