Exodus 40

Tsonga Xitsonga (Bibele) 1929

← Chapter 39 Jump to:

1Kutani Yehovha a vulavula na Muxe, a ku:

2“Hi siku ro rhanga ra n'hweti yo sungula, u ta dzima yindlu, yi nga Tabernakela ya nhlengeletano,

3u nghenisa kona areka ya vumbhoni, u sirhela areka hi nguvu,

4u ta tisa ni tafula, u ri lunghisela swibya swa rona; u tisa ni kandelari, u lumeka timboningo ta yona.

5U ta veka alitari ya nsuku ya mirhi ya risuna emahlweni ka areka ya vumbhoni, kutani u ta vamba nguvu enyangweni ya Tabernakela.

6U ta veka alitari ya ku hisa magandzelo enyangweni ya yindlu ya Tabernakela ya nhlengeletano.

7Kutani u ta veka nkamba exikarhi ka yindlu ya nhlengeletano ni alitari, u chela mati kona.

8U ta rhendzela hinkwako hi xivava u vamba nguvu enyangweni ya xivava.

9Kutani u ta teka mafurha ya ku tota, u tota tabernakela ni swilo hinkwaswo swa yona u yi hlawurisa sweswo ni mitirho hinkwayo ya yona kutani yi ta va yi hlawuriwile.

10U ta tota alitari ya magandzelo ni mitirho hinkwayo ya yona; u hlawula alitari, kutani alitari yi ta va leyi kwetsimaka ngopfu.

11U tota ni nkamba ni xikhato xa wona, u wu hlawula.

12“Kutani u ta tshineta Aroni, ni vana va yena enyangweni ya yindlu ya nhlengeletano, u va hlantswa hi mati,

13kutani u ta ambexa Aroni hi tinguvu leti hlawuriweke, u n'wi tota, u n'wi hlawula leswaku a tirha ntirho wa vuprista emahlweni ka mina.

14U tshineta ni vana va yena, u va ambexa tinguvu;

15u va tota kukota tata wa vona, leswaku va tirha ntirho wa vuprista emahlweni ka mina; ku totiwa ka vona ku ta va veka vaprista hi masiku etinxakeni ta vona.”

16Kutani Muxe a endla hinkwaswo hilaha Yehovha a nga n'wi lerisa hakona.

17Hi siku ro sungula ra n'hweti yo rhanga ya lembe ra vumbirhi, tabernakela yi yimisiwa.

18Muxe a yimisa tabernakela, a veka xifunengeto ni switshamo swa mapulangi, ni timbalelo, a yimisa ni timhandze.

19Kutani a fulela yindlu hi tende, a tlhandleka ehenhla ka yona xifunengeto, hilaha Yehovha a nga lerisa Muxe hakona.

20Kutani a teka vumbhoni a byi nghenisa earekeni; a vehela mimpingu earekeni, kutani a veka vukhongelelo ehenhla ka areka;

21a tisa areka etabernakeleni, a vamba nguvu, a sirhela areka ya vumbhoni ha yona hilaha Yehovha a nga lerisa Muxe hakona.

22Kutani a nghenisa tafula etabernakeleni ya nhlengeletano, en'walungwini ka yindlu, haleno ka nguvu;

23a veka ni swinkwa emahlweni ka Yehovha, a xi lunghisa etafuleni, hilaha Yehovha a nga lerisa Muxe hakona.

24Kandelari, yona a yi veka endlwini ya nhlengeletano, yi lavane ni tafula, edzongeni ra tabernakela.

25Kutani a veka mavoningo emahlweni ka Yehovha, hilaha Yehovha a nga lerisa Muxe hakona.

26A veka alitari ya nsuku endlwini ya nhlengeletano, kusuhi ni nguvu;

27a hisa mirhi ya risuna, hilaha Yehovha a nga lerisa Muxe hakona.

28Kutani a hayeka nguvu enyangweni ya tabernakela.

29Kutani a veka alitari ya magandzelo lama hisiwaka enyangweni ya yindlu, ya tabernakela ya nhlengeletano, a humesa magandzelo lama hisiwaka, hilaha Yehovha a nga lerisa Muxe hakona.

30Kutani a veka nkamba exikarhi ka yindlu ya nhlengeletano ni alitari, a va a chela mati ka wona leswaku va hlamba kona.

31Muxe, na Aroni ni vana va yena, va hlamba mavoko ni milenge.

32Kakuloko va nghena endlwini ya nhlengeletano, ni loko va tshinelela alitari, va hlamba hilaha Yehovha a nga lerisa Muxe hakona.

33Kutani a yimisa xivava lexi rhendzelekelaka tabernakela ni alitari, kutani a hayeka nguvu enyangweni ya xivava; hi sweswo Muxe a hetaka ntirho lowu.

34Kutani papa ri funengeta Yindlu ya nhlengeletano, kutani ku kwetsima ka Yehovha ku tata Yindlu.

35Swi tsandza na Muxe a hluleka ku nghena endlwini ya nhlengeletano hikuva papa a ri le henhla ka yona ni ku kwetsima ka Yehovha a ku tata Yindlu.

36Kutani loko papa ri tlakuka ehenhla ka Yindlu, vana va Israele va famba; swi endlisa sweswo eku fambeni hinkwako ka vona.

37Kambe loko papa ri nga tlakuki, a va nga suki ku fikela siku leri papa ri tlakukaka ha rona.

38Hikuva papa ra Yehovha a ri tshama ehenhla ka tabernakela ninhlekanhi, kutani nivusiku, a ku voninga ndzilo epapeni emahlweni ka yindlu hinkwayo ya Israele, eku fambeni hinkwako ka vona.

← Chapter 39 Jump to: