1 Samuel 29

Tsonga Xitsonga (Bibele) 1929

← Chapter 28 Jump to: Chapter 30 →

1Vafilista va hlengeleta tinyimpi ta vona hinkwato eAfeke; kutani Vaisraele a va govile ekusuhi ni xihlovo lexi nge Yizriele.

2Tihosi ta Vafilista a ti hundza hi madzana ni mavandla hi makume ya madzana; kutani Davhida ni vanhu va yena a va famba endzhaku, va ri na Akixi.

3Kutani tihosi ta Vafilista ti ku: “Vaheveru lava i yini xana?” Akixi a ku eka tihosi ta Vafilista: “A hi Davhida loyi ingi a ri nandza wa Sawulo, hosi ya Israele, loyi ngi a ri na mina masiku layo tala, hambi ma ri malembe; a ndzi kumanga nchumu eka yena, ku suka siku leri a fikeke eka mina ku fika namuntlha.”

4Tihosi ta Vafilista ti n'wi karihela, ti ku eka yena: “Tlherisa munhu loyi, a a muke ekaya ka yena laha u n'wi akiseke kona, a nga ka a nga fambi eku lweni na hina, leswaku a nga tshuki a hundzuka nala wa hina eku lweni. Hikuva u ta kumisa ku yini tinswalo eka hosi ya yena, loko ku nga ri hi tinhloko ta vanhu lava xana?

5A hi Davhida loyi va nga hlamulana eku cineni, va n'wi dzunisa, va ku: “ ‘Sawulo u dlele khume ra madzana, Kambe Davhida u dlele dzana ra madzana!’?”

6Kavaloko Akixi a vitana Davhida a ku eka yena: “Yehovha, wa hanya! U munhu la lulameke, a ndzi ta rhandza ku ku vona u huma u va u nghena na mina enyimpini, hikuva a ndzi kumanga ku biha eka wena ku suka siku leri u ngheneke eka mina ku fika namuntlha; kambe tihosi a ti ku tsakeri?

7Sweswi, tlhela u muka hi ku tsaka leswaku u nga endli nchumu lowo biha emahlweni ka tihosi ta Vafilista.”

8Davhida a ku eka Akixi: “Ndzi endle yini xana? U kume yini eka nandza wa wena, ku sungula siku leri ndzi teke mahlweni ka wena, ku fika namuntlha, leswaku ndzi siveriwa ku ya lwa ni valala va hosi, mufumi wanga xana?”

9Akixi a hlamula, a ku eka Davhida: “Ndza swi tiva, hikuva u lulamile emahlweni ka mina kukotisa ntsumi ya Xikwembu. Ntsena tihosi ta Vafilista ti ku: ‘A nga ka a nga tlhandluki na hina eku lweni.’

10Sweswi, pfuka nimpundzu ni malandza ya hosi ya wena lama teke na wena; mi ta pfuka nimpundzu, kutani kutakuloko ri sungula ku xa, mi ta suka.”

11Sweswo Davhida a pfuka nimpundzu ni vanhu va yena, va suka wa ha ri mixo, va tlhelela etikweni ra Vafilista. Kambe Vafilista va tlhandlukela eYizriele.

← Chapter 28 Jump to: Chapter 30 →