Exodus 6

Tsonga Xitsonga (Bibele) 1929

← Chapter 5 Jump to: Chapter 7 →

1Kutani Yehovha a ku eka Muxe: “Sweswi, u ta vona leswi ndzi nga ta swi endla eka Faro; hikuva hi voko ra matimba u ta va tshika va famba; hi voko ra matimba u ta va hlongola etikweni ra yena.”

2Xikwembu xi engeta xi vulavula na Muxe, xi ku eka yena: “Hi mina Yehovha.

3Ndzi tikombisile eka Abrahama, ni le ka Isaka, ni le ka Yakobo, ndzi ri Xikwembu xa matimba hinkwawo, kambe vito ra mina ra Yehovha a ri nga tiviwi hi vona.

4Kambe ndzi tiyisile ntwanano wa mina na vona ku va nyika tiko ra Kanana, tiko ra ku luvela ka vona.

5Ndzi yingisile ku huwelela ka vana va Israele, hilaha Vaegipta va va endleke makhumbi hakona; kutani ndzi tsundzukile ntwanano wa mina.

6Hikwalaho u nge eka vana va Israele: Hi mina Yehovha; ndzi ta mi rhula ku tika ka Vaegipta; ndzi mi lwela; ndzi ta mi tshunxa evukhumbini bya vona, ndzi mi kutsula hi voko ra matimba, ni ku avanyisa lokukulu.

7Kutani ndzi ta mi teka, mi va tiko ra mina, ndzi va Xikwembu xa n'wina; mi ta tiva leswaku hi mina Yehovha, Xikwembu xa n'wina, loyi a mi rhulaka ku tika ka Vaegipta;

8kutani ndzi ta mi nghenisa etikweni leri ndzi nga hlambanya, ndzi ku: ‘Ndzi ta ri nyika Abrahama, na Isaka, na Yakobo; ndzi mi nyika rona, yi va ndzhaka ya n'wina. Hi mina Yehovha.’ ”

9Kutani Muxe a vurisa sweswo eka vana va Israele; kambe a va n'wi yingisanga hikwalaho ka ku vilela ka vona, ni vukhumbi bya vona.

10Kutani Yehovha a vulavula na Muxe, a ku:

11“Famba, u ya byela Faro, hosi ya Egipta a tshika vana va Israele va suka etikweni ra yena.”

12Kutani Muxe a vulavula emahlweni ka Yehovha, a ku: “Waswivo, vana va Israele a va ndzi yingisanga; na yena Faro a nga ndzi yingisisa ku yini, leswi ndzi nga ni xirimi?”

13Yehovha a vulavula kambe na Muxe na Aroni, a va rhuma eka vana va Israele, ni le ka Faro, hosi ya Egipta, a va lerisa ku humesa vana va Israele etikweni ra Egipta.

14Hi vona vini va tinyimba ta vatata wa vona: Vana va Rhuveni, mativula ya Israele: Hanoko, na Palu, na Hesironi, na Karimi. Hi tona tinyimba ta Rhuveni.

15Vana va Simiyoni: Yemuwele, na Yamini, na Ohada, na Yakini, na Sohari na Xawulu, n'wana wa nsati wa Mukanana. Hi tona tinyimba ta Simiyoni.

16Mavito ya vana va Levhi, hi tinyimba ta vona, hi lawa: Gerixoni, na Kohata na Merari. Malembe ya ku hanya ka Levhi a ma ri 137.

17Vana va Gerixoni: Libini na Ximeyi, hi tinyimba ta vona.

18Vana va Kohata: Amirama, na Yisihara, na Hebroni, na Uziele. Malembe ya ku hanya ka Kohata a ma ri 133.

19Vana va Merari: Maheli na Muxi. Hi tona tinyimba ta Levhi hi tinxaka ta vona.

20Amirama a teka Yokebedi hahani wa yena, a n'wi velekela Aroni na Muxe. Malembe ya ku hanya ka Amirama a ma ri 137.

21Vana va Yisihara: Kora, na Nefege na Zikri.

22Vana va Uziele: Mixaele, na Elisafani na Sitri.

23Aroni a teka Elixeba, n'wana wa Aminadaba, makwavo wa Nahaxoni, a n'wi velekela Nadabu na Abihu, na Eliyazara na Itamara.

24Vana va Kora: Asiri, na Elikana na Abiyasafa. Hi tona tinyimba ta Vakora.

25Eliyazara, n'wana Aroni, a teka un'wana wa vana va Putiele, a n'wi velekela Finiyasi. Hi vona vini va vatata wa Levhi hi tinyimba ta vona.

26Hi yena Aroni loyi na Muxe loyi, Yehovha a nga ku eka vona: “Humesani vana va Israele eEgipta hi mavandla ya vona.”

27Hi vona va nga vulavula na Faro, hosi ya Egipta, leswaku va humesa vana va Israele eEgipta, Hi yena Muxe loyi na Aroni loyi.

28Siku Yehovha a vulavulaka na Muxe etikweni ra Egipta, Yehovha a ku eka Muxe:

29“Hi mina Yehovha. Byela Faro, hosi ya Egipta, hinkwaswo leswi ndzi ku byeleke swona.”

30Kutani Muxe a ku eka Yehovha: “Ndzi munhu wa xirimi; Faro u ta ndzi yingisisa hi ku yini xana?”

← Chapter 5 Jump to: Chapter 7 →