Joshua 17

Tsonga Xitsonga (Bibele) 1929

← Chapter 16 Jump to: Chapter 18 →

1Manase a kuma ku averiwa ka yena hi vuhlolotwana, hikuva i mativula ya Yosefa. Loko a ri Makiri, mativula ya Manase, tata wa Giliyadi a nyikiwa Giliyadi na Baxani hikuva a a ri nhenha.

2Va hoxa vuhlolotwana ku nyika vana lava seleke va Manase ndzhaka, hi tindlu ta vona; va ri vana va Abiezere, ni vana va Heleke, ni vana va Asiriele, ni vana va Xikeme, ni vana va Hefere, ni vana va Xemida: hi vona vana va xinuna va Manase, n'wana Yosefa, hi tindlu ta vona.

3Loko a ri Selofihada n'wana Hefere, n'wana Giliyadi, n'wana Makiri, n'wana Manase, a nga vanga na vana va xinuna, kambe a a ri ni vanhwanyana; hi wona mavito ya vona: Mahela, Nowa, Hogila, Milika Tirisa.

4Va ta humelela emahlweni ka Eliyazara, muprista, ni le mahlweni ka Yoxuwa, n'wana Nuni, ni le mahlweni ka tihosi, va ku: “Yehovha u lerisile Muxe ku hi nyika ndzhaka exikarhi ka vamakwerhu.” Kavaloko va nyikiwa ndzhaka hi ku lerisa ka Yehovha exikarhi ka vamakwavo va tata wa vona.

5Manase a averiwa ku avanyisa ka khume, ehandle ka tiko ra Giliyadi ni ra Baxani, leri nga hase ka Yordani;

6hikuva vana va xisati va Manase va nyikiwa ndzhaka exikarhi ka vana va yena va xinuna kutani tiko ra Giliyadi ri va ra vana va xinuna lava seleke va Manase.

7Ndzilakana wa Manase wu suka eAsere, wu ya eMikimeta lowu langutaneke na Xikeme, kutani ndzilakana wu ya edzongeni eka vaaki va Eni-Tapuwaka.

8Tiko ra Tapuwaka i ra Manase; kambe Tapuwaka lowu nga endzilakaneni wa Manase, i wa vana va Efrayimi.

9Ndzilakana wu rhelela exinambyaneni xa Kana, edzongeni ka xinambyana. Miti leyi i ya Efrayimi, exikarhi ka miti ya Manase. Ndzilakana wa Manase wu le n'walungwini ka xinambyana, wu ya fika elwandle.

10Edzongeni, tiko i ra Efrayimi, kambe en'walungwini, i ra Manase ndzilakana wa rona i lwandle. Va fika eka Asere en'walungwini ni ka Isakara evuxeni.

11Manase a nyikiwa etikweni ra Isakara ni ra Asere: Beta-Xeyani ni miti ya wona, na Yibiliyamu ni miti ya wona, ni vaaki va Dori ni miti ya wona, ni vaaki va Eni-Dori ni miti ya wona, ni vaaki va Taanaka ni miti ya wona, ni vaaki va Megido ni miti ya wona; ma ri matikwana manharhu.

12Kambe vana va Manase va tsandzeka ku fuma miti leyi; kutani Vakanana va tiya ku aka etikweni lero.

13Kutani, kuteloko vana va Israele va kumile matimba, va tirhisa Vakanana mitirho, kambe a va nga va tekelanga tiko ra vona kunene.

14Vana va Yosefa va vulavula na Yoxuwa, va ku: “Xana u ndzi nyikele yini-ke ndzhaka ya ku averiwa kun'we ntsena, ni ku avanyisa kun'we, kasi ndzi tiko leri teleke, leri Yehovha a ri katekiseke ngopfungopfu ku fika sweswi.”

15Yoxuwa a ku eka vona: “Leswi u nga tiko leri teleke, khandziya exihlahleni, u tixakatsela masimu etikweni ra Vaperesi, ni ra Varefayimi, leswi ntshava ya Efrayimi yi laleke eka wena.”

16Vana va Yosefa va hlamula, va ku: “Ntshava leyi, a yi nga hi ringani, na swona tigolonyi ta tinsimbhi ti kona eka Vakanana hinkwavo lava akeke etikweni ra nkova, eka vanhu va Beta-Xeyani ni miti leyi nga ehansi ka vona, ni ka lava nga enkoveni wa Yizriele.”

17Yoxuwa a byela va yindlu ya Yosefa, va ri va Efrayimi ni va Manase, a ku: “Mi tiko lerikulu, ni matimba ya n'wina ma ri lamakulu; mi nga ka mi nga vi na ku averiwa kun'we ntsena,

18hikuva ntshava yi ta va ya n'wina, leswi xi nga xihlahla, mi ta xi xakatsa, kutani tindlela ta yona ti ta va ta n'wina; hikuva mi ta hlongola Vakanana, hambi va ri ni tigolonyi ta tinsimbhi, hambi va ri ni matimba.”

← Chapter 16 Jump to: Chapter 18 →