Numbers 27

Tsonga Xitsonga (Bibele) 1929

← Chapter 26 Jump to: Chapter 28 →

1Vanhwanyana va Selofihada, n'wana Hefere, n'wana Giliyadi, n'wana Makiri, n'wana Manase, n'wana Yosefa (mavito ya vona a a ri Mahela, na Nowa, na Hogila, na Milika, na Tirisa);

2va ya humelela emahlweni ka Muxe na Eliyazara, muprista, ni le mahlweni ka tihosi ta nhlengeletano, enyangweni ya tabernakela ya nhlengeletano, va ku:

3“Tata wa hina u fele emananga kambe a nga vanga exikarhi ka nhlengeletano ya lava lwiseke Yehovha, va nga va nhlengeletano ya Kora; kambe u file hikwalaho ka ku dyoha ka yena, a nga ri na n'wana wa wanuna.

4Xana vito ra tata wa hina ri ta susiwa enyimbeni ya yena hikuva a nga siyangi n'wana wa wanuna-ke? Hi nyike ndzhaka exikarhi ka vamakwavo va tatana.”

5Muxe a yisa mhaka ya vona emahlweni ka Yehovha.

6Kutani Yehovha a ku eka Muxe:

7“Vana va Selofihada va vula swona. U ta va nyika ndzhaka exikarhi ka vamakwavo va tata wa vona! U va avela ndzhaka ya tata wa vona.

8Kutani u ta byela vana va Israele, u ku: ‘Kungakuloko munhu a fa a nga ri na n'wana wa wanuna, mi ta avela n'wana wa yena wa wansati ndzhaka ya yena.

9Loko a nga ri na n'wana wa wansati, mi ta nyika ndzhaka ya yena eka vamakwavo.

10Loko a nga ri na vamakwavo, mi ta nyika ndzhaka ya yena eka vamakwavo va tata wa yena.

11Loko ku nga ri na vamakwavo va tata wa yena, mi ta nyika ndzhaka ya yena eka xaka ra yena leri nga ekusuhi na yena, endlwini ya yena, kutani yi ta va ya yena. Eka vana va Israele, wu ta va nawu wa leswi fanelaka, hilaha Yehovha a leriseke Muxe hakona.’ ”

12Yehovha a ku eka Muxe: “Tlhandlukela entshaveni leyi ya Abarimi, u languta tiko leri ndzi ri nyikeke vana va Israele;

13kutakuloko u ri vonile, u ta rhurhiwa, na wena, eka varikwenu hilaha Aroni, makwenu, a rhurhiweke hakona;

14hikuva mi landzurile ku lerisa ka mina emananga ya Sini, hi nkarhi wa ku kaneta ka nhlengeletano, mi nga ndzi dzunisanga emahlweni ka vona emhakeni ya mati.” I mati ya Meriba, ya Kadexe, emananga ya Sini.

15Kutani Muxe a vulavula na Yehovha, a ku:

16“Yehovha, Xikwembu xa mimoya ya tinyama hinkwato a a veke ehenhla ka nhlengeletano wanuna la humaka emahlweni ka vona, ni la nghenaka emahlweni ka vona,

17loyi a va humesaka, ni loyi a va nghenisaka; nhlengeletano ya Yehovha yi nga vi ku kotisa ntlhambi lowu nga riki na murisi.”

18Kutani Yehovha a ku eka Muxe: “Teka Yoxuwa, n'wana Nuni, munhu loyi Moya wu tshameke eka yena u ta veka voko ra wena ehenhla ka yena;

19kutani u ta n'wi yimisa emahlweni ka Eliyazara, muprista, ni le mahlweni ka nhlengeletano hinkwayo, kutani u ta n'wi lerisa milawu ya wena emahlweni ka vona.

20U ta n'wi pambulela vukulukumba bya wena, leswaku nhlengeletano hinkwayo ya vana va Israele yi n'wi yingisa.

21U ta yima emahlweni ka Eliyazara, muprista, kutani yena u ta n'wi kombelela hi nawu wa Urimi, emahlweni ka Yehovha: hi ku lerisa ka yena, vana va Israele hinkwavo va ta huma, kambe hi ku lerisa ka yena, va ta tlhela va nghena.”

22Muxe a endla hilaha Yehovha a n'wi leriseke hakona a teka Yoxuwa a n'wi yimisa emahlweni ka Eliyazara muprista, ni le mahlweni ka nhlengeletano hinkwayo;

23a tlhandleka mavoko ehenhla ka yena, kutani a n'wi veka hilaha Yehovha a leriseke Muxe hakona.

← Chapter 26 Jump to: Chapter 28 →