Acts 14

Tsonga Xitsonga (Bibele) 1929

← Chapter 13 Jump to: Chapter 15 →

1Pawulo na Barnaba, loko va ri eIkoniya, va nghena kun'we esinagogeni ya Vayuda, va dyondzisa kona, kutani ku pfumela vunyingi lebyikulu bya Vayuda ni bya Vagriki.

2Kambe Vayuda lava nga pfumelangiki va pfuxa vamatiko leswaku timbilu ta vona ti ta karihela vamakwavo.

3Hambiswiritano, va xwa kona masiku layo tala, va vulavula va tshembile Hosi; kambe a yi ri karhi yi tiyisa rito ra tintswalo ta yona hi ku endla swikombiso ni masingita hi mavoko ya vona.

4Kambe vanhu va muti va hambana: Van'wana va yimela Vayuda, van'wana va yimela vaapostola.

5Kakuloko dzolonga ri pfuxiwa hi vamatiko, ni Vayuda, ni tindhuna ta vona ku va endla swo biha, ni ku va khandla,

6vona, loko va twa sweswo, va tsutsumela emitini yin'wana ya Likawoniya, yi nga Listra, na Derbe, ni le matikweni ya kona.

7Kutani va vula Evhangeli kona.

8Kambe munhu a a ri kona eListra ka hari mpfhuka a hume ekhwirini ra mana wa yena a lamele milenge, a nga tivi ku famba.

9A a yingisa leswi vuriwaka hi Pawulo. Yena a n'wi honolela, kutani loko a vona leswaku u ni ku pfumela ka ku hanyisiwa,

10a tlakusa rito, a ku eka yena: “Suka u yima hi milenge ya wena.”

11Kutani a tlula a famba. Vunyingi, loko byi vona leswi endliweke hi Pawulo, byi sungula ku huwelela hi ririmi ra Valikawoniya, va ku: “Swikwembu swi tekile tinghohe ta vanhu, swi xikele eka hina.”

12Kutani Barnaba, a va n'wi vula Zewusi; Pawulo, yena, va ku, i Hermesi, hikuva a a ri yena n'wini wa marito.

13Na yena muprista wa Zewusi, loyi tempele ya yena a yi ri emahlweni ka muti wa vona, a ta ni tihavi ti rhwele tihari ta swikombiso, a ti yisa enyangweni ya muti, a rhandza ku va tlhavela mhamba a ri ni vunyingi.

14Kambe vaapostola Barnaba na Pawulo, loko va twa sweswo, va handzula tinguvu ta vona, va tihoxa exikarhi ka vanhu, va huwelela, va ku:

15“Vavanuna, mi endlisela yini sweswo xana? Kasi na hina hi vanhu lava fanaka na n'wina hi ntumbuluko; kutani ho mi byela leswaku mi tshika timhaka leti ta swahava, ni leswaku mi hundzukela eka Xikwembu lexi hanyaka, lexi nga endla tilo ni misava, ni lwandle, ni swilo hinkwaswo leswi nga eka swona;

16etinxakeni leti hundzeke, xi tshikile matiko hinkwawo, leswaku ma famba hi tindlela ta wona.

17Hambiswiritano, a xi tipfumatanga vumbhoni, hi ku endlela vanhu swinene, ni ku hi nyika timpfula ta tilo ni tinguva ta ndzalo, xi hi andzisela ni swakudya, xi tata timbilu ta hina hi ku tsaka.”

18Kambe, hambi va vula sweswo, va lava ku tsandzeka ku sivela vanhu ku va tlhavela mhamba.

19Kutani ku fika Vayuda lava pfaka hi le Antiyoka na Ikoniya, va kucetela tiko, va khandla Pawulo hi maribye, kutani va n'wi kokela ehandle ka muti, va anakanya leswaku u file.

20Kambe kuteloko vadyondzisiwa va n'wi rhendzele, a pfuka, a nghena emutini wa vona; kutani hi siku leri tlhandlamaka a tifambela eDerbe a ri na Barnaba.

21Kuteloko va vurile Evhangeli emutini lowo, ni ku endla vadyondzisiwa lavo talanyana, va tlhelela eListra na Ikoniya na Antiyoka,

22va tiyisa timbilu ta vadyondzisiwa, va va khongotela ku tiyisela eku pfumeleni, va ri karhi va va ringanisela leswaku hi fanele ku nghena eku fumeni ka Xikwembu hi maxangu layo tala.

23Kutani va va vekela vakulukumba ekerekeni yin'wana ni yin'wana, hi ku khongela ni ku titsona swakudya; kutani va va veka eka Hosi leyi va pfumeleke eka yona.

24Kavaloko va tsemakanya ePisidiya, va ya ePamfiliya.

25Kutani va vula rito ePerge, kutani va rhelela eAtaliya.

26Va suka kona va tlhelela eAntiyoka hi byatso, ku nga laha ingi va nyiketiwile etintswalweni ta Xikwembu, ku ya entirhweni lowu va wu heteke.

27Kuteloko va fikile va hlengeleta kereke va vula hinkwaswo leswi Xikwembu xi swi endleke ha vona, ni hilaha xi nga pfulela matiko hakona nyangwa ya ku pfumela.

28Kutani va xwa kona nkarhi lowo leha ni vadyondzisiwa.

← Chapter 13 Jump to: Chapter 15 →