Joshua 16

Tsonga Xitsonga (Bibele) 1929

← Chapter 15 Jump to: Chapter 17 →

1Ku averiwa ka vana va Yosefa loku humeke hi vuhlolotwana, ku ve ku suka eYordani ni le Yeriko, ematini ya Yeriko, evuxeni, emananga lama sukaka eYeriko ku fika entshaveni ya Betele;

2ku suka eBetele, ndzilakana wu ya eLuzi, wu hundza ekusuhi ni ndzilakana wa Vaariki, eAtaroti;

3kutani wu rhelela evupeladyambu ekusuhi ni ndzilakana wa Vayafeleti, wu fika endzilakaneni wa Bet-Horoni wa le hansi, ni ku fika eGezere, kutani wu ya huma elwandle.

4Vana va Yosefa, Manase na Efrayimi, va kuma kona ku averiwa ka vona.

5Hi wona ndzilakana wa vana va Efrayimi, hi tindlu ta vona: Ndzilakana wa ndzhaka ya vona wu le vuxeni ka Ataroti-Adara ku fika eBet-Horoni wa le henhla,

6ndzilakana wu ya evupeladyambu, tlhelo ra Mikimeta, en'walungwini; kutani ndzilakana wu rhendzeleka evuxeni eTaana-Xilo, wu ya emahlweni evuxeni, tlhelo ra Yanowaka;

7kutani wu suka eYanowaka, wu rhelela eAtaroti na Naara, wu ya fika eYeriko, kutani wu ya hela eYordani.

8Ndzilakana wu suka eTapuwaka, wu ya evupeladyambu, exinambyaneni xa Kana, wu ya hela elwandle. Hi yona ndzhaka ya nyimba ya vana va Efrayimi hi tindlu ta vona.

9Vana va Efrayimi a va ri ni miti hitlhelo, exikarhi ka ndzhaka ya vana va Manase; miti hinkwayo leyi yi ri ni swimitana swa yona.

10Kambe a va hlongolanga Vakanana lava akeke eGezere; sweswo Vakanana va akile exikarhi ka va Efrayimi ku fika ni namuntlha; ntsena va tirhisiwa mitirho.

← Chapter 15 Jump to: Chapter 17 →