Joshua 9

Tsonga Xitsonga (Bibele) 1929

← Chapter 8 Jump to: Chapter 10 →

1Kuteloko tihosi hinkwato leti nga haleno ka Yordani entshaveni, ni le tikweni leri nga ehansi ni le ribuwini hinkwaro ra Lwandle Lerikulu, laha ku langutaneke na Lebanoni, Vahiti, ni Vaamori, ni Vakanana, ni Vaperesi, ni Vahivhi, ni Vayebusi, loko va twile timhaka teto,

2va hlengeletana swin'we hinkwavo, va twanana, ku ya lwa na Yoxuwa na Israele.

3Kambe vaaki va Gibiyoni, kuteloko va twile hilaha Yoxuwa a tirheke hakona na Yeriko na Ayi,

4va endla hi vutlhari na vona: va suka va tekile timbuva va ri ni masaka ya khale timbhongolweni ta vona, ni mikwama ya vhinyo ya khale leyi boxiweke, leyi rhungiweke;

5emilengeni ya vona, va vehele tintanghu leta khale, leti laperiweke; emirini, va ambele tinguvu leti hlakaleke, ni vuswa hinkwabyo bya timbuva ta vona a byi omile, ma ri mahlanhla ntsena.

6Va ya eka Yoxuwa emixaxeni ya Giligala, kutani va ku eka yena ni ka vavanuna va Israele: “Hi pfe etikweni leri nga ekule, hambiswiritano endlani xinakulobye na hina.”

7Kutani vanhu va Israele va ku eka Vahivhi lava: “Swimbe mi akile exikarhi ka hina, xana hi nga endlisa ku yini xinakulobye na n'wina xana?”

8Kutani va ku eka Yoxuwa: “Hi malandza ya wena.” Yoxuwa a ku eka vona: “Mi va mani, mi huma kwihi-ke?”

9Va ku eka yena: “Malandza ya wena ma sukile etikweni leri nga ekule swinene hikwalaho ka vito ra Yehovha, Xikwembu xa wena, hikuva hi yingisile ntwalo wa yena, ni hinkwaswo leswi a swi endleke eEgipta,

10ni hinkwaswo leswi a swi endleleke tihosi timbirhi ta Vaamori ehase ka Yordani, a nga Sihoni hosi ya Hexiboni, na Ogo, hosi ya Baxani, lava akeke eAxitaroto.

11Kutani vakulukumba ni vaaki hinkwavo va tiko ra hina va ku eka hina: ‘Tekani timbuva ta ndlela, mi ya hlangana na vona, mi ku eka vona: “Hi malandza ya n'wina, kutani sweswi endlani xinakulobye na hina.” ’

12Vuswa bya hina hi lebyi hi byi tekeke bya ha hisa etindlwini ta hina loko hi suka ku ta eka n'wina; kutani sweswi, byi omile, i mahlanhla ntsena.

13Ni mikwama leyi, hi yi cherile yi ri leyintshwa, sweswi yi boxekile; tinguvu ta hina ni tintanghu ta hina hi leti; ti hlakarile hi ku leha lokukulu ka ndlela.”

14Kutani vanhu va Israele va pambula timbuva ta vona, kambe va nga vutisanga nomu wa Yehovha.

15Kavaloko Yoxuwa a twanana na vona, kutani a endla xinakulobye na vona leswaku va ta tshikiwa va hanya, ni tihosi ta nhlengeletano ti va hlambanyela swona.

16Kuteloko ku hundzile masiku manharhu ana va endlile xinakulobye na vona, va twa leswaku va tshama ekusuhi na vona, ni leswaku va akile exikarhi ka vona.

17Kavaloko vana va Israele va suka va famba, kutani siku ra vunharhu va fika emitini ya vona; miti ya vona a wu ri Gibiyoni, na Kefira, na Beroto na Kiriyata-Yeyarimi.

18Kambe vana va Israele a va lwanga na vona hikuva tihosi ta nhlengeletano ti va hlambanyele hi vito ra Yehovha, Xikwembu xa Israele; kambe nhlengeletano hinkwayo yi dzumadzumela tihosi.

19Kutani tihosi ti ku eka nhlengeletano hinkwayo: “Hi va hlambanyele hi vito ra Yehovha, Xikwembu xa Israele kutani sweswi hi nga ka hi nga va endli nchumu.

20Hi ta endlisa sweswo na vona: Hi ta va tshika va hanya leswaku hi nga tshuki hi kariheriwa hikwalaho ka leswi hi va hlambanyeleke.”

21Kutani tihosi ti ku eka vona: “Va ta hanya.” Kutani va va vapandzeri va tihunyi, ni vaki va mati va nhlengeletano hinkwayo, hi laha tihosi ti va byeleke hakona.

22Kutani Yoxuwa a va vita, a va byela, a ku: “Xana mi hi xisele yini loko mi te: ‘Hi akile ekule na n'wina,’ kasi mi akile exikarhi ka hina?

23Sweswi, mi rhuketeriwile; mi nga ka mi nga tshiki ku va makhumbi, mi va vapandzeri va tihunyi ni vaki va mati va yindlu ya Xikwembu xa mina.”

24Va hlamula, va ku eka Yoxuwa: “Makhumbi ya wena ma byeriwile leswaku Yehovha, Xikwembu xa wena, xi lerisile Muxe, nandza wa xona, ku mi nyika tiko hinkwaro ni ku heta emahlweni ka n'wina vaaki hinkwavo va tiko; sweswo hi chavile ngopfu hikwalaho ka vutomi bya hina, emahlweni ka n'wina, kutani hi endlile sweswo.

25Sweswi-ke, hi le vokweni ra wena. U nga endla eka hina hi ku saseka ni ku lulama, hi laha u nga vonaka hakona.”

26Kutani a va endlela sweswo; a va kutsula emavokweni ya vana va Israele leswaku va nga va dlayi.

27Yoxuwa a va veka siku lero vapandzeri va tihunyi ni vaki va mati va nhlengeletano ni alitari ya Yehovha ku fika namuntlha, endhawini leyi a nga ta yi hlawula.

← Chapter 8 Jump to: Chapter 10 →