Acts 6

Tsonga Xitsonga (Bibele) 1929

← Chapter 5 Jump to: Chapter 7 →

1Hi masiku walawo, loko vadyondzisiwa va andzile ngopfu, Vahelenista va dzumadzumela Vaheveru, hikuva vavasati va vona va tinoni a va siyiwa eku nyikiweni ka siku rin'wana ni rin'wana.

2Kutani lava khume na vambirhi va vitana ntshungu wa vadyondzisiwa, va ku: “A swi fanelanga leswaku hi tshika ku vula rito ra Xikwembu hi ya tirha ematafuleni.

3Loko swi ri tano, vamakwerhu, hlawulani vavanuna va ntlhanu na vambirhi exikarhi ka n'wina, lava dzuniwaka, lava teleke Moya lowo Kwetsima ni vutlhari, leswaku hi va veka entirhweni lowo.

4Loko hi ri hina, hi ta tshama hi tiyisela exikhongelweni ni le ntirhweni wa rito.”

5Makungu walawo ma tsakisa ntshungu hinkwawo; kutani va hlawula Stefano, wanuna la teleke ku pfumela ni Moya lowo Kwetsima, na Filipi, na Prokoro, na Nikanoro, na Timoni, na Parmena, na Nikolawo muproselita wa Antiyoka.

6Kutani va va veka emahlweni ka vaapostola kuteloko va khongerile va va tlhandleka mavoko.

7Kutani rito ra Xikwembu ri ri karhi ri andza hi ku ya emahlweni, na vona vadyondzisiwa va andza ngopfu eYerusalema, ku pfumela ni vaprista lavo tala.

8Kambe Stefano a a tele tintswalo ni matimba; kutani a endla mahlori ni swikombiso leswikulu exikarhi ka tiko.

9Kambe van'wana va sinagoga leyi vuriwaka ya Vantshunxiwa, ni van'wana va va Kirene ni va Aleksandriya, swin'we ni Vayuda, ni van'wana va Kilikiya ni va Asiya, va yima, va kanetana na Stefano.

10Kambe va hluleka ku lwa ni vutlhari bya yena ni moya lowu a nga vulavula ha wona.

11Kutani va kucetela vanhu, lava nga ku: “Hi n'wi twile a vulavula timhaka leti sandzaka Muxe ni Xikwembu.”

12Va pfuxa tiko, ni vakulukumba, ni vatsari, kutani va n'wi wela ehenhla, va n'wi khoma, va n'wi yisa ehubyeni;

13kambe va humesa timbhoni leto hemba leti nga ku: “Munhu loyi, a nga tshiki ku vulavula timhaka leti sandzaka xivandla lexi xa ku kwetsima ni nawu;

14hikuva hi n'wi twile a ku: Yesu yeloyi wa Nazareta, u ta lovisa xivandla lexi, a hundzuluxa ni mikhuva leyi hi yi nyikiweke hi Muxe.”

15Kutani hinkwavo lava tshameke ehubyeni, loko va n'wi honolela mahlo, va vona mombo wa yena wu fana ni mombo wa ntsumi.

← Chapter 5 Jump to: Chapter 7 →