Acts 26

Tsonga Xitsonga (Bibele) 1929

← Chapter 25 Jump to: Chapter 27 →

1Kutani Agripa a ku eka Pawulo: “U nga tivulavulela.” Kavaloko Pawulo a tshambuluta voko, a tihlamulela, a ku:

2“Etimhakeni hinkwato leti ndzi hehliwaka ha tona hi Vayuda, wena Hosi Agripa, ndzi ri ndzi katekile loko ndzi ta tihlamulela emahlweni ka wena namuntlha:

3ngopfu hikuva u tivisisa mikhuva hinkwayo ya Vayuda, ni timhaka hinkwato leti tengiweke exikarhi ka vona. Hikwalaho ndzi ku khongelaka, ndzi ku, wanga ndzi yingisa hi vukhwatsi:

4“Loko ti ri ta ku hanya ka mina hilaha ndzi nga famba hakona exikarhi ka tiko ra rikwerhu, le Yerusalema ka ha ri mpfhuka ndzi ri lontsongo Vayuda hinkwavo va ti tiva.

5Hikuva i khale va ndzi tiva, loko va rhandza ku vula vumbhoni leswaku ndzi hanyile hi mukhuva wa Vufarisi, lowu nga wona lowunene hi ku tlurisa, eku gandzeleni ka hina.

6Kutani sweswi, ndzi avanyisiwa hikwalaho ka ku tshemba ku hlayela loku tshembisiweke vatatana hi Xikwembu,

7koloko tinxaka ta hina leta khume na timbirhi ti tshembaka leswaku ti ta fikela kona, ti ri karhi ti tiyisela ku gandzela Xikwembu vusiku ni nhlekanhi; hikwalaho ka ku tshemba loku, wena Hosi Agripa, ndzi hehliwaka hi Vayuda.

8Hikwalaho ka yini eka n'wina wo nge a swi endleki leswaku Xikwembu xi nga pfuxa vafi xana?

9“Loko ndzi ri mina, a ndzi anakanyile leswaku ndzi fanele ku endla leswo tala ku lwa ni vito ra Yesu wa Nazareta.

10Kunene ndzi endlise sweswo Yerusalema, ndzi pfalela vakwetsimi lavo tala ekhotsweni, hi matimba lawa ndzi ma nyikiweke hi vaprista lavakulu; ni siku va dlawaka, na mina a ndzi pfumela.

11Kutani emasinagogeni hinkwawo ndzi va tshinya hakanyingi, ndzi va sindzisa leswaku va sandza, ndzi va xanisa, ni ku fika emitini ya matiko man'wana.

12“Kakuloko ndzi ri karhi ndzi anakanya sweswo, ndzi ku ndzi ya le Damaska hi matimba ni ku lerisa ka vaprista lavakulu, wena hosi, a wu ri nhlekanhi,

13loko ndzi ri endleleni, ndzi vona ku vonakala loku pfaka etilweni, loku tlurisaka dyambu hi ku kwetsima, ku ndzi rhendzela ni lava ngi va famba na mina.

14Kavaloko hi wela ehansi hinkwerhu; kutani ndzi twa rito leri nge eka mina hi ririmi ra Xiheveru: ‘Sawulo, Sawulo, u ndzi xanisela yini? Swa nonon'hwa eka wena ku khadlanya risungunhu.’

15Kavaloko ndzi ku: ‘U mani Hosi?’ A ku: ‘Hi mina Yesu, loyi u n'wi xanisaka.

16Sweswi pfuka, u yima hi milenge, hikuva ndzi tikombisile eka wena leswaku ndzi ku veka nandza ni mbhoni ya timhaka leti u ti voneke ni ya leti ndzi nga ta tivonakisa eka wena hikwalaho ka tona,

17hikuva ndzi ta ku lwela etikweni leri, ni le matikweni lawa ndzi ku rhumelaka eka wona,

18ku ya hanyanyisa mahlo ya vona, leswaku va huma emunyameni va nghena eku vonakaleni, va suka ni le ku fumeni ka Satana ku hundzukela eka Xikwembu, va ta vona ku khomeriwa ka swidyoho swa vona, ni ku averiwa exikarhi ka vakwetsimi, loko va pfumerile eka mina.’

19“Sweswi, wena Hosi Agripa, a ndzi alangi xikombiso lexi xa le tilweni.

20Kambe ndzi sungule ku ambela va Damaska, ni va Yerusalema, ni le tikweni hinkwaro ra Yudiya, ni le ka vamatiko, leswaku va hundzuka, va hundzukela eka Xikwembu, va tirha mitirho leyi fanekelaka ku hundzuka.

21Hi tona timhaka leti Vayuda va ndzi khomeleke tona etempeleni, va lava ku ndzi dlaya.

22Kambe, hikuva ndzi vonile ku pfuniwa hi Xikwembu, ndzi tiyisile ku fikela siku ra namuntlha ku vula vumbhoni eka lavatsongo ni lavakulu; kutani a ndzi vulanga timhaka tin'wana, loko ti nga ri leti Muxe ni vaprofeta va nga te ti ta humelela;

23hileswaku Kriste u ta dlawa, a va yena la rhangaka ku pfuka eku feni, u fanele ku vula ku vonakala eka tiko leri, ni ka matiko.”

24A ku a ha tihlamulela hi timhaka teto, Festo a tlakusa rito, a ku: “Wa hlanya, Pawulo! Ku tiva lokukulu ka wena ka ku hlanyisa.”

25Pawulo a ku: “A ndzi hlanyi, Festo wa mafundza; kambe timhaka leti ndzi ti vulaka, hi leti tiyeke, leti lulameke.

26Hikuva hosi ya ti tiva swinene leti, kutani ndzi ti vula emahlweni ka yona hi ku tiya, hikuva ndza tshemba leswaku a ku na yin'we ya tona leyi sirheleke eka yona, hikuva etimhakeni leti, a ku na nchumu lowu endliweke exihundleni.

27Wena hosi Agripa, xana u pfumela vaprofeta xana? Ndza swi tiva leswaku wa va pfumela.”

28Agripa a ku eka Pawulo: “U kusuhi ni ku ndzi khorwisa leswaku ndzi va Mukriste.”

29Pawulo a ku: “Loko wa nge Xikwembu xi nga endla leswaku ku nga ri wena ntsena, kambe ni hinkwavo lava ndzi yingisaka namuntlha, mi va tanihi mina, a hi kusuhi ntsena, kambe kusuhisuhi ngopfu, ntsena ku nga ri hi ku bohiwa loku!”

30Kuteloko a vulavurile timhaka leti, hosi yi suka, ni hosana, na Berenika ni lava tshameke na vona.

31Kutani loko va ri etlhelo, va byelana va ku: “Munhu loyi, a nga endlangi nchumu lowu fanelaka rifu, hambi ti ri timpecana.”

32Kutani Agripa a ku eka Festo: “Munhu loyi, a a ta tshunxiwa, loko a nga tivekangi eka Khezari.”

← Chapter 25 Jump to: Chapter 27 →