1 Samuel 9

Tsonga Xitsonga (Bibele) 1929

← Chapter 8 Jump to: Chapter 10 →

1A ku ri ni wanuna wa Benjamini wa nhenha, vito ra yena a a ri Kixi, n'wana Abiele, n'wana Seroro, n'wana Bekorati n'wana Afiya, n'wana wa Mubenjamini.

2A a ri ni n'wana la thyiweke Sawulo; loyi ingi a ri mburhi, a tlula vana va Israele hinkwavo hi ku saseka ka yena; a va tlula hi ku leha, hinkwavo a va fika ekhatleni ri ra yena.

3A ku lahlekile timbhongolo ta matswele ta Kixi, tata wa Sawulo, kutani Kixi a ku eka Sawulo, n'wana wa yena: “Teka un'wana wa malandza, u pfuka u ya lava timbhongolo.”

4A ya hundza entshaveni ya Efrayimi, kutani a tsemakanya etikweni ra Xalixa, kambe a va ti kumanga; va ya hundza etikweni ra Xalima; kutani a ti nga ri kona. Va engeta va famba etikweni ra Benjamini, kambe a va ti kumanga.

5Kuteloko va fikile etikweni ra Sufu, Sawulo a ku eka nandza wa yena loyi ngi a ri na yena: “A hi muke ekaya, hikuva kumbe tatana a nga ha anakanyi timbhongolo, kambe a vavisekela hina.”

6Kutani nandza a ku eka yena: “Waswivo, munhu wa Xikwembu u kona emutini lowu, kambe i munhu la dzuniwaka. Hinkwaswo leswi a swi vulaka swi humelela. Sweswi, a hi yeni kona, kumbe u ta hi tivisa ndlela leyi hi nga ta famba ha vona.”

7Sawulo a ku eka nandza wa yena: “Hi swona, kambe loko hi ya kona, hi ta heleketa yini eka munhu wa Xikwembu xana? Swinkwa a swi kona, emikwameni ya hina, kambe a hi na mihlengo ku yi humesela munhu wa Xikwembu. Hi na yini xana?”

8Nandza a ku eka Sawulo: “Ndzi ni ku avanyisa ka vumune ka xikele ya silivhere; ndzi ta xi nyika munhu wa Xikwembu, kutani u ta hi tivisa ti ndlela ya hina.”

9(Khale ka Vaisraele, loko va ya vutisa Xikwembu, a va ku: “Tanani, a hi yeni ka Muvoni,” hikuva muprofeta wa namuntlha a a thyiwa khale Muvoni.)

10Sawulo a ku eka nandza wa yena: “U vula swona; tana, a hi fambe.” Kavaloko va ya emutini, laha munhu wa Xikwembu ingi a ri kona.

11Kakuloko va tlhandlukela emutini, va kuma vanhwanyana lava humaka eku keni ka mati, va ku eka vona:

12“Xana Muvoni u kona xana?” Va va hlamula, va ku: “U kona le mahlweni ka wena. Hatlisa sweswi, hikuva namuntlha u tile emutini leswi ku nga ni gandzelo leri phahleriwaka tiko exivandleni lexi tlakukeke.

13Kutakuloko mi fikile emutini, mi ta n'wi kuma kunene loko a nga si khandziya exivandleni lexi tlakukeke ku ya dya; hikuva tiko ri nga ka ri nga dyi, a nga si fika, hikuva hi yena la katekisaka magandzelo; kutani lava vitaniweke va dya. Tlhandlukani sweswi, hikuva mi ta hatlisa mi n'wi kuma.”

14Kavaloko va tlhandlukela emutini. Kuteloko va fikile exikarhi ka muti, Samiele a hlangana na vona loko a huma a ku khandziya exivandleni lexi tlakukeke.

15Ku sele siku rin'we, a nga si fika Sawulo, Yehovha a ana a tivisile Samiele, a ku:

16“Mundzuku, enkarhini wolowo, ndzi ta ku rhumela munhu wa tiko ra Benjamini, u ta n'wi chela hi mafurha leswaku a va mufambisi wa tiko ra mina ra Israele, kutani u ta ponisa tiko ra mina emavokweni ya Vafilista; hikuva ku huwelela ka rona ku fikile eka mina.”

17Samiele, kakuloko a vona Sawulo, Yehovha a ku eka yena: “Munhu loyi ndzi ku byeleke timhaka ta yena, hi yena loyi, hi yena la nga ta fuma tiko ra mina.”

18Kavaloko Sawulo a tshinelela Samiele enyangweni, a ku: “U nga ndzi komba laha ku nga ni yindlu ya Muvoni kona?”

19Samiele a hlamula, a ku eka Sawulo: “Hi mina Muvoni; tlhandluka emahlweni ka mina exivandleni lexi tlakukeke, mi ta dya na mina namuntlha, nimixo ndzi ta ku tshika u famba, ndzi va ndzi ku byela hinkwaswo leswi u nga na swona embilwini ya wena.

20Loko ti ri timbhongolo leti ti ku lahlekeleke ku hundzile masiku manharhu namuntlha, u nga tikarhati hikwalaho ka tona, hikuva ti kumiwile. Kambe ku navela hinkwako ka Israele ku ya ka mani xana? A hi ka wena ni ka yindlu hinkwayo ya tata wa wena xana?”

21Sawulo a hlamula, a ku: “A ndzi wa Benjamini xana, wa nyimba leyitsongo ya Israele, kutani ndyangu wa tatana a hi lowutsongo wa mindyangu hinkwayo ya nyimba ya Benjamini-ke? U ndzi byelela yini rito leri xana?”

22Kavaloko Samiele a teka Sawulo ni nandza wa yena, a va nghenisa endlwini, kutani a va veka switshan'weni leswo rhanga exikarhi ka lava vitaniweke, lava lavaka ku va vanhu va makume manharhu.

23Samiele a ku eka musweki: “Phamela xipandzwa lexi ndzi ku nyikeke, lexi ndzi ku byeleke, ndzi ku: ‘Xi veke tlhelo!’ ”

24Kutani musweki a ya teka voko ni leswi nga na rona, a ri veka emahlweni ka Sawulo. Kutani Samiele a ku: “Hi swona leswi u swi vekeriweke; swi veke mahlweni ka wena, u dya, hikuva swi vekeriwe wena enkarhini lowu, loko ndzi vitanile tiko.” Sweswo Sawulo a dya na Samiele siku rero.

25Kutani va suka exivandleni lexi tlakukeke va ngirimela emutini, kutani Samiele a vulavula na Sawulo elwangwini.

26Va pfuka nimixo, kutani loko vurhonga byi tsuvuka, Samiele a vitana Sawulo elwangwini, a ku: “Pfuka, ndzi ta ku tshika u famba.” Kavaloko Sawulo a pfuka, kutani va huma swin'we, yena na Samiele.

27Kakuloko va ha ngirimela, va ri emakun'weni ya muti, Samiele a ku eka Sawulo: “Byela nandza a hundza emahlweni ka hina (kutani a hundza), kambe wena yima sweswi, ndzi ta ku byela rito ra Xikwembu.”

← Chapter 8 Jump to: Chapter 10 →