1 Samuel 16

Tsonga Xitsonga (Bibele) 1929

← Chapter 15 Jump to: Chapter 17 →

1Yehovha a ku eka Samiele: “U ta rila Sawulo ku yisa kwihi-ke, loko mina ndzi n'wi cukumetile leswaku a nga ha fumi Israele? Tata rimhondzo ra wena hi mafurha, u famba; ndza ku rhuma eka Yese wa Betlehema hikuva ndzi vonile exikarhi ka vana va Yese loyi a faneleke ku va hosi.”

2Samiele a ku: “Ndzi nga yisa ku yini xana? Sawulo u ta swi tiva, a ndzi dlaya.” Yehovha a ku: “U ta teka thokazi na wena, u ku: ‘Ndzi tile ku ta humesela Yehovha magandzelo.’

3U ta vitana Yese egandzelweni, kutani ndzi ta ku tivisa leswi u fanelaka ku swi endla; u ta ndzi chelela loyi ndzi nga ta ku byela yena.”

4Samiele a endla hilaha Yehovha a nga vula hakona; a ya eBetlehema. Kutani vakulukumba va muti va chava loko va ya hlangana na yena, va ku: “U tele mhaka leyinene xana?”

5A ku: “I mhaka leyinene; ndzi tele ku humesela Yehovha magandzelo; tibasisani, mi ta na mina egandzelweni.” Kutani a basisa Yese ni vana va yena, a va vitanela egandzelweni.

6Kuteloko va nghenile, a vona Eliyabu, a ku: “Kunene muhlawuriwa wa Yehovha u le mahlweni ka yena.”

7Kambe Yehovha a ku eka Samiele: “U nga languti nghohe ya yena, hambi xi ri xiyimo xa yena, hikuva ndzi n'wi cukumetile; Yehovha a nga languti leswi langutiwaka hi vanhu, hikuva vanhu va languta nghohe, kambe Yehovha u languta mbilu.”

8Kutani Yese a vitana Abinadaba, a n'wi tisa emahlweni ka Samiele; yena a ku: “Na yena loyi, Yehovha a nga n'wi hlawulanga.”

9Yese a tisa Xama, kutani Samiele a ku: “Na yena loyi, Yehovha a nga n'wi hlawulanga.”

10Yese a tisa vana va yena va vavanuna va ntlhanu na vambirhi emahlweni ka Samiele, kambe Samiele, a ku eka Yese: “Yehovha a nga hlawulangi vona lava.”

11Samiele a ku eka Yese: “Xana hi wona majaha hinkwawo ya wena-ke?” A ku: “Ku sele ndzisana ya vona, la risaka timbuti.” Kutani Samiele a ku eka Yese: “Rhuma munhu a ya n'wi lava, hikuva hi nga ka hi nga tshami etafuleni loko a nga si ta la.”

12Kavaloko Yese a rhuma ku ya n'wi vita. A a ri wa ribungwanyana, mahlo ya yena a ma sasekile, ni nghohe ya yena a yi sasekile. Yehovha a ku eka Samiele: “Pfuka u n'wi chela hi mafurha, hikuva hi yena loyi.”

13Kavaloko Samiele a teka rimhondzo ra mafurha a n'wi chela exikarhi ka vamakwavo, kutani Moya wa Yehovha wu khoma Davhida, ku sungula siku leri ni ku ya emahlweni, Kavaloko Samiele a pfuka a muka eRhama.

14Moya wa Xikwembu wu tshika Sawulo, kutani a xanisiwa hi moya lowo biha lowu humaka eka Yehovha.

15Malandza ya Sawulo ma ku eka yena: “Waswivo! Moya lowo biha wa Xikwembu wa ku xanisa.

16Hosi ya hina a yi vulavule! Malandza ya wena ma kona emahlweni ka wena; ma ta lava munhu la tivaka ku yimba haripa; kutakuloko moya lowo biha wa Xikwembu wu ta ehenhla ka wena, u ta yimba hi voko ra yena, kutani swi ta ku tsakisa.”

17Kavaloko Sawulo a ku eka malandza ya yena: “Ndzi laveleni-ke munhu la tlhariheke hi ku yimba haripa, mi n'wi tisa eka mina.”

18Un'wana wa malandza ya yena a hlamula, a ku: “Waswivo, ndzi vonile n'wana un'wana wa Yese wa Betlehema, la tivaka ku yimba haripa; i nhenha leyi hlomaka, wa vulavula swinene, u ni miri lowo saseka, kambe Xikwembu xi na yena.”

19Kavaloko Sawulo a rhuma tintsumi eka Yese, a ku eka yena: “Ndzi rhumele Davhida, la risaka timbuti!”

20Kutani Yese a teka mbhongolo leyi rhwexiweke vuswa, ni nghotsa ya vhinyo, ni ximbutana, a swi rhumela Sawulo hi Davhida, n'wana wa yena.

21Kuteloko Davhida a fikile eka Sawulo, a yima emahlweni ka yena, Sawulo a n'wi rhandza ngopfu; kutani Davhida a va mutameri wa matlhari ya yena.

22Kutani Sawulo a rhuma eka Yese, a ku: “Wa nga tshika Davhida a tshama a ndzi tirhela, hikuva u kumile tintswalo emahlweni ka mina.”

23Kutani kakuloko moya lowo biha, lowu humaka eka Xikwembu, wu ri henhla ka Sawulo, Davhida a teka haripa ya yena a yimba, kutani Sawulo a rhula a tsaka, moya lowo biha a wu suka ka yena.

← Chapter 15 Jump to: Chapter 17 →