Acts 12

Tsonga Xitsonga (Bibele) 1929

← Chapter 11 Jump to: Chapter 13 →

1Enkarhini wolowo, hosi Heroda a sungula ku xanisa van'wana va kereke.

2Kutani a dlaya Yakobo, makwavo wa Yohane, hi ripanga.

3Kakuloko a vona leswaku swi tsakisile Vayuda, a engeta a khoma na Petro; a ma ri masiku ya xinkwa lexo kala comela.

4Loko a n'wi khomile, a n'wi nghenisa ekhotsweni, kutani a n'wi nyiketa mitlawa ya mune, ntlawa wun'wana ni wun'wana a wu ri wa mune wa masocha leswaku yi n'wi rindza; a navela ku n'wi humesa emahlweni ka tiko loko Paseka yi hundzile.

5Sweswo, Petro a tshama a languteriwa ekhotsweni. Kambe kereke a yi tiyisela ku n'wi khongelela eka Xikwembu.

6Hi siku Heroda a lavaka ku n'wi humesa emahlweni ka tiko, hi vusiku byebyo, Petro a etlele exikarhi ka masocha mambirhi, a bohiwile hi timpecana timbirhi; kutani valanguteri va nyangwa a va langutela khotso.

7Kambe vonani, ntsumi ya Hosi yi humelela, ku vonakala ku vangama endlwini; kutani yi hlakahla Petro etsheveni, yi n'wi pfuxa, yi ku: “Hatlisa u pfuka.” Kutani timpecana ti wa emavokweni ya yena.

8Ntsumi yi ku eka yena: “Tikhame xisuti, u vehela ni tintanghu ta wena”; kutani a endlisa sweswo. Kambe yi ku eka yena: “Funengela nguvu ya wena u ndzi landza.”

9Kuteloko a humile a yi landzelela, a nga vonisisi leswaku leswi endliwaka hi ntsumi hi swona hi xiviri; kambe a anakanya leswaku u vone mahlori.

10Loko va hundzile ntlawa wo sungula ni lowa vumbirhi, va fika enyangweni ya nsimbhi leyi yisaka emutini; kutani yi tipfulekela vona, va huma, va famba mpfhuka etsendzeleni; kutani ntsumi yi suka eka yena xikan'we.

11Petro, loko a xalamuka, a ku: “Sweswi ndza swi tiva swinene leswaku Hosi yi rhumile ntsumi ya yona, kutani yi ndzi ponisile emavokweni ya Heroda, ni le ku languteleni ka tiko hinkwaro ra Vayuda.”

12Kuteloko a tiyingiserile, a ya endlwini ya Mariya, mana wa Yohane la thyiweke Marka, laha vapfumeri lavo talanyana ingi va hlengeletene kona, va khongela.

13Kakuloko Petro a gongondza enyangweni ya rikupakupa, ku ta wanhwana loyi va nge i Rhoda, a ta yingisela.

14Kuteloko a twile rito ra Petro, a nga pfulangi nyangwa hikwalaho ka ku tsaka ka yena; kambe a tsutsumela ku ya va byela leswaku Petro u kona handle emahlweni ka nyangwa.

15Va ku eka yena: “U ni rihuhu.” Kambe yena a tiyisa leswaku swi tano; kutani va ku: “I ntsumi ya yena.”

16Kambe Petro a ha gongondza; kuteloko va pfurhile va n'wi vona, va hlamala ngopfu.

17Kambe yena a va kwehleta hi voko leswaku va miyela; kutani a va byela hilaha Hosi yi n'wi humeseke ekhotsweni hakona; kambe a ku: “Tivisani Yakobo ni vamakwerhu timhaka teto.” Kutani a huma, a tifambela kun'wana.

18Loko ri xile, dzolonga lerikulu, ri va kona exikarhi ka masocha, leswaku Petro u endlise ku yini.

19Kutani Heroda, kuteloko a n'wi lavisisile, a nga n'wi kumi, a avanyisa masocha, a lerisa leswaku ma dlawa. Kutani a suka eYudiya, a ngirimela eKhezariya, a aka kona.

20Heroda a lava ku lwa ni va Tiri ni Vasidoni; kambe va ta eka yena va twanene; kuteloko va twanene na Blasto, ndhuna leyikulu ya hosi, va kombela ku rhula ka tiko, hikuva tiko ra vona a ri singila etikweni ra hosi.

21Kutani hi siku leri vekiweke, Heroda a funengela tinguvu ta vuhosi, a tshama exiluvelweni xa yena, a vulavula na vona.

22Kutani vanhu va huwelela, va ku: “Rito leri, i ra Xikwembu, a hi ra munhu!”

23Kutani hi nomu lowu, ntsumi ya Hosi yi n'wi ba, hikuva a nga dzunisanga Xikwembu; kutani a dyiwa hi swivungu, a fa.

24Kambe rito ra Xikwembu ri andza, ri hangalaka ngopfu.

25Kutani Barnaba na Sawulo, loko va hetile ntirho wa vona, va suka eYerusalema, va ri na Yohane, la thyiweke Marka.

← Chapter 11 Jump to: Chapter 13 →