Joshua 1

Tsonga Xitsonga (Bibele) 1929

Jump to: Chapter 2 →

1Kuteloko Muxe, nandza wa Yehovha, a file, Yehovha a byela Yoxuwa, n'wana Nuni, nandza wa Muxe, a ku:

2“Muxe, nandza wa mina u file; pfuka, u ya pela Yordani loyi, wena, ni tiko hinkwaro leri, mi ta nghena etikweni leri ndzi ri nyikeke vana va Israele.

3Ndzi mi nyikile ndhawu hinkwayo leyi nga ta kandziyiwa hi mikondzo ya n'wina, hilaha ndzi byeleke Muxe hakona,

4ku sukela emananga na Lebanoni loyi, ku fika enambyeni lowukulu, enambyeni wa Yufrata, ri nga tiko hinkwaro ra Vahiti, ni ku fika eLwandle Lerikulu evupeladyambu, ri ta va tiko ra n'wina.

5A ku na munhu la nga ta tiya ku yima emahlweni ka wena hi masiku hinkwawo ya vutomi bya wena; hilaha ndzi byeleke Muxe hakona, ndzi ta va na wena, ndzi nga ka ndzi nga ku tshiki, ndzi nga ka ndzi nga ku siyi.

6Tiya mbilu, u tiya hikuva hi wena la nga ta fumisa tiko leri misava leyi ndzi hlambanyeleke vatata wa vona ku va nyika yona.

7Tiya mbilu, u tiya swinene, u hiseka ku endla hi nawu hinkwawo lowu Muxe, nandza wa mina a ku leriseke wona; u nga tshuki u hambuka eka wona exineneni, hambi ku ri eximatsini, leswaku u ta kateka eswilweni hinkwaswo leswi u nga ta swi sungula.

8Buku ya nawu lowu, yi nga tshuki yi va kule ni nomu wa wena, kambe u yi anakanya vusiku ni nhlekanhi, u hiseka ku endla hinkwaswo leswi tsariweke kona, hi kona u nga ta kateka etindleleni ta wena, u ta tsaka.

9Xana a ndzi ku lerisanga ndzi ku: ‘Tiya mbilu, u tiya: u nga chavi, u nga tsemeki nhlana; hikuva Yehovha, Xikwembu xa wena, xi na wena hinkwako laha u nga ta ya kona.’ ”

10Kutani Yoxuwa a lerisa tindhuna ta tiko, a ku:

11“Fambani exikarhi ka mixaxa, mi lerisa tiko, mi ku: ‘Longani, hikuva loko ku hundzile masiku manharhu, mi ta pela Yordani loyi, ku ya teka tiko leri Yehovha, Xikwembu xa n'wina, a mi nyikaka rona ku ri fuma.’ ”

12Yoxuwa a byela va Rhuveni ni va Gadi, ni va hafu ya nyimba ya Manase, a ku:

13“Tsundzukani leswi Muxe, nandza wa Yehovha, a mi leriseke swona, loko a te: ‘Yehovha, Xikwembu xa n'wina, u mi nyikile ku wisa, u mi nyikile tiko leri,’

14vasati va n'wina, ni swihlangi swa n'wina, ni swifuwo swa n'wina swi ta sala etikweni leri Muxe a mi nyikeke rona ehase ka Yordani; kambe n'wina mi ta famba mi hlomile emahlweni ka vamakwenu, mi ri hinkwenu vavanuna va matimba, ni tinhenha, mi ta va pfuna,

15Yehovha a kondza a nyika vamakwenu ku wisa kukotisa n'wina; kutani na vona va ta nghena etikweni leri Yehovha, Xikwembu xa n'wina, a va nyikaka rona ku ri fuma; hi kona mi nga ta tlhelela etikweni leri nga ra n'wina, kutani mi ta ri fuma, ri ri tiko leri Muxe, nandza wa Yehovha, a mi nyikeke rona ehase ka Yordani, evuxeni.”

16Va hlamula, va ku eka Yoxuwa: “Hi ta endla hinkwaswo leswi u hi leriseke swona, hi ta ya hinkwako laha u nga ta hi rhumela kona.

17Kukotisa leswi hi yingiseke Muxe etimhakeni hinkwato, hi ta ku yingisa. Ntsena Yehovha, Xikwembu xa wena, a a ve na wena kukotisa leswi ingi a a ri na Muxe.

18Un'wana ni un'wana la nga ta ala ku endla hi ku lerisa ka wena, loko a nga yingisi marito ya wena eswilweni hinkwaswo leswi u nga ta n'wi lerisa swona, u ta dlawa; ntsena, tiya mbilu, u tiya.”

Jump to: Chapter 2 →